代Cult2：八十前街頭鞋匠 港督隻腳都摸過

外外星人

  

家有一老如有一寶，香港這個家卻貪新厭舊，老建築物拆之後快，古老行業快將絕種。五十年代盛極的造鞋業萎縮，退下來的造鞋匠大多淪為街頭補鞋匠，他們大把故事威過一時，有人甚至連港督隻腳都摸過。

記者：黃潔蓮
攝影：楊錦文、梁細權湯鴻貴：葛量洪都讚我！

■未有固定檔位時，湯伯就用客貨車放工具，蹲在街邊替人補鞋。

話說有日我出外採訪，左腳鬆糕鞋突然甩底，拖着爛鞋捱到去中環港鐵站內的補鞋店，店員見到只餘下前鞋掌黏着鞋底說：「爛到如此你別穿出街嘛，這情況，要放低隻鞋替你修補。」我非常趕時間呀，「等膠水乾都要半小時，最多黏完膠水替你補幾口釘啦。」補鞋後不到三小時，釘不知為何浮出來，太刺腳，我把靠近腳弓位的幾口釘拔出來才沒事。左腳出事後，又到右鞋甩底，這雙鞋買時相當貴，跟了我差不多十年，以價值來說已回本，但要找回一雙穿得舒適的鬆糕鞋卻非易事，幸好我遇上湯鴻貴，這雙鞋有救了。
只見湯伯拿着一個有鈎的尖錐，由鞋墊位直插至鞋底，另一手拿着帶蠟的粗線，勾在尖錐的鈎上，像縫補衣服般替爛鞋縫合起來，不消十分鐘就補好了，我把已修補過的左鞋遞給他看，他說：「摩登補鞋只貼膠水不穩陣，他們用機器，哪懂人手補鞋？」然後二話不說幫我拔釘縫補，修好後說：「至少可穿多十年呀。」

■湯鴻貴今年 82歲，還未想過退休：「我一停下來就會病。」

■地上的黃色框框是他根據地，去年成功爭取回來，他還刻意在鐵櫃上寫着「有牌」，以作識別。

沈殿霞都幫襯

■湯伯靠這個有鈎的尖錐和包了蠟的線補鞋，鞋底非常穩固。

82歲的湯鴻貴， 16歲時在上海學了幾年造鞋技術，戰亂來港投靠舅父，後遇上同是上海人的「高和皮鞋公司」老闆黃福祥，開展其造鞋生涯。公司走高檔路線，幫襯的都是官紳名流，連港督葛量洪也是顧客：「佢最鍾意着牛仔靴，而我就最擅長做牛仔靴，佢透過繙譯話：『中國手藝真了得。』」五六十年代一雙鞋要七八十元，是當年一般打工仔半個月薪金，他每做一雙鞋賺$6.5，一天可做三雙鞋，在那年頭搵千多元一個月，好過做醫生律師。公司還替美軍做軍靴，每星期交貨七百雙，後來越戰結束，美軍不再訂鞋，加上在大量生產的廉價鞋衝擊下，生意也難做， 1982年公司正式結業。
結束造鞋生涯後，輾轉間他跟舊同事到九龍城一起做補鞋匠，舊同事移民，他一人獨挑大樑開「湯記專業補鞋」，一星期七天，朝九晚五在九龍城南角道二號的橫巷擺檔。坐在街頭，夏天日曬雨淋冬天寒風刺骨，何不早點退休享清福？「不工作反而會病，我在這裏補補鞋、跟街坊閒聊，日子很快過。」他說最好生意是星期天，客人駕着名車，就泊在對開馬路來找他補鞋，幾千元的貴價鞋他補過不少，「以前的鞋真皮鞋底，現在變為膠鞋底，那又怎會耐穿？」有些客人甚至住在元朗錦綉花園，也特地駕車來找他補鞋。名人客仔更是一籮籮，如曾江、沈殿霞、全國政協委員譚惠珠及幫他爭取小販牌照的工聯會王國興。「我在南角道另一端擺檔二十多年，一直相安無事，南角道那邊某店舖的太子爺接手後，嫌我阻街通報食環署，他們收到投訴也不能不辦事。」被檢控無牌經營，每次被罰幾百元，湯伯用「想死唔得，想生又唔得」來形容。街坊幫口求情，幾經斡旋終於取了牌照，牌費卻要每年四千多元，對於收入極度不穩，好景時可以日入過千，淡起來可整日不發市的湯伯有極大影響。「我補一雙鞋只收$20，要付幾千元牌費實在吃力，不過有些客人好慷慨，會付雙倍價錢，他們說：『手工費都不止啦！』」

