同粤剧有关嘅

外外星人

先讲同剧名有关：

罗通扫北——《罗通扫北》系剧名，但系如果用喺形容某个场面，就至少有以下意思：

一、餸菜唔够，遇啱班大食喫，搞到美人照镜，可喻为罗通扫北；

二、一班细路喺屋企玩打仗，舞刀弄枪，互相追逐，分分钟有可能整坏啲家私杂物，都可以话佢哋有罗通扫北嘅阵势。

 

昭君出塞——《昭君出塞》同样系剧名，但系如果出去酒家食饭，按惯例实会留返个「昭君位」畀企堂摆啲餸上嚟，呢个时候，个企堂畀人喻为昭君，成日走埋嚟出菜（塞）...

外外星人

上回讲到罗通扫北嗰阵，场面有少少乱龙，但重未够混乱，请睇下面讲乜：

 

六国大封相——《六国大封相》呢出戏，就算未睇过，点都会听过呢个名。出戏好唔好睇经已冇乜人去理，反而讲多过睇。

若果有人嗌，嘈到隔篱邻舍都听到，搞到家嘈屋闭，冇办法收科，就真系好似六国大封相噉嘞！

 

音颯。聲喉破曰喉。『集韵』悉盍切。讀若三入聲。破聲也。

外外星人

抵冷贪潇湘——呢种情形后生仔女最常见。唔系冇钱买衫，唔系为咗悭钱，而系有衫都唔着，夹硬抵冷，正所谓要靓唔要命，搞到人有人冻，衫有衫冻，呢个时候，一个唔觉意，咳嚏一声，领嘢嘞！

好多人未必睇过《红楼梦》，但系有出粤剧叫做《情僧偷到潇湘馆》，戏入边嘅林黛玉，有潇湘妃子之称，虽然病坏噉，依然有好多人觉得姖够潇洒、够苗条。

 

嚏

嚏音痴。鼻噴氣也。『說文』悟解气也。『禮』民多九（鼻旁）嚏。『燕北錄』王太后噴嚏。近臣齊呼治夔離。猶漢呼萬歲。即今人呼大吉利市之意。

《廣東俗語考》同上

外外星人

粵劇《十五貫》入邊有個昏官，名叫「過於執」，聽個名就知，呢條友梗係斷估冇辛苦啦！弊在佢係大老爺，有權判案，唔單止斷估，重成日判錯案，主觀武斷兼且下下冤戾好人，更加之唔畀人駁嘴（官吖嘛，點到你話佢唔啱啫？！），噉就死得人多囉！

 

家陣，有啲人好興同人拗頸，話就話拗，但係佢又死牛一便頸，有佢講冇你講，點都要贏，似晒「過於執」噉款。

外外星人

聽講，七國咁亂嗰陣，齊國國君齊宣王有個王后叫鐘無艷，坐正東宮娘娘個正印位，又有個西宮娘娘叫夏迎春。

鐘無艷又叫鐘離春、鐘無鹽，唔怕生壞命，至怕改壞名，無艷、無艷，個樣就真係無艷，醜到齊宣王都怕咗見佢，冇乜事咪等佢食自己囉！東宮娘娘對內係統領後宮嘅主帥，對外稱國母，鐘無艷咁醜樣都入主得東宮？係咪有乜「潛規則」咖？冇嘅，當年未有「潛規則」呢家嘢，無艷雖然樣醜啲，份人幾好咖！忠君愛國，重文武雙全添！夏迎春作為西宮娘娘，冇返咁上下點得呢？梗係靚到沊一聲啦！呢位西宮娘娘，生得又白又滑，成隻剝殼雞膥噉，有前有後，姣厮扽，嘩，齊宣王對少陣都唔捨得！冇乜事咪對實呢件「瀕臨絕種」嘅尤物囉！

齊國係大國，地盤大不特已，又有咁靚嘅女人，咁大嚿肥豬肉噃，實多人睺啦！於是乎，邊境告急，搵邊個去劈友呢？啊，橫掂阿東宮娘娘唔使陪瞓，兼且又打得又嚇得，咪派鐘無艷去囉！阿無艷確係有返兩度散手嘅，次次都斬到嗰班冚家富貴嘅隔籬鄰舍屎滾尿酹，呢個時候，係鐘無艷至得敕嘅，齊宣王冇佢唔得啫！好嘞！冇事嘞！齊宣王又攬返實夏迎春，又試去做愛做嘅嘢囉！故此，就有咗有事鐘無艷，無事夏迎春呢個講法嘞！

粵劇有唔少講鐘無艷嘅戲，譬如《鐘無艷三戲齊宣王》、《齊宣王哭妻》諸如此類...

時下，有啲人好現實嘅，冇事唔會搵你，有事就好似火燭噉，好似call火燭車噉call你，等你没水摏牆噉走去救駕，你抵得諗啫，之佢當你係鐘無艷咋！捩身就伴返住佢嘅夏迎春啦！噉嘅豬朋狗友，唔識都好閒。