《撥亂反正》之二十九：溫習、溫書 Vs 復習

highyun

　　「今晚去睇戲咯。」「唔得啊，今晚要復習高數，聽朝要考試。」——喺中山大學嘅校園發生以上對話，係平常不過嘅事，不過如果去到中文大學，呢段對話就會畀人覺得怪雞喇。怪雞並唔單單在於「高數」呢個國內慣用嘅名詞縮寫，更主要係在於「復習」呢個詞。
　　自古以嚟，「溫故而知新」，廣東人講「溫習」正常不過，可惜世易時移，「復習」被奉為正室，而「溫習」被視為模仿香港。家陣啲學生，一講到今晚要「復習」高數，就諗到高數有幾咁「複雜」，即時意興闌珊。上至國家大事，下至蒜皮小事，一律簡單問題「復習」化，乃崛起之國國人嘅強項。
　　「溫習」有個近義詞「溫書」，注意，係近義詞，唔係同義詞，事關兩者用法有別。由於唔少人「復習」「復」到「瘟」頭「瘟」腦，所以有必要提提：「溫書」專指重溫書本內容以應付考試，而「溫習」範圍大好多，既包含「溫書」，亦可指重溫以前學過嘅內容，唔一定係為應付考試。例如：「上次講過懶音n、ng唔分嘅情況，而家再同大家溫習一下」。

外外星人

复习，反复练习，运动员都可以反复练习某个特定动作。温对书、对知识比较贴切。