|
我都隔咗成年冇寫過呢個topic咯，今日見有兩位仁兄開波續寫，又激發咗我嘅熱情，抽起條筋今年再玩埋一份，所以話齊齊參與先興致高。本嚟舊年年底定今年年頭有次喺Q群傾起偈，大家就想話寫落去，事關已經有唔少素材可寫。當是時唔知點傾起銀行啲嘢，記得馬生講咗個詞「運鈔車」，當堂畀我窒佢話呢個講法唔係咁啱本地人嘴形，重舉咗1994年過冬日番禺發生嗰單千五萬銀行劫案做例子，十幾年前我淨係聽到個個人都講「解款車」，有時報紙都會噉寫，當然書面語好多時先係「運鈔車」。
「款」有錢嘅意思，譬如「款項」、「現款」、「存款」等，呢個易理解。噉何以廣東人稱裝運押送銀紙嘅車為「解款車」呢？千祈唔好當呢個「解」係已經被赤化咗嘅「解放」嘅音同義去理解，又唔好讀成姓氏嘅「解haai6」。呢度嘅「解」係讀作gaai3，平時講「押解犯人」都係同一用法。竊以為喺處理銀紙運送過程中，「解」嘅含義準確過「運」，一般嘅「運」唔使提防深嚴，但係運銀紙咁牙煙嘅事，點止「運」咁簡單，直頭要攞條命仔嚟看實。
「解」讀作gaai3重有解散嘅意思，如果有聽過國寶級粵語講古大師李我先生嘅訪談節目，有個細節唔知各位有冇留意到呢？佢話細個七歲卜卜齋入學係要等到上學期「解館」之後先至「開冬學」，「解館」就應該相當於現時學校嘅「放寒假」嘞。
有好多廣東講法祇要稍為深究一下，就會發現內裏蘊含嘅好多文化元素，並唔係北人所講嘅難登大雅之堂。記住話畀啲細路聽，銀行門口揸住支槍啲經警叔叔隔籬嗰部係「解款車」喇。
| 
發表於 2008-7-4 16:38:31
發表於 2008-7-4 19:45:55
