振家聲

外外星人

嗱，解下話先，振係振興嘅振，家咪屋企囉，聲唔係韽聲細氣，而係聲大夾惡、聲大夾口臭、聲大夾冇準，而呢度想講嘅係好聲好氣：

 

假若，有人喺屋企嘈之巴閉，拆天噉聲，我嫲嫲聽到就會扽返句「振家聲」。嫲嫲為人腍善，一世講好話，唔鬧人嘅，睇到啲唔好嘅嘢，都會用好話嚟和返，用而家嘅話嚟講，即係諧和噉解。嫲嫲教我哋，家和萬事興，家衰口不停，唔鍾意我哋嗌 ，屋企人嘛，唔啱傾到啱啫。

 

之但係，世界路不平，任你左棹右棹，就算你唔踩人，人哋都會踩親你。隔籬左右，樓上樓下，唔多唔少都會有啲人條氣唔順嘅，於是乎，嘈到拆天噉嘅「振家聲」好自然就瓹入你嘅耳窿，呢個時候，你重有冇心情講「振家聲」呢？你唯有扽氣話：震家聲！——真係震到耳膜都穿咖！