「肥彭」开blog啦！大家过去「踢馆」啦！

使君子

原来阿 彭彭 开左 个几月 blog咯喔：

http://pengpeng001.blog.tvscn.com/blog/BlogTopic/261200.htm

我是彭彭2009-11-05 22:59:20

   我是彭彭。一个随和得来有D嚣张，暗串得来有D歪理，肥得来依然有小许灵活嘅人！

   我读得书少，所以真系多谢有好多人俾机会我！或者呢D就系老马讲嘅「知道」份子而唔系知识份子呱。

    今日系我喺哩个网络ID开通嘅第一日。哩篇亦都系我哩个博客第一篇所谓「博文」。网络公司嘅靓仔同我老顶LULU都话要介绍下我自己。其实有睇我节目嘅老友都已经知道我系个咩人。因为我从来都系台上台下一鬼样。当然有样嘢系唔同嘅！喺电视上面无讲粗口！

    我是一个几勤力做嘢得来，又无记性嘅懒人。勤力，系因为我从来未试过斋做一份工。无记性加上懒，所以我极少讲大话。原因好简单，唔系因为我几正直。系皆因我无记性！如果今次讲个大话，你下次再问我，我一定唔记得上次点样答你嘅，所以坚决唔讲好过！而懒惰就懒到唔会掩饰自己。我唔介意喺大家嘅印象里面，有小小无赖嘅成分。如果有日，你喺条快车道开住30公里，突然有部车超上来，喺个窗口度递只中指出来问候你，嗰条友好有可能系我！

    如果真系要我作自我介绍，以下就系我喺南方台作自我介绍时候嘅全文：「食烟唔饮酒，唔赌钱讲粗口。我是彭彭」。

使君子

http://pengpeng001.blog.tvscn.com/blog/BlogTopic/263441.htm

猎人?猎物?2009-11-21 03:33:00

    见到好多老友都中意走去D夜店耍乐。唔知系我老饼抑或个人兴趣问题？我就一D兴趣都无。有次更硬去咗间吧坐下。见到D人叫咗几支红酒同支洋酒。搵D红酒来猜枚。哎！俾D法国佬见到，笑死佢地。

    彭彭偶尔饮杯红酒，都系同老马倾计嘅时候，两条麻甩佬口痕痕，饮杯红酒当嗒糖。见到D所谓推销姐姐，三唔识七就撞入来，打个招呼就话要敬酒，然后话知你感受，一嘢就GOOD咗几杯。即时鹩哥！唔够半粒钟就搞低几只红酒。然后将支好地地嘅洋酒拿啲唔知乜鬼嘢沟到鬼五马六。坐咗唔够45分钟我对耳已经顶唔顺！唔系D声浪大细嘅问题，系D音响恶劣到晕低！

    准备走人，点知D傻佬话，等阵D舞蹈艺员过来一起饮酒吖，咪走住啦！我透过闪到眼花嘅灯光望过去，几个比我更加其貌不扬、体态不良嘅妹妹，揽住碌棍扮跳舞。我无讲错，系扮！光管舞我N年前就喺拉斯维加斯欣赏过，真系好正！我系讲紧欣赏！绝对唔系咁鬼核突嘅！原本打算坐够一个钟先走啦，知道嗰几个靓女即将要入来，嗱嗱临走死罢就！

    临走我掟低句：「D麻甩佬以为自己系猎人，其实系猎物！D靓女系最醒嘅猎人，所以喺度扮猎物！」