粵協成員於《南方都市報》之《白話廣州》版專欄連載 - 第2頁 - 會員原創 Our Works - 粵語協會

卢总發表於 2007-11-19 02:06:58

徇众要求，补贴１１月７号嗰篇！

广州说唱　　　　　□　卢总
 
失传咗嘅「十梳歌」
 
 
　　而家结婚都兴一切从简，但点简极，有啲习俗都唔少得嘅。比如婚礼前一晚嘅上头仪式。
　　家下啲人会喺婚礼前嘅一晚，由自家嘅女长辈举行梳头嘅仪式，俗称「上头」。上头之前少不免都会有啲拜神仪式——通常拣喺吉时，沐浴更衣换上全新底衫裤及睡衣，然后诚心上香向天参拜，再由家族中嘅「好命婆」（最好就系夫妻双全、和睦共处、儿孙满堂嘅老人家）嚟做「上头」。
　　上头嘅时候通常都会口中念念有词：「一梳梳到尾，二梳白发齐眉，三梳儿孙满地。」梳完三梳之后，就要将新娘嘅头发梳成发髻，以示佢嫁作人妇，踏入成人嘅阶段，最后就将扁柏及红头绳绑喺新郎或者新娘头上，噉先算系完成上头嘅仪式。
　　有啲地方嘅人一路梳头，会一路讲：「一梳梳到尾，二梳白发齐眉，三梳儿孙满地［此处唔知编辑点解要删咗一句好紧要嘅「四梳」！］。」寓意系祝新人能够同偕白首，婚姻美满，男女双方父母都长寿。
　　不过查实以前系有「十梳歌」嘅——即系话，梳头就起码要梳十下，每梳一下，梳头人就会念出一句好押韵嘅吉祥说话，十梳梳完之后就代表婚姻美满幸福，十全十美。但呢首悦耳动听嘅「十梳歌」已经随住时代而渐渐消失嘞，今日我揾返其中嘅部分，攞出嚟同大家欣赏欣赏：
　　一梳梳到尾；二梳我哋姑娘白发齐眉；三梳姑娘儿孙满地；四梳老爷行好运，出路相逢遇贵人；五梳翁娌和顺，……六梳夫妻相敬，……七梳七姐下凡，……八梳八仙来贺寿，宝鸭穿莲道外游；九梳九子连环样样有；十梳夫妻两老就到白头。
 
由于篇幅嘅关系，报纸方面对原文作咗部分删节，想睇完整版风趣生鬼嘅《<A href="http://general-lo.blogcn.com/diary,9949169.shtml">失传咗嘅「十梳歌」</A>》，请移玉步：
 
<A href="http://general-lo.blogcn.com/diary,9949169.shtml">http://general-lo.blogcn.com/diary,9949169.shtml</A>

highyun 發表於 2007-11-26 23:58:29

2007年11月20號《粵講粵白》

降龙痛斥群天神（周星驰《济公》片段） 剧情：遭群神告御状后，降龙罗汉逐个反驳。其中以痛斥王母同月老两段对白最为精彩。
王母：区区一个罗汉，咩事你都要理过，岂有此理，你偷咗我蟠桃你好赔嘞噃。 降龙：王母，分啲畀人冇乜大不了呀。你年年生日喫蟠桃都喫到腬①啦，今年转下口味喫条蕉吖！ （二郎神只狗吠，降龙转身） 降龙：咩呀？条气唔顺当面同我讲，唔好揾只狗吠吠贡②，咪以为换咗斑点，我照摷（「赵」音），讲你听呀。到边个？ 伏虎：到边个？（指月老）就系你喇！ 降龙：你呢个月老，恃住有几条红线就将下便啲凡人玩到谢！好似嗰个梁山伯同祝英台噉咋嘛，你做咩系都唔肯将人绑埋一齐啫，搞到人撞晒坟呕晒血噉呀③，人哋咩对你唔住吖？你老喇，你好退休啦，唔系啲红绳迟啲呀实绑到乱晒龙，就搞到呢，男同男、女同女，再搞落去呢就人同猪，曱甴同牛，噉你话喇？
精句点评： ①：天上咁多蟠桃，当然会吃到滞晒，揾肥胖嘅卢海鹏反串饰演物质生活丰盛嘅王母，就知道真系好「腬」。 ②：「××贡」系广州话一种常用嘅表达方式，表示叠词中嘅动作不停反复发生住。例如「喐喐贡」、「岌岌贡」、「搞搞贡」。 ③：将梁祝嘅爱情悲剧作为控诉月老嘅证据，最合适不过，但妙就妙在，「撞坟呕血」呢啲咁悲嘅典故由星爷把口讲出嚟，都会变成笑位。
Ungoo Chan@粤语协会