■強力膠水可把鞋碼牢牢黏實鞋跟，加幾口釘更穩陣。

■各式皮革軟化水與黏合劑，把爆開的位置黏得實。

■擦鞋是補鞋必備步驟，只用鞋油、水、軟毛刷與布，就可把一雙鞋擦得亮麗。

■單腳鞋鐵，補踭、換底全靠它。這日本製鎚子跟着他有超過五十年歷史。

■打磨器是唯一電器化工具，磨平鞋踭不平部位。

■鋁片刀夠鋒利，主要用來削裁牛皮，一削乾淨利落。

湯記專業補鞋 9078 7775

麥啟：不收徒弟免害人！

■他的檔口有冷氣機有風扇，還有電視機娛樂，說是豪華街邊檔也不為過。

啟伯的補鞋店「啟記皮鞋」極其神秘，名片上寫着「牛頭角道 158號橫門尾段」，位置卻在報紙檔後巷，如非看到報紙檔外的小小招牌，實在難尋。檔口舖面雖小，但有風扇、冷氣機和電視機，可算豪華街邊檔，四十年前他開店，就是貪這條巷人流夠旺，是通往牛頭角工業區的必經之路，當年生意好，同時兼賣鞋賺錢，後來工廠北移，人流銳減，當年客似雲來的巷仔現在變得冷冷清清。
他 19歲入行，學師三年就在山寨廠工作，專門製作皮鞋輸出國外，那時在中華百貨公司賣一雙鞋要五六十元，那年代當鞋匠很吃香，好過做三行，「當時做一雙鞋賺$5，三行工人一天只得$5，我每天做兩雙鞋，已經賺多他們一倍了！」當年造鞋業工會有六千多會員，足證當年造鞋人才多的是，後來大陸開放，工場遷到國內，他回國內打工，仍是賺$5一雙鞋，不過以國內生活水平，每天做一雙鞋已夠他和太太行街看戲。正式令造鞋業式微的，是國內廉價鞋的打擊，「人手造鞋的話，人工都幾百，造鞋楦又幾百，根本很難為皮。」
轉行當補鞋匠，又遇上另一衝擊，三十年地鐵站的摩登補鞋店對他生意也有一定影響，不過真金不怕洪爐火，以手工見稱的人手補鞋還沒完全落得被淘汰的命運：「他們舖租貴、人工貴，補一雙鞋收費是我兩三倍，客人都嫌貴啦，所以很多客人幫襯過他們後，最終還是找我補鞋，因為他們補的鞋很快又爛嘛！」他的小小檔口，每年牌費要$7,000另加電費，經營補鞋絕不能賺大錢，只夠他交牌費和過日辰。「買一雙鞋幾十元也有交易，但補一雙鞋也要二三十元，人們寧願買過另一對算了，夏天生意特別淡靜，你叫我收徒弟，當然不會，免得害人。」

■造鞋，要把皮革拉行就得靠這彎嘴鉗，現已沒用武之地。

■啟伯的「機器補鞋」就是這打磨機，其餘全人手製作。

■四十年後檔口依舊，但已不及當年興旺。

■啟伯的檔口拉上膠幕，夏天可嘆冷氣，冬天不懼寒風。

啟記皮鞋 9446 5229

福嬸：補鞋始終污糟邋遢！

■每有客人拿鞋來，福嬸用紙仔記下以作紀錄。

傍晚六時，裕民坊上行人如鯽，擠在巴士站、小巴站等車趕回家吃晚飯，只有一名中年婦人坐在街頭，吸着汽車廢氣。這晚天氣特別翳熱，她額頭汗珠如豆大，邊拭汗邊埋頭工作，半小時內把一雙甩踭水松底的高踭鞋縫好，又替一雙橡筋鬆掉的鞋換上新橡筋，還要騰出一隻手去接電話，是客人查詢鞋子是否已補好。
她是福嬸， 56歲，當補鞋匠已經三十年，每天中午開檔，「因為早上這位置很曬。」每晚十時收工，「晚上八時後人客較少，我才有時間做客人留下的鞋。」訪問期間，一個阿嬸查問三日前放下的鞋子，福嬸未補好，阿嬸不停罵，最後忍着高溫坐在一旁等，「幾日都未做好？我住秀茂坪，要乘車落來找你呀！」我問阿嬸為何甘心等，她細聲說：「因為她手工好。」福嬸的補鞋技術來自她丈夫，二人本是夫妻檔，後來丈夫患病要留在家中休養，只剩下她看檔。
街頭擺檔，好天曬下雨淋早預了，慘在她的檔口真的很簡陋，工具箱是月餅盒、麻雀箱，工具散落在地上。客人來，坐在圓凳上，脫鞋遞給福嬸，福嬸不忘遞給客人一塊紙皮來晾腳。燈光靠背後的花旗銀行，工具也是全人手操作的，沒電源，想用電器也不可能，甚至在夏天也不能添一把風扇，只靠手上一把紙扇消暑。她說夏天生意特別淡靜，「夏天多數穿拖鞋凉鞋，價錢便宜，爛了就掉了它，哪會花幾十元來補；冬天的人多數穿長靴，價錢較貴嘛，要花錢補幾十元都不過份。」福嬸一再強調：「不要拍我照。」怕被人認得，怕食環署拉人嗎？「親戚朋友不知我做補鞋，始終是污糟邋遢的工作嘛！」抵得冷捱得熱吃得苦，還有精湛手藝，又不是偷呃騙，福嬸你又何須覺得難堪？

