论坛一旧砖——飞鸟有感

飛鳥

　　未入论坛之前，虽然平时都系用惯粤语，但接受普通话教育十几年，已经成为被普通话同化嘅广大粤人之一，普通话嘅使用程度可以达到，行出街连广州人都以为我系北方人。上咗论坛后，发现原来自己最早用紧嘅语言有如此深嘅历史同文化价值，不禁以操粤语为荣，为粤语及粤文化所处的水深火热感到焦急。
　　自从２００７年九月注册以嚟，虽然发帖甚少，不过关注未曾间断，甚至系论坛重开之前个段日子，都颇为留意。「文化」与本人兴趣及将来嘅发展方向有一定相关（老实讲，我觉得对论坛嘅所有成员都甚有关联）。我深知论坛嘅元老们经过辛苦耕耘先至有论坛今日嘅境况，非常敬佩。由于咁啱处于人生嘅转折点，转到晕陀陀，以至于家阵先可以镇定咁思考吓，我可以为粤文化做啲乜嘢。
　　通过呢牌系论坛上嘅观察，我想总结几点发现，企系一个论坛成员嘅角度提出一啲建议，不恰当之处请各位朋友指点同包涵。

[ 本帖最後由 飛鳥 於 2008-6-19 19:46 編輯 ]

飛鳥

１、我重未可以明确咁了解到粤语论坛嘅宗旨（又或者目的？发展方向？）系乜，我认为呢样嘢其实系好重要。从论坛嘅版块同主要内容嚟睇，论坛主要嘅发展目标系办最大嘅粤语网站，推广粤语，振兴南粤文化，并「兼容并包」搜纳多种语言。但系何为之「最大」？空间最大？人数最多？定系内容最丰富？我觉得，第一次上论坛嘅人好少何会将每个版都睇一次，而点样既快又明确咁表达到我哋嘅意愿同埋我哋最突出嘅地方，嚟吸引同我哋有共鸣嘅人，去达到推广嘅目的？抑或粤协希望我哋呢班热心人士为粤协做啲乜？

我谂论坛需要比较明确嘅导向（版块导向以及目标导向）。

[ 本帖最後由 飛鳥 於 2008-6-19 19:56 編輯 ]

飛鳥

２、「粤语书院」里面有好多珍贵嘅资料（粤语发音、字形、词组、造句、谚语等，纠正咗好多平日容易读错用错嘅地方，分得非常之详细，系保护、振兴粤语方面办得好出色。不过资料更新就似乎跟唔上论坛人流量，白白浪费嘅流量系咪造成「推广」力度降低，甚至会损失原有流量呢？
　「南粤文化」所介绍嘅内容大至全国性嘅论述文章，小至一个地方人物、地方风俗，每一篇文章其实都系好精彩，之不过整体显得杂乱咗小小，查找起嚟就好嘥时间。从版内文章嘅内容嚟睇，涉及历史渊源、饮食文化、风俗人情、建筑文化、历史人物、语言文化、地域文化等等，系咪需要归类同整理吓呢？可以适当划分成几个版块。我认为文化系语言嘅基础、背景，但系论坛上嘅「岭南文化馆」显得稍微薄弱，亦都系我觉得需要划分嘅原因。
　「外语及子方言区」嘅「子方言」系咪都属于岭南文化嘅一部分呢？

飛鳥

３、论坛注册会员共9791人，发帖会员占36.42%，从2004.9.14日至今，减去论坛停开嘅两个月，一共运行1310天，论坛总共有23个版，总主题数9965篇，总帖数85633篇（数据截止至2008.6.19日14:04分），可以计算到每日大概有新主题7.6篇，新帖65篇，亦即系每个版每日唔够0.4个主题更新，大约有3篇新帖。