highyun 發表於 2007-11-27 00:04:13

2007年11月20號《說文解字》

多谢 & 得闲 多谢，原指殷勤问候，如《汉书．赵广汉传》：「为我多谢问赵君。」师古曰：「多，厚也。若今人言千万问讯矣。」亦有感谢之意，如李煜《柳枝》词：「风情渐老见春羞，到处芳魂感旧游；多谢长条似相识，强垂烟穗拂人头。」今粤语所言「多谢」，即取后一义，相当于现代汉语之「谢谢」。 得闲，即系有空、有时间。屈原《楚辞．九歌．山鬼》：「怨公子兮怅忘归，君思我兮不得闲」注释曰：「言怀王时思念我，顾不肯以闲暇之日，召己谋议。」 作者按：今次举嘅例系再熟悉不过嘅日常口语词，呢两个词睇怕每日喺我哋口中走唔甩鸡，估唔到系咁古雅。下次讲嘢多留个心眼，一个唔觉意原来出口已成「古文」。
余OK@粵語協會

highyun 發表於 2007-11-27 00:14:56

2007年11月22號《說文解字》

鸢 & 戾 鸢——粤拼：jyun1/jiu2　同音字：冤/妖　输入法：轻松粤拼jyun/jiu　极点五笔awvo（繁）aqyg（简）　紫光yuan　全拼yuan　仓颉iphaf 戾——粤拼lai2　同音字：捩　输入法：轻松粤拼lai　极点五笔yndi　紫光li　全拼li　仓颉hsik/isik 例词与注解： 　　「纸鸢」，一作「纸鹞」，即系风筝。「鸢」字典多作jyun1音，老鹰之义，有唔少考究粤语本字嘅专家（如香港彭志铭先生）认为「鸢」、「鹞」有相通嘅情况，「纸鸢」中「鸢」可读作jiu2。 「狼戾」（「狼」变调作long1音），系指横蛮无理地发脾气，「戾」为多音字，此处粤音lai2。例：发狼戾（蛮不讲理）、戾横折曲（歪曲事实）、冤戾（冤枉）。 作者按： 「鸢飞戾天者，望峯息心；经纶世务者，窥谷忘返。」呢句系我哋高中语文课本古文篇目《与朱元思书》中最具哲理嘅一句。其中「鸢」、「戾」两字，可能一般人唔太熟悉，但如果你晓粤语，且当你联想起「纸鸢」、「狼戾」时，系咪倍感亲切呢？原来我哋不时会讲到嘅词语，喺呢句诗词揾到咗影子。 有唔少学生仔抱怨学古文难，教师苦于良策欠奉，部分社会人士亦强烈要求降低古文教学嘅比重，甚至提出通通取消。查实，中小学语文教学系咪应该考虑添加多啲呢类元素，引导学生将生活同学习联系起嚟，令课堂变得冇咁枯燥，进而激发佢哋学古文嘅兴趣呢？
粤语协会

