想問下幾個字

豬豬奶茶

睇報紙有講一堆粵語字,攞嚟同粵協個字典比較一下,好多都共識,不過有幾個字粵協冇作解(冇佢解出嚟嘅嗰種解釋),有啲直頭連讀音都似乎唔係嗰回事,所以問一問,解解惑!! 勼:"居"音,意思:無聊;例如:戇勼勼.我查過好似冇"居"音,響粵協查"戇"字有"戇居仔"呢個詞例,噉"勼"其實有冇此解? 拗:佢話有"抓"嘅意思,即係話"抓癢"就係"拗痕",我之前睇過星爺某齣戲,字幕度係打出一個同"搲"字好似嘅字,右下部唔係"瓜",係"爪",當時星爺就係講緊"拗痕",字幕就打出"嗰個字+痕"(個字實在打唔出),"拗痕"其實係邊個"拗"? 呢:解"這","呢度"="這裏". 我平時習慣都好似佢講嘅噉用,不過諗諗下唔多對路,係就係有ni1音,不過其實係咪噉解咖? 籴:讀dsek3,意思係"買米",即係"籴米",睇個字嘅結構似係,不過其實又係咪呢? 嘜:佢話係"打開"嘅意思喎,例詞"嘜大個口得個窿",其實我覺得有啲好笑,係咪眞咖? 哩:話同"呢"一樣噉用 豚:"盡頭"嘅意思,例詞"順住呢條路一直行到豚",呢個唔係"海豚"個"豚"咩? 淠:呢個最迷惑,佢話讀psek4,解"堆",例詞"一淠屎",個psek4字困繞我多年,一直用"一pat嘢"嚟代替,如果呢個字眞係呢個意思,又眞係解咗我多年嘅迷惑喎 最後一個字係我私人問,關於個"啫"字,我平講口語講嘢都會講"啫係點啫",所以我打字都不自覺打咗"啫係",其實"啫係"通唔通"即係" 問完嘞,有啲長,望見諒,多謝耐心解答,多謝!!

余OK

籴字嘅繁體係：糴，我細時候聽啲大人經常講“去糧站糴米”。。。

豬豬奶茶

多謝,又解一字,我銘記心中

dada

gau1係男性性器官﹐戇居居比較文雅。 we2係搲﹕搲痕。抓癢有另一個講法﹕ngaau1痕。呢個ngaau1﹐《廣州話方言詞典》寫「𢯎」（扌肴）﹐可惜我喺漢語字典搵唔到呢個字。最簡單嘅係《粵語審音配詞字庫》﹐話「抓」由zaau2異讀為aau1﹔不過我認為應該係ngaau1﹐因為我哋講ngeo1。 擘mak3大個口。《說文》﹕「撝（分裂）也。」《段注》﹕「今俗語謂裂之曰擘開。」 「豚」﹐劉天賜喺《妙趣廣州話》話讀「篤」﹐臀部﹐引申為器物底部同埋盡頭。 一paat6泥湴﹐《廣州話方言詞典》寫「坺」。墢或坺﹐耕起土也。即係一堆嘅意思﹐比「淠」有意思。 「啫」﹐我諗係「即係點啫」。 我都係跟廣州人寫「呢」﹐不過我講「啲」﹐例如「啲個人」。

Anl

豬豬奶茶在2005-08-13 21:09:18說道：[br] 勼:"居"音,意思:無聊;例如:戇勼勼.我查過好似冇"居"音,響粵協查"戇"字有"戇居仔"呢個詞例,噉"勼"其實有冇此解? 拗:佢話有"抓"嘅意思,即係話"抓癢"就係"拗痕",我之前睇過星爺某齣戲,字幕度係打出一個同"搲"字好似嘅字,右下部唔係"瓜",係"爪",當時星爺就係講緊"拗痕",字幕就打出"嗰個字+痕"(個字實在打唔出),"拗痕"其實係邊個"拗"? 呢:解"這","呢度"="這裏". 我平時習慣都好似佢講嘅噉用,不過諗諗下唔多對路,係就係有ni1音,不過其實係咪噉解咖? 籴:讀dsek3,意思係"買米",即係"籴米",睇個字嘅結構似係,不過其實又係咪呢? 嘜:佢話係"打開"嘅意思喎,例詞"嘜大個口得個窿",其實我覺得有啲好笑,係咪眞咖? 哩:話同"呢"一樣噉用 豚:"盡頭"嘅意思,例詞"順住呢條路一直行到豚",呢個唔係"海豚"個"豚"咩? 淠:呢個最迷惑,佢話讀psek4,解"堆",例詞"一淠屎",個psek4字困繞我多年,一直用"一pat嘢"嚟代替,如果呢個字眞係呢個意思,又眞係解咗我多年嘅迷惑喎 最後一個字係我私人問,關於個"啫"字,我平講口語講嘢都會講"啫係點啫",所以我打字都不自覺打咗"啫係",其實"啫係"通唔通"即係"!!

