廣東話(左丁山)

a_qi

廣東話                                                                                                                                                                                                2010年07月22日                                                                                                                       
                                       

廣東省疑似打壓廣東話一事，按道理好難有效，廣東有幾千萬人，不是少數民族，廣東話好難失傳嘅，況且全國十三億人，凡上過學嘅，都識普通話，廣東話對官方語言─普通話─全無威脅，做乜事要干擾地方語言？中國與印度唔同，印度主要方言Hindi並不全國通用，印度嘅英文報紙係主流報紙，知識分子以英文溝通，情況與中國一啲都唔同。普通話在中國已佔盡上風，官員怕廣東話做乜？
好似係舊年啩，《文匯報》刊登咗一篇長文，細述廣東話之源流，可遠溯至秦始皇強逼六國豪門遷徙嶺南，大批中原人士因此從嶺北流入現今之廣東，到咗魏晉南北朝，外族人士佔領中國北方，再一次引起中原人士大逃亡、流亡，到咗廣東。因古時廣東與湖南有山野阻隔，交通不便，故此北人南遷之後，文化語言自成一國，保留古風，反而北方歷朝不斷有戰亂，有外族入侵，語言不斷變化，與能夠保存原汁原味之古代廣東話越行越遠。高麗人與唐代有戰爭，有文化交流，有派學生留學中國，今天之韓國仍有唐風，睇韓劇，聽一啲韓語，發音有不少與廣東話接近㖭。名家如白先勇有次在嶺南大學講詩，講到唐詩朗誦時，白教授（廣西人，爸爸係白崇禧將軍）就由普通話轉用廣東話誦詩，話更押韻。記得已故羅香林教授曾經考證過，廣東話就是唐朝比較普遍嘅語言，今天之廣東人豈可輕言放棄。
之前介紹過吳瑞卿女士之廣東俗語，商務印書館原來又出版咗一本《英譯廣東口語詞典》，關傑才著，可能幾啱做口語嘅翻譯工作者參考─例如立法會嘅同步翻譯。作者收集咗 2472條廣東口語，加上註解，英語譯音，及英語翻譯，例如第276條「木口木面」，音譯 muk hau muk min，直譯 Wooden mouth and wooden face，意譯 Bewooden-faced， Be wooden-headed， Be slow in reacting，普通話譯：無表情，遲鈍。第1141條「定過抬油」，譯作 Compose oneself， Have the game in one's hands，第1150條「屈質」，譯作 Be confined and limited，睇落幾好玩，啱翻譯人士用。

                                                                                                               

• 
  （左丁山）

嶺南散人

釐清粵語 廣府話 廣州話 廣東話箇概念

所謂粵語 廣府話 廣州話 廣東話 好多人都將渠混爲一談 其實渠之閒箇內涵同外延係有好大箇區別箇 應該嚴格該何釐清

粵語 即華語粵方言 下分廣府片 東莞片 香山片 四邑片 羅廣片 高陽片 吳化片 邕潯片 梧州片 勾漏片 欽廉片等 主要分布向當前箇廣東省 廣西壯族自治區 香港特別行政區 同澳門特別行政區

廣府話 即華語粵方言廣府片 下分廣州話 順德話 南海話等

廣州話 即華語粵方言廣府片廣州話 以城內音爲標準音 此外又有西關音等

所謂廣東話 該箇命題難以成立 因爲粵語係跨行政區劃箇語言 勿係廣東一地專有 任何人都無法子準確畀廣東話一箇準確箇定義 祇係坊閒相互訛傳箇產物 所以一般勿提倡使用