廣州話嘅最後一課

meallanfearghai

文：夢多
粵語翻譯：Meallán

        嗰日朝早返學，我去得好遲，心裡面好驚陳Sir鬧我，況且佢話過要考我地廣州話歇後語，但係我就一個都唔識。
        我急急腳跑住去學校。經過銀記腸粉店，見到好多人企咗喺腸粉店旁邊面布告牌前邊——最近伊兩年來，關于我地廣州嘅一切壞消息冚吧啷都係首先從嗰度傳出來嘅：乜嘢單雙號限行啊，亞運之前人行道啲地磚要換晒做花崗岩啊，恩寧路要被人拆咗重建啊之類嘅。
我放慢咗腳步，心裡面諗：今次又搞邊科啊？淨係聽到有人話：
        「頂，一日都係當初我地『被普通話』嗰陣冇出聲，依家佢地果然要食晒我地車馬炮士象卒⋯⋯」
        「係呀。我仲聽人講呢，話廣州電視台嗰檔《新聞日日睇》因為個欄目個名稱含有廣州話，要改名為《新聞每天看》添啊。」
        我雖然好想聽落去，但係我返學就來遲到了，於是衹好繼續跑去學校。
        跑到去課室門口嗰陣時，我驚死陳Sir會批評我。但係陳Sir見到我，祇係好溫和地說：「快尐坐好啦，夢多。我們就來上堂，唔等你㗎啦。」
        我返到座位坐低，心裡面仲係十五十六。陳Sir已經坐咗上張凳，好似剛才啱先對我講話咁樣，又柔和又嚴肅咁同我們講：「各位同學，我曾經講過，要將每個星期嘅廣州方言文化課當作最後一課來講。諗唔到，我地都真係有今日——上頭已經落咗通知，以後課堂上面唔可以再教伊類地方意識太強嘅課程啦。教授其他課程嘅新老師下個星期會到。今日是你地最後一堂廣州方言文化課，我希望你們多多用心聽講。」
我咗了伊幾句話，心裡面罯住罯住。嗰班死人碎粵神偷，佢地貼上布告牌嘅，原來就係咁樣一回事！
        我嘅最後一堂廣州話課！
        我仲喺度走緊神嘅時候，忽然聽到陳Sir叫我個名，要考我嘅廣州話歇後語。佢問：
「第一題：廣州政協『把廣州電視台改為以普通話為基本播音用語的頻道』嘅提案，係『掟石落屎坑』，伊句廣州話歇後語係何解？」（註：「激起公憤 （糞）」）
「第二題：當得知以後都冇得再上廣州方言文化課嗰陣時，老師個心真係『鹹蛋滾湯』啊，伊句又係何解？」 （註：「心都實曬」）
「第三題：唉，廣州話真係『韭菜命』，何解？」（註：「一長就割」）
        我一個都唔識，衹好一碌木咁企喺嗰度，個心好罯，頭也抬唔起身。我聽到陳Sir對我講：
        「我都唔怪你嘅，夢多。你自己一定夠難受嘅啦。大家日日都咁諗：托咩？橫掂考試又唔使考廣州話，學唔學有咩所謂嗟？現在看看我們搞成點？唉，依家版碎粵神偷就有理由話我地啦：「怎幺？你們還自己說是廣州人呢！你們連自己的方言都不會聽，都不會說！」我知，依家好多細路甚至連黃俊英、盧海潮嘅粵語相聲都唔識聽啦！……不過，阿夢多仔，伊個都唔係你一個人嘅過錯，我地大家都有許多應該反省自己嘅地方。」
        「你的老豆老母對你地學習廣州方言文化嘅意義認識不夠，簡單咁以為『廣州方言文化課』就齋係等于學講廣州話——阿廣州話喺屋企講咪得囉，使乜專門學嗟？有時間不如用喺普通話考級上面啦！佢地更加冇意識到廣州話係一門好生活化嘅語言，姖要煥發活力，同埋傳承，在於日常講而不在於喺課堂上面學！我仲聽講，你地有啲老師，連聽到學生在校園裡面講廣州話都會貓刮咁嘈嘅！
        「希特勒講過：『要消滅一個民族，首先要瓦解佢嘅文化；要瓦解佢嘅文化，首先要消滅承載佢嘅語言；要消滅伊種語言，首先要從佢地嘅學校裡面落手。』 我並唔抗拒普通話，相反我十分樂意用普通話同外省朋友交流，伊個都係時代嘅要求，但係我們一定要警惕一元化嘅极權思維，以及借推廣普通話之機而搞搞震嘅『去廣州化』！
        「嗰版碎粵神偷依家見到自己非洲和尚咁乞人憎，就雞咁腳出來『辟謠』，話從來冇有話過要『推普廢粵』，但係路人皆知司馬昭之心：佢地此前嘅行徑係喺度試探緊民意嘅底綫！如果唔係幾千人去到江南西『保衛廣州話』，如果不是千千萬萬嘅網友喺網上為廣州話奮起疾呼，政協嘅提案就肯定會百分之百通過。如果我地連聽母語同講母語嘅權利都放棄埋，遲早，佢地連我地幾代廣州人用來氹蘇哈仔覺覺豬嘅兒歌《月光光照地堂》都要改埋做普通話版先至安樂㗎啦！各位同學，愛自己嘅母語係唔需要任何理由嘅，就好似愛我地自己嘅阿媽 一樣，你冇理由話人地個媽媽幾好幾好，就要埋我地叫人地個阿媽做『阿媽』至得㗎。」