等我逐一同你解答： 如果你想寫戇gau1，個字係“㞗”(尸求)[求字在尸字下方] “戆居”我堅持係噉寫。 ngaau1痕，正寫“𢯎”痕，(扌肴)痕。 搲(下面個係瓜)，讀waa2，圖畫個“畫”音。 搲(下面個係爪)，讀we2，we2爛塊面。 “呢”字，係有ni1音，又有nei1音，可以將“呢度”讀成“ni1度”又得，讀成“nei1度”又得。不過唔可以係 l 聲母起音，唔可以讀 li1度、lei1度，因爲噉讀法就係懶音。 “哩”代替“呢”，純粹係懶音，唔可以用“哩”代替。 "籴米"，傳統字寫法係“糴米”，“籴”祇係簡化咗。 "嘜大個口得個窿",唔係用呢個“嘜”，呢個“嘜”係讀mak7，認住呢個嘜頭，米缸入便有個嘜。就係用“嘜”。“擘大個口得個竉”應該噉寫。 豚係“海豚”個“豚”，同時亦係“打爛沙盆璺到豚”嘅寫法。 “一坺屎”係噉寫先啱，先糾正你讀音，唔係pet9，係paat9。 "淠"字係讀"屁"音. “即係咩啫”，好多人講成“啫係咩啫”，不無道理。呢個要從讀音規律講起。 e 與 i 發音有相關互轉關係。“即”zik7，或者有讀成zek7嘅時候，所以“即係咩啫”嘅讀法就會變成“啫係咩啫”，呢個唔算係錯讀問題。 同樣例子有“靈魂、求籤好靈”“精(zing1)神、精(zeng1)叻”“青(cing1)草、青(ceng1)綠”“無錫(sik9)市、錫(sek9)金”“名(ming4)人、出名(meng4-2)”。

豬豬奶茶

多謝,好詳細,基本明白曬嘞

itxu2k

"坺"广州音应该读[paat6],不过肇庆唔少人读[pek3],虽然肇庆人唔分[pek3]/[pek6],不过我觉得[pek]呢个音重系有嘅 btw,錫(sik9)市、錫(sek9)金 --> 应该系 錫(sik3)市、錫(sek3)金

Anl

錯就要認，打就要企定。 itxu2k講得啱，我寫錯音標。 無錫(sik8)市，錫(sek8)金。我個人重係習慣用9聲標音。

highyun

itxu2k在2005-08-16 22:57:12說道：[br]"坺"广州音应该读[paat6],不过肇庆唔少人读[pek3],虽然肇庆人唔分[pek3]/[pek6],不过我觉得[pek]呢个音重系有嘅 btw,錫(sik9)市、錫(sek9)金 --> 应该系 錫(sik3)市、錫(sek3)金

我平时都系讲pet3

kitata

勼=音嗎？ em13: 真係好想知道我地粵語既粗口字係邊ｄ人所創造？

dada

「勼﹐聚也。从勹九聲。讀若鳩。」 呢個「勹」係「包」嘅古字﹐所以有聚嘅意思。所以「戇勼勼」冇乜意思。

豬豬奶茶

按霑叔講法,應該係『鳩』嘅,源於斑鳩一雀,形象詞,粵協個字典都係解釋『戇鳩』,我諗(我諗啫,我冇根據)『賓周』可能同斑鳩有關系,因為個音好似有啲似

highyun

豬豬奶茶在2005-08-18 18:36:51說道：[br]按霑叔講法,應該係『鳩』嘅,源於斑鳩一雀,形象詞,粵協個字典都係解釋『戇鳩』,我諗(我諗啫,我冇根據)『賓周』可能同斑鳩有關系,因為個音好似有啲似

似普通話讀音多啲