未必政治正確－－左丁山

猫妖008

　　　　　　辭職不久之美國總統經濟顧問森瑪斯係著名經濟學家，二十八歲就做咗哈佛大學嘅終身職教授，創下紀錄，佢在美國有「旋轉門」之便，於哈佛與聯邦政府之間出出入入，十幾年前做克林頓總統嘅財政部長，離任後返回哈佛做咗校長，點知聰明一世，笨拙一時，講咗啲政治不正確嘅說話，就係評論哈佛理工科方面點解女教授嘅人數比例偏低，直率指出女性天生鍾意家庭，不願撥出太多時間在實驗室，所以女科學家成功嘅人數比較少。哈佛噃，係美國自由派知識分子重地，森瑪斯此言一出，立即俾文理學院啲教授痛罵，話森瑪斯歧視女性，拖咗一輪，佢卒之請辭，由女教授頂上做校長，佢做番經濟學教授，然後加入白宮扶助奧巴馬，現在又返回哈佛。

　　　　　　女性科學家是否比較難以成功呢？港大化學系講座教授任詠華在化學界有神童之稱，三十八歲就做咗中科院院士，在化學界無人不識。今次得到女性科學家大獎，各媒體爭相訪問，於是我地知道任教授朝早六點送女兒上校巴，七時回到實驗室，晚上九時先至離開，每日工作十四小時，經年累月如是，故此佢話：「做科研很孤獨」。從佢嘅每日工作時間可以推論，每個成功女人的背後要有個男人，否則嘅話，每日女兒去搵邊個傾談、照顧？高錕教授在實驗室研究光纖理論之時，廢寢忘餐，背後就有一位堅強的女人，高太撐住頭家，現在任詠華教授後面就有一位堅毅嘅丈夫。其實森瑪斯講嘅係接近事實嘅，不過好多人唔鍾意聽而已。

　　　　　　中環翠亨邨在十一月十三日之前嘅一個禮拜，天大面子邀得入廚四十七年，與楊貫一、陳東（已故）、許沛東並稱「香港四大名廚」嘅戴龍師父獻藝，提供「八大炒」菜式，包括爆炒（爽肚片）、清炒（活海蝦仁）、乾炒（金蠔鬆）、滑炒（海鮮汁帶子）、熟炒（羊肚菌），軟炒（鵝鴿蛋）、生炒（乳豬三丁）、抓炒（黑豚肉件），加上食神炒飯及佢自己構思嘅（遼參湯）脆皮龜苓膏，左丁山聞風而往，午飯、晚飯皆捧場，見證翠亨邨日夜爆棚之盛。問戴龍呢位食神教父有冇收徒弟，佢話隨緣啦，廣東菜炒功考究體力、手力，舊式鐵鑊有四斤二咁重，左手拋起隻鑊，右手炒河粉，你估咁易咩，廚房內多數係男人，女廚師幾難長時間拋起隻鑊，故此難學呢門手藝！嗱，唔好話戴師父政治不正確呀，只係經驗之談而已！



原載於20101114＜蘋果日報＞名采專欄　ＧＧ細語　左丁山