但系呢个结果系唔准确嘅，因为从2006年10月开始，发帖数骤增，版数亦都增加咗，同现状比较相似，所以应该从2006.10个时开始计算，约950日，总帖数约63190篇，按照每个主题平均被回复8次计算，总主题数大约不多于7888篇，由此计得，每日新主题数8.3篇，新帖66篇。睇得出注册人数虽然从2007.6.6日嘅5000人到今日9799人，增加咗4799人，翻咗快一倍，不过发帖数就增加得个一张帖。
  说明以下几个问题：1）发帖嘅一部分人上论坛吹水，一部分人吵交，只有少数一部分系发有用帖，可能系少数嘅积极份子。2）唔发帖嘅一部分人系摞料，一部分人嚟睇热闹或者摞完料就走人。而每日嘅帖比较集中系初级书院、休闲娱乐同南粤文化，说明大部分人比较中意轻松同有嘢讲嘅话题，我哋好难左右到人哋嘅谂法，控制到佢哋系边度发帖或者发唔发帖，亦都好难要求大多数成员都有咁严谨嘅语言修养习惯，去睇得明咁多比较生僻嘅字词。
　所以我认为，可以适当增加啲可能会受到广大欢迎嘅版块，例如饮食、旅游、贴图、时尚、情感、体育等等可以众口纷纭嘅版块。其实通过粤语去表达，都可以属于粤文化嘅一种形式，亦可以令「粤语书院」里面学嘅嘢有机会用到，文化唔系过去嘅嘢，佢就系我哋嘅生活，而且每日都同我哋一齐向前发展紧，我谂呢层各位版主、管理员同热心粤协发展嘅人士会比我更清楚。

[ 本帖最後由 飛鳥 於 2008-6-19 20:12 編輯 ]

飛鳥

　本人蒲论坛嘅时间唔多，蒲过嘅论坛亦唔多，但系持着对文化嘅热情，希望结识到志同道合嘅朋友，将我所知道有价值嘅嘢带畀大家，我亦都觉得论坛上面嘅好多人都系想为粤文化出一分力嘅，通过论坛我哋唔单止将好嘢带畀人，重可以从中得到唔少好嘢。之不过每个人嘅做事方式唔同，就好似我哋唔buy普通话成为统一嘅语言。
　To be yourself and make others be themselves.

 

 

[ 本帖最後由 飛鳥 於 2008-6-19 20:15 編輯 ]

外外星人

回楼主，我发觉你写得好好，好有心得。建议亦好，意见亦好，都值得大家去思考...

论坛目前畀人感觉系，人气尚可，而发言者不足；重有就系，关键系缺少资金及人才。好似楼主如此热心但时间无多嘅人唔少，事关呢度唔可以爱嚟搵食——搵食就请行远啲 ！每个会员都系满怀热血、热情上嚟学习、传播自己嘅母语，但难以持久，至于原因何在？出路何在？我相信，粤协嘅管理员——亦即系创办人，畀你我更在意、更心悒。若果有更多好似楼主咁嘅才（能力）情（热心）兼备嘅会员，同时又具有为光大发扬粤语文化嘅付出精神共能力嘅话，何愁论坛唔兴旺、冇人气呢？

讲到尾，都系嗰句：钱、钱、钱，人、人、人——钱财，人材不可或缺。

 

*楼主系人才之一，请管理员垂注！

余OK

　　繼大師泰戈爾後，中國版嘅《飛鳥集》就此誕生。肺腑之言，定當借鑒。

飛鳥

承蒙各位关注同支持！条路重好长，或者一啲都唔明朗，所以鄙人尽我微薄绵力，同各位有志之士一齐探索，我谂会有成绩嘅。一种方法唔得就试过第二种，多啲人多种风格，总有一种系适合嘅。

[ 本帖最後由 飛鳥 於 2008-6-20 01:13 編輯 ]

gboss

某同学同我讲，佢喺天河返工，已经习惯讲普通话了，只有同返我哋呢啲老同学先会讲返粤语。

我都觉得，呢几年我都讲得太多普通话，唯有喺呢类论坛先有啲机会畅所欲言，不过指头功夫已经比口头更犀利，但局限于打字，写字都冇咩机会了……

外外星人

原帖由 gboss 於 2008-8-11 10:43 發表 某同学同我讲，佢喺天河返工，已经习惯讲普通话了，只有同返我哋呢啲老同学先会讲返粤语。我都觉得，呢几年我都讲得太多普通话，唯有喺呢类论坛先有啲机会畅所欲言，不过指头功夫已经比口头更犀利，但局限于打字，写字都冇咩机会了… ...