        「就喺前冇耐，我聽講連明朝名將袁崇煥用來激勵士氣嘅熱血名句『屌那媽，頂硬上！』都被人喺尊雕像下面鏟走咗。不過咁一尐都不出奇，事關佢地因為歷史不符合統治者的意志就篡改、歪曲歷史，已經唔係第一次啦。其實成件事擺住喺度大家有眼睇：歷史就是歷史，英雄就是英雄，梗嘅。冇理由話，他講過『屌那媽』就唔係英雄；或者因為佢係英雄，就否認佢講過『屌那媽』。
        「其實我好清楚，佢地擔心嘅，唔係伊句話『教壞細路』，而係『屌那媽，頂硬上！』所體現出來嘅血性同埋硬頸，會嚇到佢地鼻哥窿都冇肉。
        「講開又講，廣州話到咗今時今日需要『保護』嘅境地，唔通廣州人自己就不需要反省下咩？本地媒體常常打正招牌話廣州是一個開放包容嘅城市，但事實係唔係真係咁先？我們身邊有幾多人，將外省同胞稱為『撈頭』、『北佬』？有多少人鬼殺咁嘈，大嗌『煲冬瓜收皮！』？伊啲行為畀我睇到嘅不是開放同埋包容，反而係封閉同埋無知嘅自大！唔同係要排斥同敵視其他語言，先至表達到我地對廣州話嘅愛咩？ 」
        就咁樣，陳Sir從一件事傾到另一件事，但都係圍繞著廣州話同我地嘅聯繫。佢話：世界上每一種語言都有姖自己嘅美，每一種語言都係平等嘅；唔能夠因為一種語言多人使用，或者使用伊種語言嘅人處于統治地位，就唔允許其他相對弱勢嘅語言存在。
        「衹有當我地靜到個心落來，聆聽同欣賞其他語言嘅美，同時亦能夠將我們廣州話嘅美展現得好好嘅時候，咁先係真正嘅自信；衹有當我地喺講廣州話嘅場合，發覺有外省朋友 （哪怕衹係少數）喺度，就自覺咁轉用普通話，咁先係真正嘅同理心。
        「各位同學，我地嘅廣州話，其實係藴含著好多溫馨美好嘅回憶嘅。譬如廣州人稱呼隔離鄰舍做『街坊』——喺老廣州人舊陣時嘅記憶裡面，街坊關係是一道最體驗到溫馨人情嘅風景綫：邊個屋企煲咗靚湯、煮咗靚餸，一定會分啲畀左鄰右裏試下，是謂『同煲同撈』、『分甘同味』。各位同學，守護廣州話，就係守護住伊份人情味；就算有一日⋯⋯廣州話真係淪陷咗，伊份『同煲同撈』、『分甘同味』嘅人情都不可以冇咗。」
        講到伊度，陳Sir就翻開備課簿講廣州話口頭禪嘅典故同埋背後嘅文化韻味。話時又話，今天嘅課，我竟然全部都聽懂晒。他似乎講得又容易，又有滋有味。我覺得我從來未試過咁認真聽講，他都從來未試過咁耐心講解。可憐嘅陳sir，好似慌死唔能夠喺自己離開之前將自己知道嘅嘢教晒畀我們，冚吧啷塞晒入我們個腦。
        跟著，陳Sir用錄音機播已故講古大師張悅楷先生嘅廣州話評書，同埋粵劇名伶任劍輝同白雪仙嘅名作《帝女花》畀我地聽，我們聽都如痴如醉——原來廣州話唔係 「冇文化」嘅象徵，原來廣州話可以被人演繹到咁優雅同有韻味。
        課室屋頂上面，幾隻鴿喺度細細聲咁嘰嘰咕咕。我就諗：「班碎粵神偷冇理由迫這幾隻鴿唱歌都要用普通話掛？」
        突然間，落課鐘響。窗外面，碎粵神偷又試喺度大聲夾冇準——佢地已經煲完冬瓜，準備每個班派一件。陳Sir企起身，面無血色。我從來未見過佢咁高大。
        「各位同學，」佢話，「我⋯⋯我⋯⋯」
        但是他把聲沙咗。佢講唔落去。
        他擰轉身，面對黑板，執起一支粉筆，使出全身嘅力量，寫低六個大字：
        「屌那媽！頂硬上！」
        然後佢棟喺嗰度，個頭頂著埲墻，粒聲唔出，衹係向我地做咗一個手勢:
        「放學——散band！」

promethusewei

寫得好好！！！！！！我轉載下！！

Vncantonese

重有幾個詞未改成粵語．例如：他，他們，說．．．．

硬膠

拜讀此帖，感悟良多

HKCantonese

唔錯，唔錯。好一個「碎粵神偷」，好傳神。