強烈抗議中國建設銀行廣州分行吉祥路支行歧視粵語！！

xiss

今日去銀行匯款，首先係去建行嘅廣州分行吉祥路支行，入面嘅經歷真係令我火滾。

首先，入到去一片混亂，我就問個前臺有關匯款嘅嘢，佢帶咗我過去取号机道，攞咗個「對公業務」嘅號碼——A0XX

我就坐埋一邊等，此時就聽住一個個號叫過去嘞，但係，我就發現來來去去叫號嘅語言都係普通話+英文！！我記得，以前我哋去銀行排隊，聽到嘅叫號都係：

普通話：請XXXX號，到Y號窗口
粵語：請XXXX號，到Y號窗口

但係今次，我就只係聽到：

普通話：請XXXX號，到Y號窗口
英語：The No.XXXX,please..............

粵語呢？？



呢樣嘢就算嘞，或者銀行換咗錄音，新版本錄音已經唔再用粵語啦。
更火滾嘅喺後面：

我見來來去去都係叫00XX號，V0XX號，G0XX號，完全冇叫到A0XX號，我就好似戇居居坐住喺道畀人「遺棄」一樣，咪走過去問啲服務員囉（此時我已經略帶火氣），冚家鏟佢居然噉樣同我講嘢：

我：Er，唔該，我想問問。。。（畀佢打斷）
服務員：什麽？先生，你說？
我：我話，點解我呢個號好似冇人叫嘅，我見都冇叫過A字頭嘅號嘅？
服務員：先生？你說什麽我聽不懂，請你說普通話好嗎？這裡是銀行！！


死你就去啦，咩意思啊？銀行就唔應該講粵語啊？宜家粵語影衰你銀行啊？？服侍我哋粵語客人好難為你啊？？

你係喺廣州開銀行咖，居然夠膽死「命令」我廣州人嚟你銀行唔準講粵語？？你宜家真係當你銀行大曬啊？

我已經有啲嬲嘞，跟住佢叫我繼續等，就喺五號窗口辦理，我咪唯有繼續乾等囉，好嘞，我見又等咗咁耐（已經過咗差唔多一個鐘喇），咪徑直走過去五號窗臺囉，問下點解重未叫A號，死得佢啊，佢居然同我講唔係呢個窗口辦理。

我火滾嘞，宜家玩我啊？？我即刻走過去搵啱先嗰個服務員啦，居然唔見咗喔。
好，我見隔離有個男嘅，過去問佢

我：唔該，究竟么嘢回事，點解呢個號等咁耐都未有人叫嘅？
（此時，佢正喺道賣力向一名講普通話嘅VIP推銷投資業務）
我打斷佢，誒，唔該。。。。
男服務員：什麽？
我：唔該。。
男服務員：說普通話好嗎？

（忍氣吞聲）我：請問，到底什麽事啊？我這個號怎麼那麼久都沒人叫呢？你們剛才說是在五號窗口辦理的，但剛才五號窗又說不是他辦理，到底是怎麼搞的啊？
（佢睇睇我張號碼紙）
男服務員：是誰叫你去五號窗嗎？
我：你們剛才有個女的。。。（佢打斷我）
男服務員：那你應該去找她問去啊！！


我踢爆你春袋吖喇，宜家又歧視我粵語又怠慢我，即係當我係二等公民啊？啲講普通話嘅「貴客」你先想服侍啊？？

士可殺，不可辱

「癡線咖，都唔係開銀行嘅！」

我當場拂袖而去，唔想再留喺呢間銀行「受辱」


後來我去咗附近嘅「建行 廣州地鐵支行」（北京路兒童書店隔離嗰間），入到去，總算有兩個服務員走過嚟用粵語招呼我，聽呢道嘅叫號錄音，總算有返粵語：

普通話：請XXXX號，到Y號窗口
粵語：請XXXX號，到Y號窗口


對比之下，諗返起之前嗰間吉祥路支行，真係越諗越火滾！！
叫號錄音冇粵語，服務員態度傲慢，重要死到赤裸裸噉歧視粵語，激動起上嚟，真係想一把火燒鳩咗間吉祥路支行去啊！！

各位廣州人，認住啊，係

中國建設銀行廣州分行吉祥路支行

以後去呢間銀行嗰時小心啊，呢間噉嘅「豬行」啲服務員「狗眼看『粵人』低」咖！！

[ 本帖最後由 xiss 於 2010-2-2 13:17 編輯 ]

雨夜街燈

真係同人唔同命,同遮唔同柄.
你又有銀匯比人,我就日日等人匯比我

xiss

原帖由 雨夜街燈 於 2010-2-2 16:05 發表 真係同人唔同命,同遮唔同柄.你又有銀匯比人,我就日日等人匯比我

哇，日日等錢匯，咪即係日日有錢收？

噉睇嚟你條命又真係幾好喔。。。