【原创】《荒诞都市》系列——揾位记（粤语版）

gzshuzha

【原创】《荒诞都市》系列——揾位记（粤语版）
（作者：阿展）

（本系列故事纯属虚构，如有雷同，实属不幸。）

   「细台都冇，点做生意嘎？！」二叔约咗老友饮早茶。撞啱国庆，去到茶楼先知要搭台，就对咨客小姐呻咗两句。
    饮茶傾偈，搭台始终唔系咁方便。入去兜咗一圈，二叔睇啱一张细台，有个四眼佬睇紧报纸，开咗一位茶。
   「呢度冇人吖嘛，四哥？」二叔问。「你咪坐囖。」四哥挂住睇报，并冇留意来者何人。
    叫咗开茶，二叔点着支烟，好辣嗰只。「呼」一声，喷咗过四哥张报纸度。
   「你啲烟好啃啵！」四哥放低张报纸。
   「系呀，我屋企唔使点蚊香嘎。」二叔答。
   「唔食得唔得呀，我唔受得啵。」四哥语带不满。
   「得，得，得。」食得唔好嘥，二叔连啜几啖，点知一啖浓痰上颈。「咳，吐。」浓痰应声落地。
    四哥醒目，双脚一缩，再低头睇真啲，好彩双脚冇中招。正想闹二叔咁唔讲卫生，点知抬头一睇台面，几乎作呕...
    唔系啩，咁都得？！原来二叔剥咗口中棚假牙，放响个茶杯入面卒紧。
    「部长，埋单，埋单！」四哥企咗起身。
    「埋单？四哥，你仲未食嘢啵。」二叔提醒佢。
    「好在未食咋，唔系实呕晒出嚟，我怕咗你先怕米贵呀。」四哥呢头埋单，二叔嗰头攞个电话出嚟。
    「仲未起身呀？啱啱揾咗张细台，够晒静局嘎...」

普君南拆遷居民

好核突，好彩早餐已經落咗隔。

gboss

原帖由 gzshuzha 於 2008-10-6 01:16 發表 【原创】《荒诞都市》系列——揾位记（粤语版）（作者：阿展）（本系列故事纯属虚构，如有雷同，实属不幸。）   「细台都冇，点做生意嘎？！」二叔约咗老友饮早茶。撞啱国庆，去到茶楼先知要搭台，就对咨客小姐呻咗两句。  & ...

 

洗假牙嗰幕使我諗起多年前嘅「反斗神鹰 2」，里面嗰个美国总统吐咗棚假牙落去日本首相个杯度。

外外星人

原帖由 普君南拆遷居民 於 2008-10-6 09:33 發表 好核突，好彩早餐已經落咗隔。

 

胸膈、横膈膜。