【原创】《荒诞都市》系列——夜茶奇遇记（粤语版）

gzshuzha

【原创】《荒诞都市》系列——夜茶奇遇记（粤语版）
（作者：阿展）

（本系列故事纯属虚构，如有雷同，实属不幸。）

   夜茶难做，唔代表冷清，撞啱假日，搭台好平常。不过遇啱有鬼佬搭台，都系第一次。
  「这里有人吗？」普通话，靓声，我放低报纸，见到靓女同埋个鬼佬企系度。「没人，你随便。」我答番普通话。
   靓女好识叹，叫咗10蚊位陈年普洱功夫茶，开咗卡就自己行去捧嚟一托盘点心，虾饺；干蒸烧卖；凤爪；排骨；金钱肚。然后用英文同普通话交替同鬼佬实行美食教育。鬼佬唔系好开胃，好留心听，一轮冲锋，扫清晒，靓女好似未够喉，揸张卡又行咗去。
   「个靓女都几擦得啵！」旁边个服务员有啲惊奇咁话。
   「佢话好肚饿。」我正想答话，个鬼佬突然开声，纯正广州话。唔系啩，鬼佬讲白话？！
   「你识广州话？」我好奇问。
   「我响香港出世嘎。」
   「咁你点识佢嘎？」
   「唔识嘎，佢话我请佢饮茶，佢就教我普通话。饮茶好闲嗟。」哦！唔怪得啦。
   靓女返嚟，又一托盘嘢，叉烧包；小笼包；金沙包。唔讲得笑，真系好识叹，第一轮，贵夹唔饱，有骨落地，第二轮先系顶肚嘢。跟住又系英文，普通话，普通话，英文...
   无谓做电灯胆，阻人撑抬脚，我叫咗埋单。
   「我叫埋单咋啵？」有个服务员行埋嚟，佢个托盘只碟有两只蒸熟嘅大闸蟹，我以为佢搞错。
   「是我点的！」靓女抢住话。我都话佢好识叹嘎啦！
   「Bey,Bey,Bon Appétit !」埋咗单，我对鬼佬讲。
   「拜拜，慢慢行！」鬼佬话。
   我睇见靓女有啲愕然，可能佢发现有人识英文，可能佢发现鬼佬扮猪食老虎，其实识中文，又可能佢净系听唔明乜嘢系「慢慢行」。

普君南拆遷居民

「唔识嘎，佢话我请佢饮茶，佢就教我普通话。饮茶好闲嗟。」

 

條女係咪想釣個鬼佬做夫君？定係想用撈思維毒害外國友人？