余OK 發表於 2007-11-29 22:46:07

2007年11月21號《經典粵讀》

孔乙己（选段1）
原文：鲁镇的酒店的格局，是和别处不同的：都是当街一个曲尺形的大柜台，柜里面预备着热水，可以随时温酒。做工的人，傍午傍晚散了工，每每花四文铜钱，买一碗酒，──这是二十多年前的事，现在每碗要涨到十文，──靠柜外站着，热热的喝了休息；倘肯多花一文，便可以买一碟盐煮笋，或者茴香豆，做下酒物了，如果出到十几文，那就能买一样荤菜，但这些顾客，多是短衣帮，大抵没有这样阔绰。只有穿长衫的，才踱进店面隔壁的房子里，要酒要菜，慢慢地坐喝。
粤译：鲁镇啲酒店嘅style，同其它地方唔一样：都系当街当巷摆个曲尺形嘅大柜台，柜入面趸定啲滚水，可以随时?酒。啲打工仔，晏昼挨晚（maan1音）收咗工，周不时畀四文铜钱，买返碗酒，──呢个系廿几年前嘅事咯，家阵经已升到十文碗，──凭（bang6音）住个柜企喺处，热辣辣噉饮落肚然之后唞返吓；若果肯畀多一文，就可以买碟盐煮笋，或者茴香豆，爱嚟送酒嘞，若果出到成十几文，噉就可以买样杂嚟喫，但系呢处啲人客，多数系短衫帮，睇怕都冇咁疏爽?嘞。净系得着长衫嗰啲，先会靸入店面隔篱间VIP房，嗌酒嗌餸，姿悠淡定噉叹酒。
点评：?（「庆」音）、凭（bang3）、靸（taat1）等有地道口语发音嘅字；「周不时」、「挨晚（maan1音）」、「疏爽」、「姿悠淡定」等旧式粤语词汇，正渐渐消失，译者故意使用呢啲字词，意在使读者重新认识传统粤语。
余OK@粤语协会.cn

[ 本帖最後由余OK 於 2007-11-29 22:49 編輯 ]

highyun 發表於 2007-12-4 09:21:28

2007年11月27號《粵講粵白》

布置机关（周星驰《算死草》片段） 剧情：陈梦吉为博水姑娘懵而布置复杂机关，并吩咐阿仁协助。
陈梦吉：请企喺此房间，切勿离开，将会有一大水柱由此竉射向你面之际，请将此猪脷塞向此竉。明解冇？（攞出猪脷交畀阿仁） 阿仁：明解。 陈梦吉：讲次听下。 （阿仁粒声唔出，面懵懵） 陈梦吉：吆！阵间有条老练咁大嘅水柱，喺呢个竉度射到你个冚××一面都系嘅时候呢，你就将呢条仆街猪脷塞落去你老×呢个竉度呀。 阿仁：哦！早讲呀你！① 陈梦吉：贱格。② 陈梦吉（想象惜水莲花嘅情景……）：顺一次先。顺一次先。阿欢喺隔篱房惜（音「锡」）阿仁揸住嗰条猪脷，我就喺呢间房惜阿水莲花条脷。万一追究起上嚟咯噃，阿欢就会自认嘴咗水莲花。水莲花大巴大巴扇③阿欢，我再上前揼多佢两脚。水莲花扑向我怀抱，我即刻安慰佢，承机再灌醉佢。然后我就——哈哈哈——！当今世上桥王之王舍我其谁！之乎者也！哈哈哈——！
精句点评： ①：广州话典型嘅倒装句式，置于最后嘅主语通常可以省略。 ②：文绉绉嘅讲法听到一头雾水，改用粗俗而无厘头嘅方式再讲一次先明解，用「贱格」两字形容阿仁，贴切不过！ ③：此处「扇」字形象突出巴掌面积之大。广州话词汇丰富，可以同「巴掌」搭配嘅动作，重有「掴」、「冚」、「打」、「星」等，表意各有侧重。
Ungoo Chan

highyun 發表於 2007-12-4 09:28:15

2007年11月27號《說文解字》

劖 「劖」读caam5（惨5，按粤拼）。输入法：轻松粤拼caam　极点五笔qkxj　紫光chan　全拼chan　仓颉niln 例：畀簕劖亲只脚；快啲扫起啲碎玻璃，唔系好易劖亲。 《说文》：「劖，断也。从刀毚声。一曰剽也，钊也。鉏衔切。」 《段注》：「剽，砭刺也。」砭，古时用来治病的石针。 《广韵》：「劖，刺也。」 《国语辞典》：「劖，刺﹑割。唐．元稹．送崔侍御之岭南二十韵：『逸翮怜鸿翥，离心觉刃劖。联游亏片玉，洞照失明鉴。』」 作者按：此字骤眼睇落颇为难写难读，唔联系上「攙、饞」（繁体「搀、馋」）等字都唔明白何以如此构字，畀人哋问起呢只字睇怕一般人攞起支笔都无从下手，好彩现代科技帮到唔少忙，有咁多输入法似足候选佳丽噉畀我哋拣最啱心水嗰只用。之但系习惯于依赖计算机，大脑转数系咪都会相应提高呢，有几多人重讲得出博大精深嘅汉字内里嘅古仔呢？另外简化汉字，点解唔索性将「毚」统一简化为「」呢？平添认字麻烦。呢两个问题，颇值得大家好好思索。
余OK、Dada

