廣州嘅「信訪專班」！！

xiss

今日睇南都，發現湖北武漢有個「信訪專班」，專門「伏」喺省委省府省直機關隔離，一旦見到信訪人員，立即啟動演練已久嘅預案，好好「招待」信訪者，「信訪專班」可以話係「維穩」呢啲無恥工作嘅「主力軍」
其實，遠在天邊近在眼前，大家不妨經過省府、市府嘅時候留意一下，就會發現省府市府門口除咗武警站崗之外，重多咗一班差佬喺道巡嚟巡去，佢哋就係我哋廣州本土自產嘅「信訪專班」喇！！專門對付上訪人員㗎，唯一唔同嘅就係，武漢嘅專班著便服，我哋嘅專班著制服，更精神，更威猛，更有阻嚇力！
佢哋分別「伏」喺省府、市府門口。通常嚟講省府門口嘅嗰班會比較忙，畢竟廣東省更大冤情更冤上訪人員更多。市府門口嗰班就通常覺覺豬。市委門口我就冇發現，市委門口清淨好多，得兩個武警棟喺道站崗，冇「信訪專班」。

當然，我哋廣州「信訪專班」乖好多，唔會咬人㗎，只會吠人。唔似啲武漢嗰六隻噉，沖埋去個大官夫人身上亂咬，咬完人就算啦，重要搞到主人宜家周身煩。
我哋廣州嘅「信訪專班」，如果發現有人嚟上訪呢，如果人少，一個兩個，就會直接過去吠走人哋，佢哋唔分男女老幼㗎，人人平等，只要你人少就吠。
如果人多呢，就會先過嚟搵個信訪阿頭出嚟講數，邊氹邊吠，氹人哋走過去位於省府後門嘅信訪辦道坐。因為怕出醜啊，畢竟省政府正門對住東風路條大馬路，車多人旺。
好嘞，如果啲人都重係唔聽呢，就「圍」。「圍」呢樣嘢好有藝術咖，始終堅持狗狗數：信訪人數≥2:1嘅比例嚟「圍」。例如，你有六個人嚟到上訪，就肯定至少有12隻「信訪專班」圍住六個人，如此類推。
噉如果「圍」都唔得呢？都逼唔到你走去後門信訪辦呢？重有一招，就係「逼」：原先圍住信訪人員嘅嗰幾隻「信訪專班」，就會沖入去信訪人群入面，然後每兩隻守住一個信訪人員，做到每位信訪人員旁邊都至少有兩隻「狗」。噉嘅陣勢，通常就好嚇人啦，噉重未夠，「信訪專班」重會專門針對每個人進行施壓，先係吠，跟住你驚嗰時又氹下你。總之就搞到你精神崩潰，唔敢再聚喺省府正門。

噉重有冇比「逼」更厲害嘅招式呢，例如「咬人」呢？噉我就唔知嘞。反正我目前經過省府見過咁多上訪，都尚未發現有更加高級嘅招式。目前嚟講，「圍」同埋「逼」都重係王牌，萬試萬靈！！