爾只「貓」唔簡單

xxkai

「踎低」個「踎」嘅本字原來系「貓」，因為「貓」好鐘意「踎」，後來引申到「彎腰」也叫「貓腰」，北方人用俗字「毛腰」表示「貓腰」，即「彎腰」。

「出貓」即系「作弊」，考試唔識唔使放狗，放只「貓」就乜問題都解決嗮嘞。有冇人知道「出貓」嘅出處哩？

「行貓步」即系「Catwalk」、「時裝表演」，又叫「走秀」。爾只貓識英文。系「金絲貓」。

「貓咗」形容「醉咗」，連動詞都撈埋。我恁「貓咗」系出自「醉貓」一詞？

「賴貓」即系講咗嘅嘢唔算數。爾只貓「精甩尾」，見到「短尾貓」或者「冇尾貓」千萬要小心。

其餘嘅貓有「爛瞓貓」、「齷齪貓」、「病貓」，「為食貓」，「叫春貓」等等等等。

除此之外，貓重有九條命添噃。爾只貓真系唔得佢死。

xiemo

除此之外重有花面貓、食死貓。不過我就唔明白點解咁多系用貓，希望有人指教。唯一想講噶系出貓，出貓係粵講粵過癮個視頻裏面，有解釋過貓生仔係比較秘密，但我推測並非如此，可能出貓同出術都來自出茅山術呢一個詞。茅山術大家都知道係旁門左道之類的法術，贏唔到咪要出貓、出術

xxkai

喺網上揾到以下資料：「出貓」之所以解「作弊」，目前有其它三種說法：

1）據教育局國語字典: 「貓」系北平方言，指「躲藏」。而當從躲藏中顯露出來，就可以形容為「出貓」。喺考試中出貓嘅考生會先將一張寫有答案嘅紙「貓」起來（即藏起來）,然後喺考試嗰陣拎出來抄，爾個動作咪系「出貓」囉。

2）由英文「copycat」演化而來：「Copycat」系指模仿別人嘅動作，抄襲別人嘅文章，系令人討厭嘅行為，作弊嘅人將貓紙中嘅答案copy落答題紙上，搬字過紙，而不經思考，因為「copycat」內有個「貓」字，尐人就創造咗「出貓」爾個詞嘞。

3）據「擔天望地廣府俗語探奇」: 「出貓」嘅「貓」系借音字，其實系「毛」嘅普通話音變。「毛」喺北方話有不規矩之意，考試作弊時出現毛手毛腳嘅行為，故此用「出毛」來形容作弊，後來講下講下就變成「出貓」嘞。