复我汉官威仪

我爱乌龙茶

复我汉官威仪
喺历史传统角度噏下恢复官轿制度真喺当务之急
众所周知，就算我哋中国目前嘅GDP仲未超越日本， GNP净得日本仔嘅二份之一，不过我哋中国依家已经提前成为咗污染超级大国同埋腐败超级大国。每年我哋中国嘅政府官员用阿爷嘅钱嚟定功食餸咁搞笑，加埋出国考察同公车私用上边嘥嘅钱就已经超过咗九千亿元人民币（下同）。其中净係公车私用呢一单嘥嘅钱就有成三千几亿咁多，而且仲係以每年百份之二十嘅速度增长。姑勿论呢种屎忽下嘅腐败，每年嘥咗几多税金，净係喺污染同埋二氧化碳排放呢一点嚟睇就十分犀利，十分之得人惊。
我哋中国啲公车究竟有几多？睇嚟都冇乜人可以准确咁讲出嚟。大大话话最保守嘅估计都有四百几万架以上，呢个仲係二零零四年嘅数据嚟咋。如果按照每年净係递增百份之二十嚟计数，依家都应该翻咗一番啦。呢个仲未曾包括警察同埋城管用嘅车，如果将呢啲都计埋，咁样公用车至少有一千万架至一千九百万架左右。你諗下我哋中国依家啲汽车总数夹夹埋埋都不过得七千二百万架左右，公车居然占咗百份之十三点八至百份之二十六点三，如果通通唔使用呢啲公车，咁样每年汽车嘅二氧化碳排放量同埋尾气排放量咪就可以减少百份之二十左右，买公车同埋汽油费都可以悭返唔少，小数怕长计，咁样就可以有更多嘅钱畀啲政府官员用嚟出国考察同埋定功食餸喇。
之但係要箇啲官员佢哋出门自己行路或者係坐公交车梗唔係咁啱嘅，话晒佢哋都係领导紧又或者係引导紧我哋呢班蚁民，正式係我哋嘅米饭班主嚟。咁样又点至做得到既废咗除公车又唔使啲官员自己行路而搞到威风扫地，又可以实现双赢呢？
嗰个答案就係：恢复番我哋中国自古以来就有嘅官轿制度。
根据我哋中国各个朝代嘅惯例，朝廷通过礼仪同埋制度详细咁规定咗官轿使用嘅原则同埋方法，方便咗官吏嘅办公，同时又维持咗官员嘅威仪同埋明确咗官员嘅等级区别。清朝规定，凡係三品嘅官员，喺京城出门「四人抬」出京「八人抬」，外省嘅督抚坐「八人抬」，督抚嘅部属坐「四人抬」；三品以上嘅钦差大臣，坐「八人抬」等等。明朝嘅相爷张居正省亲时所坐嘅大轿，是特制嘅大轿，要成卅二个轿夫抬扛。大轿嘅前边係会客室，后边嘅係卧室，外边仲有走廊相通。两个细路喺轿上边随时伺候，焚香摇扇。嗰种舒适嘅程度宝马奔驰点可以比得上。我諗如果Wu Gam-Tou又或者温家宝出行係坐呢啲国产大轿，梗係比坐奔驰同埋宝马更加可以彰显大国领袖嘅威仪喇！
我哋中国恢复官轿制度嘅好处多不胜举，喺呢度净係就下边几点重点说明。
一，根治公车腐败，悭返大笔公车使费
冇咗公车，自然就冇咗公车腐败。依家一架公车起码都要成二十万人仔以上，其实买成百几万人仔嘅公车嘅亦係大有人在。假如一架公车要四十几万，咁样就可以请番个年收入二万零嘅轿夫成二十年咁耐，咁仲未算汽车嘅燃油费，路桥费，维护费同埋司机费用。即係话如果将啲汽车换成俩个人抬嘅官轿，净係买车嘅钱就足够维持十年。依家啲汽车，一般用到十年八年都要换新嘅啦。另外我哋要明白坐公车啲官员嘅心理，佢哋之所以曳买好车绝对唔係为咗提高办公效率，而係为咗荣耀，俗俗地讲就係为咗耍下威风咋。照咁样讲起耍起威风嚟，仲有乜嘢比得上高高在上坐住八人抬嘅大轿，前面仲有人举住「XX部长，寂静回避，禁止放屁」嘅牌子，敲锣打鼓，一路行嚟更加威风凛凛，十足嘅架势堂呢？
公车改官轿既满足咗官员耍威风嘅心理，又悭返啲行政开支，真係可谓一石二鸟，利国利民咁话啦。
二，悭返啲汽车燃油消耗，减少尾气排放
