粵人寫粵文，真正蚊都睏。

游人

若果睇咗心唔忿，唔好再睇返去歸。



上嘵粵協咁耐，令我學曉甚多野，見識甚多人。有人話要立國，或要夾硬講粵話，或要才戒粵話化為拼音。睇佢哋雄心壯志，之不過我一粒人仔怕醜兼細膽，重講乜野理想志向？雖則唔能立國，雖則唔能局人講粵話，就惟有去寫粵文。粵詩、粵謳、南音、三及第文、齋粵文共粵話孖書面文俱寫過，雖則係寫得麻麻，之但係篇篇都係粵文。於是乎我就去尋可以發粵文嘅地方發我作嘅粵文。


先時我去啲文學區發粵文，我係發三及第文先。個陣時我係初初寫三及第文，文法有啲唔順，個啲人睇過之後就問「你作呢篇文文言、書面共口語，係唔係新文體？」，我答「唔係，呢啲叫三及第。」，經過我介紹之後，個處啲人開始睇慣我啲文，重有人指教我啲文法。我放一篇過諸君睇過：

何某搵工


　　城內何某，個樣子甚陋。欲搵工作。

　　何先去了一個大公司求職，老闆一望到何之陋顏，諷曰：「吾族唔請醜人，你都係速速回舍矣
。」何失望出去之。

　　何又去了一個中型公司求職，茲老闆重覆返前人之言謂何曰：「汝咁醜，予輩係忌。」何都係
失望而回。

　　最後何唯有去一間細公司求職，個老闆見其顏，竟然無看小佢之意，並曰：「唔錯，已上大學
，學識唔小。有意孖吾奮鬥乎？」何喜，揖之並白老闆曰：「唯！一定會幫汝上位矣。」

　　兩年後，彼公司嚮何之手上使其上位。並成大公司耳。

　　有次各個公司燕集，何之老闆已經同其他大公司平坐。昔何向其求職而拒嘅老闆都在此，其前
問成功之道。

　　何之老闆使何出來見人，個二人一看，都嘆曰：「真係有眼唔識泰山矣。」


(唔曾寫完)

阿森

哈哈 正所谓「人不可貌相」

游人

寫得多三及第文，就開始寫粵詩。老實講，粵詩共三及第文較之嚟講粵詩係難寫啲。粵詩呢家野，曉睇當寶，唔曉睇當草。曉睇嘅，就會講句「好野，好野。」唔曉睇嘅，「嗟！打油詩之嘛。」之不過曉睇嘅又有幾多呢？俾唔曉睇粵詩嘅人睇低，惟有將粵詩寫得「靚一靚」。

之不過我寫咗咁多回粵詩都唔曾俾人睇低，寫一首畀過人睇，頂多係驚訝問句「乜你用粵話作詩」。我放一首拙詩過諸君睇過：

蜂蜜染(五絕)

成身蜂蜜染,搞到我身黐.
惹上全身蟻,而今搵水池.


講到粵話古仔，佢雖則係睇落易寫，實則寫耐咗就會無力再寫。除嘵用粵話作之外，粵話古仔嘅特點同作書面語小說一樣（乜野描寫法個啲），無乜野唔同。我亦曾經寫過一篇爛尾嘅古仔，畀過一段過諸君睇：


　　何苦一見佢個隻寵物嗌佢當然擰轉頭睇下乜事啦。殊不知佢一擰轉頭，個隻寵物就向佢撲上前
嚟咯。何苦梗係知道個隻寵物驚佢出咗去可能會有啲乜野冬瓜豆腐先至撲出嚟啦，於是乎何苦就笑下
噉摸著佢個頭噉講：「阿四，你同我定啦！我噉做都係為個啲人好，你都係放口啦……阿四。」


　　阿何苦一路行去門口果邊，一路畀阿四拖著嚟行。孻尾何苦一到門口，就用力甩返阿四返屋，
重同佢講：「好喇，我要出門口喇。記著睇實個門口！」


　　何苦就閂咗度門，而果隻阿四就嗚嗚聲噉睩實度門，你話死唔死吖。



(唔曾寫完)

游人

講嘵咁多廢話，開始入正題喇。

「粵人寫粵文，真正蚊都睏。」呢句係贈畀大部份粵人嘅。舊底粵人，以粵話寫文；今時粵人，唔會寫粵文。我又點知舊時粵人時時寫粵文？請你去尋舊時嘅新聞紙，投稿個欄梗有幾篇粵文。只不過漸漸書面語化。

我嚮一啲香港論壇嘅口語小說區發過文，對香港嘅網絡口語小說有啲見解。嚮香港網絡口語小說嘅作者嚟講，多數為細伩仔或者後生仔，以女仔為多。而嚮題目方面就以情情塔塔為主並且嚮學堂發生，皆因佢哋俱係後生一輩。嚮格式方面，多數為劇本格。

呢庭人雖則係寫粵文，之但係個心唔定。經先生與及老友影響，就即時轉寫書面語。所以你一去香港論壇嘅口語小說區睇，就會睇見十個有九個有書面語文存在。

(唔曾寫完)

游人

嚮省城嚟講，我就唔多睇過。只不過我嚮呢處睇過下，我亦有啲見解，同樣一句「若果睇咗心唔忿，唔好再睇返去睏」。粵協有大把粵話高手，有識粵地各地鄉下音嘅，有尋正字好得嘅，亦有玩粵話拼音好掂嘅。之不過大多數有個特點，就係作粵文唔多。講過例嚟你知，有位人兄撐粵話撐得好行，之但係一到寫文就用書面語。又好似有位阿生詩詞歌賦樣樣得，之不過一叫佢寫粵文呢，佢就會講「粵文？哦，粵文幾好呀。」講完鬆頂。亦有位老友講而家教學書面語當道，寫唔倒粵文。書面語當道我覺唔係問題，舊時文盲多，寫得文嘅多數係讀過下師塾，佢哋寫文言之餘間中有粵話。乜而家唔能書面語之餘間中有粵話？


而家粵人理論多過創作，話而家無粵文之餘又唔試下作，粵文唔死都難咯！


所以我勸句諸君，「會員原創」呢區係畀你寫粵文嘅好時機，第時唔得寫唔好悔恨無得寫。「我手寫我心」無可能隻手寫唔倒粵文。