省城有間書室（粵話古仔）

游人

忽然之間，心血來潮，寫得唔好，有怪莫怪。


省城有間書室，所謂嘅書室呢，就即係有人寫書嘅地方。咪話書室書書聲就係豆泥野，書室班人，
隻手郁幾郁，幾千蚊就上門，認真唔話得咯。

有日，有位老省城去呢間書室參觀，睇個班寫書嘅人有幾巴閉。

個位老省城一行到書室門口，睇見書室俱係用木嚟搭，外圍睇嚟同其他人家嘅屋企差無幾兩。老省
城個陣喺處心想：「實而唔華，幾抵讚啊又。」

於是乎老省城就行入書室，就睇見書室裡頭用木板間嘵甚多間格。每一格呢，就有一張書寫枱，一
個人重有一疊格仔紙。個的人呢就唔停噉寫，唔停噉寫，都唔知佢哋寫乜野東西。唔使問，呢的人
實係書室裡頭嘅寫書佬定啦。

老省城見佢班人一味係噉寫，心中唔忿。就是但向住其中一格嘅人大叫：「開嚟！」

個位人兄都算係有的家教，聞得老省城大聲叫佢，都無打枱罵人。佢放低手頭上嘅野，行到去老省
城面前，問聲：「老人家，咁大聲做咩野事？你想開咩？呢度無野可以開嚟。重有唔該你細聲的，
呢度係書室嚟。」

老省城聽得佢噉講話，都覺自己有唔著嘅。於是乎低聲下氣噉話：「對唔住啊老友，係我唔著咯，
我唔著。」然之後又講：「係呢，哥仔喺處寫乜野呢？畀過我睇得唔得？」

個位人兄見佢好聲好氣，就喺佢張書寫枱擰嘵一份寫滿哂嘅紙嚟，同老省城講話：「呢本係我新作
嘅書，叫《三隻小豬》。」

老省城一聞聽個部書名，吊起條癮，叉起隻手話：「《三隻小豬》？叫三隻豬仔重好啦！講乜野事
幹，讀過嚟聽聽。」

於是乎個位人兄就讀起上嚟：「從前，有一隻豬媽媽，生了三隻小豬。豬大哥很貪睡，很懶惰。一
天到晚都在打瞌睡。豬二哥很愛吃，他也很懶惰……」

講到「打瞌睡」過後，老省城聽都唔願聽，整停個位人兄話：「打住！打瞌睡係乜野嚟？我喺省城
你呌我聽你講鬼話？」

老省城打住個位人兄講說話，竟然嬲都無嬲過，重同老省城講話：「省城話，口講就天下無敵，手
寫就一文不值。乜你唔知而家乜野都靠向鬼話咩？就算係你中意嘅大戲，都加咗唔少滴滴鳥鳥麼麼
啦！我哋唔寫鬼話，邊得十幾萬？」

老省城聽完當堂大力打枱，呯一聲嚇驚全室人。

打枱過後，老省城慢慢走出書室，口郁郁唔知唱乜野：

「
真正心痛，省城無嘵正音。
家家戶戶都唔知大難嚟臨。
有話我手寫心，點知一寫手就震。
皆因寫起省城話，就賺唔倒的大金。
唉，點止肉痛，行出書室苦聲低吟。
」

馬萬千

好嘢。有冇第二回呀？

UngooChan

得食喎又，「差無幾兩」、「幾抵讚啊又」、「開嚟」呢啲講法幾近失傳。個古仔搵人講埋出嚟就過癮，點醒下家下班細路。