依家中国环境污染日益严重，听我喺北京嘅朋友佢哋讲已经成半年冇见过蓝天白云喇。成日都係暗无天日唔知日夜，简直分唔清係晴天仲係阴天。嗰啲空气质量听讲话已经係咁啱人类居住喇。搞到依家咁样，汽车嘅尾气污染自然係首当其冲。之但係随住汽车拥有量嘅上升，污染只会係越嚟越严重。几乎搵唔到解决问题嘅方法。照前面所讲嘅，如果将啲公车改成官轿，咁样就可以减少差唔多百份之二十嘅汽车拥有量。可以大大咁舒缓城市汽车堵塞同埋污染嘅现状。官轿可以讲係纯绿色冇污染嘅交通工具，中国如果係引进咗官轿系统，咁样就可以喺全世界树立起节能减排嘅光辉形象，等啲G 8哑口无言无晒声出，自愧不如，再唔敢对中国嘅嘢噏三噏四阿吱阿咗喇。真係可谓一石三鸟，利国利世咁话啦。
三，取之于民用之于民，带动内需，解决咗大批下岗职工嘅就业问题
有关呢一点喺前面已经提到咗，公车改官轿，梗係要请番大批轿夫。按照一个王八俩人台，俩个王八四人抬嘅原理，每增加一个官员，至少就要解决俩个至四个人嘅就业问题。咁样就可以解决大量嘅失业人口，极大咁舒缓社会嘅矛盾，构建出一个好汉三个帮，一个官员四人抬嘅和谐社会。好处仲唔止咁样，引入官轿体系，仲可以极大咁推动我哋中国嘅官轿民轿产业嘅发展。咁样比起以其嘥咗大笔外汇买进口高级轿车，改为买国产官轿民轿，真係好处多罗罗，可以拉动内需，形成咗一个新兴嘅官轿民轿产业。咁样一嚟就算啲官员喺买官轿嘅时候搞腐败，都係肉烂仲係喺番嗰煲度，可以解决大批工人嘅就业问题。好处仲唔止得咁多，有咗官轿就必须有官道，我嘅设想係将城市啲人行道扩阔，平时人行，官员嚟咗畀官轿行，群众跪侯喺马路两边。咁样兴建官道又需要引进大批建设嘅项目，又可以创造出天文数字嘅GDP嚟。而且人行道扩阔咗，同时都方便咗老百姓嘅出行，真係可谓一石六鸟，利国利民咁话啦。
四，彰显咗官员嘅威仪，提高咗政府官员喺人民群众心目中嘅光辉形象。
唔使讲官轿肯定係最能够体现官员嘅威仪嘅最好法子。坐汽车即使你坐嘅係宝马又好，劳斯莱斯也罢，梗会有啲人对眼生嚟襯鼻又或者係行路唔带眼嘅，不过坐官轿就零舍唔同，俩人抬，定係四人抬，八人抬，官阶地位一目了然。从今之后再冇对眼生嚟襯鼻又或者係行路唔带眼嘅人將佢哋官老爷当做一般嘅群众，仲要啲官员自己讲出：「我係局长，我喺北京嚟嘅，你哋算个屁呀」咁样得人敬畏令人心酸嘅感慨。另外官轿又可以有效咁防止腐败，级别唔够嘅官员，本来净係坐得俩人抬之不过死顶去坐咗八人抬嘅，比本来净係坐得大众之不过死顶去坐咗奔驰要容易畀人认出。另外，官轿亦对一啲中意表现亲民嘅官员提供咗好好嘅舞台。嗰啲官员可以跟住顶官轿一齐行，一路问候跪喺路边嘅百姓。如果啲官员係长期锻炼，身体比较好嘅话，又可以上演一下官员抬轿夫嘅传统桥段。咁样比起依家啲大细官员都坐住宝马一路绝尘呼啸而过，要亲民好多嘅。
五，方便上访群众拦路喊冤，帮人民群众解决实际问题
另外，恢复有几千年传统嘅官轿制度，对弘扬我哋华夏传统文化，复兴中华文明都有非常之不可估量嘅意义。我哋中国自古以嚟，人民受咗冤屈都可以拦路叫冤枉嘅。呢一个传统，唔净止昭雪咗无数冤案，仲造就咗无数青天大老爷添。再睇依家看，冤民有冤无路诉，有苦无处申。告状，连政府嘅大门都入唔到，就被保安踢番出嚟；上访，又会畀驻京办啲人抓打遣返，锁入精神病院。咁样搞简直係太唔和谐喇。解决呢一个问题嘅根本方法，就是恢复官轿制度，畀老百姓以拦路喊冤嘅权利。
其实，恢复官轿制度仲有提高下层劳动人民嘅身体素质，养成老百姓怕官惧官嘅良好习惯等等，真係好处多多不一而足。总而言之，统而言之，恢复官轿制度，係振兴我哋嘅民族文化，根治腐败，改善环境，促进和谐，拉动内需，一石不知鬼咁多鸟嘅利国利民嘅治国良策。
希望中央高层可以尽快采纳并且落实呢一套方案，咁样彻底杜绝公车嘅腐败。
总统他爹评曰：
复我汉官威仪。圈阌。
...... 嗰啲官员可以跟住顶官轿一齐行，一路问候跪喺路边嘅百姓。大笑！按照老广用语，「被人问候」真係一件......，尤其是被佢哋啲「观完」「问候」......再大笑！！刻画狗官形象，入木三吋！！！