■不願面對鏡頭的福嬸，每日中午在裕民坊的花旗銀行門前擺檔，一直至晚上十時才收工。

■鞋油用以補色、鐵鋸用來鋸斷鞋跟。

外外星人

  

舊時補鞋匠地位唔高，不是街邊檔仔就是在偏僻巷仔小店工作，被人貶稱「補鞋佬」。現時補鞋行業變得現代化，不單止開設連鎖店統一管理，還有創新的波鞋皮鞋翻新轉色服務，更有 80後為環保兼職做「洗鞋佬」。

記者：林佩婷
攝影：楊錦文、陳陶鈞、伍慶泉、部份相片由受訪者提供Red Wing都指定合作

■馮生為了管理公司，曾跟師傅學習做鞋技巧，現時較複雜的評估，也由他親自決定。

「修寶鞋藝」可謂首間於港鐵沿線開店的補鞋店，負責人馮生本是公司管理層，後來公司想將店舖易手，馮生索性頂埋自己做老闆。「九幾年嗰陣出面有規模的補鞋店唔多，剛接手生意時得四間分店，後來做埋護鞋用品批發代理，再推廣唔同的補鞋技術，例如以前最多係打鞋碼，但我哋就加埋前掌服務，之後連換鞋底、改造型都做埋。護理用品就專揀高級法國鞋油，入齊五十多種顏色讓客人選擇，做做吓做出口碑來。」版圖逐步擴展至商場，馮生着力為店面改頭換面。「客人大多係 OL、外國客，我哋走中高檔路線，所以每間店設計要舒適，特登用舒適凳、放置雜誌令客人等候時都可以消磨時間。」
補鞋維修費用由幾十至幾百蚊不等，還要視乎情況再評估，曾有客人拎長 Boot來改成短 Boot，還要求和原廠設計一模一樣。馮生更和廠商合作，「 Red Wing好早前已同我哋合作，提供原裝鞋底畀我哋幫客人換。其他店可能單換大底，但我哋連縫線嘅中底都會一併換埋，令佢更耐着。至於其他好似連卡佛，就會將 VIP鞋或袋交畀我哋修理。」種種改變皆為一改補鞋行業的形象，「我想俾人覺得整鞋唔係污糟、踎街或者係低微行業，以前手工可能粗糙啲，家我哋做得好精細。可惜好少年輕人入呢行，好多人諗住行捷徑搵多啲錢唔想辛苦，但做嘢點可能一步登天?!其實做學徒學識一技之長，會終身受用，人工連佣金多勞多得，都幾有前途。」

80後為學一門手藝

阿輝加入公司年多，正等待考升師傅試。視補鞋技師為長遠職業的他，自言可能因小時愛玩模型有關，「砌模型同做木工都要細心，做過地盤好辛苦，阿爸叫我學門手藝，最後我揀咗呢行。最初入嚟師傅教我由釘、搽膠水開始，初時會搽歪咗又或者凸晒出嚟、正式幫人整鞋，每對鞋成幾千蚊，都真係有啲驚，但師傅不停鼓勵、又做得成功先有信心，最開心係俾客人讚時勁有滿足感。除咗學功夫，我仲會學到點樣同客人溝通，接受我哋意見。有次客人拎對鞋嚟整，個鞋底氧化裂晒甚至出現粉狀，但佢都堅持用番呢個原裝底，我明知無可能，惟有勸佢換過個鞋底。」