highyun 發表於 2007-12-4 09:30:21

2007年11月28號《經典粵讀》

孔乙己（选段2）
原文：有几回，邻舍孩子听得笑声，也赶热闹，围住了孔乙己。他便给他们茴香豆吃，一人一颗。孩子吃完豆，仍然不散，眼睛都望着碟子。孔乙己着了慌，伸开五指将碟子罩住，弯腰下去说道：「不多了，我已经不多了。」直起身又看一看豆，自己摇头说：「不多不多！多乎哉？不多也。」于是这一群孩子都在笑声里走散了。 　　孔乙已是这样的使人快活，可是没有他，别人也便这么过。 粤译（余OK）：有几次，隔篱邻舍啲哇鬼听到笑声，亦屙屎贪高兴①，围住咗孔乙己。佢于是畀咗啲茴香豆佢哋食，一人一粒。啲哇鬼食完豆，重赖住唔走，双眼住「目及」住只碟。孔乙己慌失失，伸开五指将只碟码住，弯低腰讲：「唔多喇，我经已唔多喇。」企起身又睇一睇啲豆，自己拧头筛髻②噉讲：「不多不多！多乎哉？不多也。」于是乎呢班化骨龙③就喺笑声中散水嘞。 孔乙已就系噉使人开心，之冇咗佢，人哋都系噉过。 点评：孔乙己请细路仔食茴香豆系小说中嘅精彩部分之一，可以睇睇译者如何用粤语诠释呢个精彩片断。同时再帮大家温习几个俗语： ①：屙屎贪高兴，「凑热闹」嘅意思。 ②：拧头筛髻，摇头摆脑。 ③：化骨龙，比喻调皮嘅细路仔，虽未至于化骨，不过化晒孔先生嘅茴香豆。
余OK

highyun 發表於 2007-12-4 09:30:50

2007年11月28號《有問必答》

介词与系词、大天二 Q：「喺」、「係」、「系」究竟有何不同？ A：两词无论词性、词义都完全不同。「喺」大致上解「在」，作介词用，该字在粤语中使用频率极高。例如：喺6000点嘅高位，谨慎入市。/ 喺边度？ 「系」相当于「是」，可作判断动词。例如：我系广州人。亦可置于形容词前表示强调，例如：系好嘢！ 「係」是「系」的繁体字。 Q：请问「大天二」是什么意思？来源于何处？ A：旧时广东绿林人物，占山为王，因「王」字拆分为「丁二」，故「大丁二」即「大王」，后来误传成「大天二」。民国时期，「大天二」变成有财有势的恶霸之代称。
粤语协会

陈阿游 發表於 2007-12-8 09:57:37

初来报到请大家多加关照......

highyun 發表於 2007-12-8 23:44:37

2007年12月4號《粵講粵白》

奸人语录（一）  近期电视啱啱播完剧集《奸人坚》，剧中饰演奸人嘅栋笃笑始祖黄子华越奸越得观众钟意，可谓「奸出新意思」。《奸人坚》延续咗《男亲女爱》嘅风格，全程妙语连篇。今期开始重温其中嘅「奸人语录」： 真系有型，天生硬朗无情，几多好汉为美人，冇财又冇丁①。 有恩不报未算差，有仇不报正傻瓜。 以和为贵，迟早乞米②；三十六着，恃强凌弱。 损人必利己，打赢靠暗器；损人不利己，不如跳井死。 你识做，我识做。 我浪子美男计上计，打孖噉上，有边个女人唔死喺我手上。 一件污，两件秽，三件冇所谓。 女人就系咁简单，佢钟意你你放笃屁，佢话你好有男人味。 人财两得，唔使咸湿。 系，我系奸人坚，但我奸得堂堂正正，光明磊落，我行得奸，企得奸！ 猫捉老鼠，只老鼠死咗，噉只猫玩乜啫？我要慢慢玩残你。 我要做奸人，可以被毁灭，但唔会畀你打败。 你依家受我一拜，你就系一代宗师，你依家唔受，你就系一个乞嚏。 注解： ①：「丁」系指人，「冇财又冇丁」，即人财两空！ ②：米系主要粮食，因此「乞食」广州话又叫「乞米」。
Ungoo Chan

