|
鍊乙錚教授久休復出，最近發表長文論及馬英九與蔡英文之「雙英辯」。左丁山曾在本欄寫過，香港後年會唔會出現「雙英辯」呢？一位老愛國朋友對左丁山講：「你咁天真 o架，為咗表示團結穩定，中央只會關愛一隻鷹，另一隻鷹收到明確訊息之後，就會按兵不動，悄然引退嘅嘞，點會有兩隻鷹同時在天空飛翔嘅啫。」畀老愛國一點，有啲醒醒地，佢好可能係啱嘅。點知另一位老愛國 B君有唔同意見， B君話：「咁又未必一定，上次既然有梁家傑出嚟選，二○一二年點知有冇黃毓民、余若薇出來競爭 o架，上次梁家傑都攞到一百二十人提名啦，假設是但一隻鷹大戰余若薇，一個唔覺意，隻鷹遇上意外，讓余若薇選上咗，中央點樣搞至好？由我擺棋嘅話，出動雙鷹可以有保險，保證泛民選不上。」B君真係諗得複雜，我等小民要十分鐘先至消化到。諗得到都燒壞腦，做個天真快活人好過，太複雜嘅佈局唔係自己嗰杯茶，或者要更正一下，唔合「何車」。鍊教授用白話文寫文章，但佢嗰篇大作內有一句：不合「何車」，一位小朋友問左丁山：「河與車有何關係呀，河車係乜意思？」我地現在慣用歐式句子，畀陳雲痛批，寫出一本《中文解毒》暢銷書。對小朋友講：「不合河車即是不是我的一杯茶。」小朋友話：「明白，河車咁深，邊度識呀。」 與好唱粵曲嘅老 Y講起，佢二話不說，寫低一啲音符，以 1234567代表 dor re me fa so la tze do，唱粵曲之 5 so音，寫作「合」，第九個音 r就係尺，加埋就係「合尺」，發音如「何車」，以前三蘇寫「唔啱合尺」，即係話唔啱粵曲音韻，即係大家傾唔埋。現在黃毓民與曾蔭權傾政改方案，就真真正正「唔啱合尺」。老 Y所言，係古老嘅廣府話噃，唔怪得小朋友不明白。老 Y又講起有人為諸葛亮一生寫出上聯：「收二川，排八陣，六出祁山，七擒孟獲，五丈原豎起四十九盞明燈，一生只為酬三顧。」老 Y諗咗好耐，最近睇完補選有感而發，寫出下聯，請各方友好斧正。下聯云：「媚北美，買西歐，東謀寶島，南控特區，內外境難容左中右方異見，上國從稱實下邦。」 | 
發表於 2010-5-20 13:09:45
發表於 2010-5-20 16:48:10