■阿輝話整鞋最緊要有耐性，師傅教得嚴謹，仲讚佢做事細心肯聽教。

■剛做十多日的 Sam由 釘、搽膠水學起，屋企人不但沒反對，還叫他畀心機。

■德國製整鞋機，可以作打磨、上色和壓鞋等用途。

■保護雞眼、厚枕的矽膠趾套。拇趾套$99、腳趾套$118/對

■左起麖皮與紡織品清潔劑$72、皮革清潔軟膏$58、鱷魚皮清潔軟膏$68。

■有 40幾種顏色選擇的皮革軟膏讓客人補色。各$50

■特地從法國入了五十多款色鞋油，金、銀色也有。各$39

■專為扁平足設計的鞋墊$138

■夏天至愛的人字拖，怕腳趾痛可以加番對凉鞋啫喱防滑墊。$58

■多年前和 Red Wing合作，對方提供原廠鞋底，可幫客人更換，$598起。

修寶鞋藝： 2889 0335

波鞋皮鞋翻新轉色

普通人覺得手袋皮鞋用舊用爛就要掉，但從台灣洗鞋事業回流的 Anson就諗到唔少人肯花錢為貴鞋貴袋清潔翻新，認為這門生意大有可為，「我請埋繙譯過去西班牙學習皮具知識同埋認識各類有關用品，跟住又飛去日本學埋皮具轉色，前後學習成本都好勁。點解我咁有信心？最大原因係當年米蘭站做二手市場都係由無到有，仲發展得好成功；有啲手袋皮鞋幾千甚至十幾萬，係咁意舊咗或花咗就唔要好浪費，所以絕對有得做。」開業半年前， Anson在 facebook將變身前後的鞋、袋相片放上去，更在街頭做問卷了解市場需要。一開店這班 fb Fans已經拎袋去整，第一個月已有錢賺，「最初以為中產客最多，因為一個袋可能成半個月人工，無理由話換就換。但後嚟發現好多有錢人會拎嚟整或清潔，佢哋可能因為啲袋有紀念價值，所以就算有錢買新袋，都唔捨得掉舊的。」
咪以為清潔皮鞋好簡單， Anson話步驟多多，因為一對鞋積聚好多細菌，算是厭惡性工作。當初在台灣開洗鞋店，他就遇過客人拎咗對屎鞋來，惟有着上全身保護衣來洗。現時一對波鞋清潔費約$200起，清洗用品及工具都由自家研發，絕不馬虎，「鞋先拎返中央工場，用自製清潔和除霉劑清洗，跟住用部洗鞋機洗勻內外，之後放入烘乾機烘乾同用紫外線殺菌，最後再噴上防臭防水保護就完成。」

■ Anson話洗鞋算是厭惡性工作，試過有個 19歲學徒個幾禮拜就頂唔順辭工。

■客人設定為中高檔階層，故灣仔的店面走高檔路線。

■所有貨品會運回柴灣中央工場的自家製洗鞋機洗，軟毛刷清潔鞋櫳內外。

■同樣自家研發的烘乾機，附有紫外線殺菌。

吳卓羲亦曾拎 Y3波鞋到旭新社清洗翻新。清洗後潔白非常。

將原本綠色的皮鞋，轉成桃紅色。價錢約$800起。

檢查後發現皮爆裂。加入補皮的護理產品再翻新補裂痕，需時 2日約$400起。

旭新社： 2553 3343

開洗鞋店為環保

■位於大角嘴的工場，內裏的洗鞋機和烘乾機等都從台灣訂回來。

相比上述兩間從生意角度出發， Tony於 09年尾開的「美鞋家」就純以個人興趣出發。有日他發現自己對鞋好污糟，上網搵又找不到洗鞋店，於是飛過去台灣學師，「第一次去了個多禮拜，學習洗鞋加保養，覺得好環保，之後乾脆辭工去學足一個月。點知同朋友傾開佢好有興趣，索性從台灣入機器清潔劑返嚟，成本大約 20萬。」由於他們家在大角嘴，只在附近工廠大廈租了個不足 200呎地方，洗一對波鞋$20起，認真平到爆。他們逢星期六日上門收鞋，星期一至三負責洗，跟住兩日送貨。逢星期六放易拉架和派傳單，由最初每星期幾個客到現在每星期最少三四十對鞋。咁好做為何不辭工創業？原因他們只當興趣，本身份工人工又理想，沒想過辭工發大來搞。
除為興趣， Tony亦希望推動環保，「好多時鞋舊咗就掉好唔環保，其實洗得其所着幾年都可以好新淨。收咁平係想大家覺得抵拎去洗，然後令對鞋的壽命延長。試過有個客拎對鞋畀我哋，話整唔番掉咗佢，我幫佢執過晒變番九成新，佢又拎返去着；有啲客會畀爛鞋我哋回收，咁我洗一洗再放入舊衣回收箱，都有環保作用。家每月賺少少當有零用錢使，雖然未回本，但已經覺得賺咗。」

波鞋徹底清潔至烘乾平均約 2小時，收費$20-$30起。

接收過最爛的皮 Boot，由於手工太複雜最後收$350。

美鞋家： mailto:beautyshoessalon@yahoo.com

阿森

时代变迁