 

呢笪碇，系沦陷区。

xiss

樓主嘅發言的確值得深思，我亦都發現粵協嘅性質開始有尐模糊化嘅跡象。以前我最初嚟到粵協（閉譠風波之前），覺得粵協人才濟濟，好多同粵語有關嘅問題都可以喺問到，甚至將粵協指望為粵語喺網絡上同北方惡意者「作戰」嘅後方基地。但係隨住時間推移，逐漸發覺粵協喺學術性上面嘅不足，以及「戰鬥力」嘅退化。例如發一個問正字或正音嘅帖，雖然會有人回答，亦都有好多人參與討論，但係弊在「議而不決」，大多數參與討論嘅人都只係想sell自己嘅睇法，甚少注意同其他討論者交流意見，最終導致討論曠日持久，但結果就未見有。
我覺得之所以存在呢種情況，就係粵協普遍存在一種藐視權威理論，藐視粵語專業界嘅研究成果嘅情緒。逐漸，粵協缺乏咗必要嘅「專業性」「學術性」，逐漸變成咗一個講粵語嘅人上嚟發洩個人情緒，或者推廣自己未必成熟嘅「個人研究理論」嘅平臺。亦都因此，粵協變得越嚟越冇特色以及越嚟越「雜」。

外外星人

原帖由 xiss 於 2008-8-11 11:05 發表 樓主嘅發言的確值得深思，我亦都發現粵協嘅性質開始有尐模糊化嘅跡象。以前我最初嚟到粵協（閉譠風波之前），覺得粵協人才濟濟，好多同粵語有關嘅問題都可以喺問到，甚至將粵協指望為粵語喺網絡上同北方惡意者「作戰」嘅後方基地。但係隨住時間推移，逐漸發覺粵協喺學術性上面嘅不足，以及「戰鬥力」嘅退化。例如發一個問正字或正音嘅帖，雖然會有人回答，亦都有好多人參與討論，但係弊在「議而不決」，大多數參與討論嘅人都只係想sell自己嘅睇法，甚少注意同其他討論者交流意見，最終導致討論曠日持久，但結果就未見有。

 

呢个问题我试下答你，睇下系咪噉：

大部分嘅字系有答案嘅，其中有唔少喺旧帖度，有心机就耖caau3得到；重有部分系旧论坛嘅内容，皆由技术问题，而家睇唔到，畀少少时间管理员整理返出嚟啦！

呢度个个都系业余嘅，确实冇专职，就以现时条件嚟睇，尽可能专业就有，若果畀人觉得唔够专业，暂时都冇计谂。或者你有咩好提议噉呢？

xiss

原帖由 外外星人 於 2008-8-11 11:28 發表   呢个问题我试下答你，睇下系咪噉： 大部分嘅字系有答案嘅，其中有唔少喺旧帖度，有心机就耖caau3得到；重有部分系旧论坛嘅内容，皆由技术问题，而家睇唔到，畀少少时间管理员整理返出嚟啦！ 呢度个个都系业余嘅，确实冇专职，就以 ...

有個可能比較「異想天開」嘅提議
建議粵協同一尐粵語語音詞彙研究方面嘅專家保持長期聯係，並且希望佢哋可以作爲粵協嘅粵語語言知識嘅技術支援。定期將會員提出嘅問題匯總起嚟，請教專家。

外外星人

原帖由 xiss 於 2008-8-11 12:19 發表 有個可能比較「異想天開」嘅提議建議粵協同一尐粵語語音詞彙研究方面嘅專家保持長期聯係，並且希望佢哋可以作爲粵協嘅粵語語言知識嘅技術支援。定期將會員提出嘅問題匯總起嚟，請教專家。 ...

 

做咗。

xiss

原帖由 外外星人 於 2008-8-11 12:21 發表   做咗。

做咗
能否詳細介紹一下。

外外星人

唔系我做嘅，当然冇权发言啦！

xiss

但係點解我提尐問題通常都係一尐唔係好pro嘅回答嘅？點解我就未享受過技術支援嘅幫助啊？

外外星人

原帖由 xiss 於 2008-8-11 12:42 發表 但係點解我提尐問題通常都係一尐唔係好pro嘅回答嘅？點解我就未享受過技術支援嘅幫助啊？

 

冇乜人够你讲吖嘛！

xiss

原帖由 外外星人 於 2008-8-11 14:31 發表   冇乜人够你讲吖嘛！

包包包包

我路過～

 

分析得幾好～