highyun 發表於 2007-12-8 23:45:12

2007年12月5號《廣州隨筆》

牛皮廯之城 周不时见电灯柱上贴住咩「老中医专治皮肤病」，但广州嘅皮肤病睇嚟唔系嗰啲老中医可以医得好嘅。——G肉佬 每日到咗收档嗰时，个人就攰到好似散咗噉。今日都唔例外，收档就成条丧尸噉飘返屋企。 热天日头长，个天冇点黑，但都好晏了。返到屋企门口睇都唔睇就插条锁匙入门，但平时锁匙窿嘅位置好似消失咗噉，插嚟插去都插唔入。旧楼嘅光线差，用手机照吓，香蕉苹果橙！锁匙窿嘅位置畀人贴咗张「牛皮癣」，又系咩通坑渠嘅！好在黐得唔系好实，我撕咗出嚟，入到门踩到啲嘢，原嚟又系咩帮人送煤气嘅优惠卡同超市嗰啲传单。睇样系门罅摄入嚟嘅，真系忍无可忍，于是我攞起嗰张通坑渠嘅「牛皮癣」，打通咗个电话，听到有人「喂」，于是我吸啖气，然后大叫一声：「菠萝你嘅沙甜柚！」跟住立即收线。 其实呢啲「牛皮癣」已经贴匀呢区嘅旧楼，因为唔系咩「小区管理」，冇保安管，嗰啲衰人钟意就贴几张，贴到外墙、楼梯、信箱、地下……周围都系！但贴住锁匙窿咁有创意嘅，我都系第一次见。电灯柱、人行道、车站呢啲都已经系「牛皮癣」嘅天下喇，点知啲人连我屋企栋门都唔放过！ 有时喺车站等车，会见有啲人鬼鬼祟祟两头望，然后手掌系车站牌度一拍，又黐好一张！难为嗰啲环卫工人，铲成日都铲唔干净。唔知佢哋嬲起上嚟会唔会好似我噉，打电话去叫人食水果呢？ By the way：办证电话周街都系，唔系用毛笔写就系用喷漆喷，反正可以写到字的平面几乎都见到，我其实好好奇想打去问吓，可唔可以办个「劏猪八级证书」呢？
G肉佬

highyun 發表於 2007-12-8 23:45:55

2007年12月5號《說文解字》

褪 粤音：tan3（近读「吞」阳去声） 输入法：粤拼 tan　紫光tui　全拼tui　五笔puvp　仓颉lyav 例：褪车、褪色、行路打倒褪。 字义及解释：「褪」，本义「脱衣」，引申为「脱落」，又再引申为「移开」。宋朝苏轼《蝶恋花》：「花褪残红青杏小」；元朝杨颢之《潇湘雨》第一折：「待趋前，还褪后」。 作者按：好多人以为「褪」只读「退」音，却认为「tan3后」嘅tan3有音无字，只系一个冇根据嘅方言字。实际上「褪」就系正写，而且历史悠久添！
Highyun、Superjil

highyun 發表於 2007-12-8 23:48:04

2007年12月6號《有問必答》

锁门、消夜VS宵夜
Q：想知传统广州话嘅「锁门」点讲？好似有个seot1门，唔知啱唔啱？ A：系有seot1门嘅讲法，一说seot1为「戌」字，见《国语辞典》：「屈戌，用来开阖门窗的环纽」。元·陶宗仪《南村辍耕录·卷七》：屈戌：「今人家窗户设铰具，或铁或铜，名曰环纽，即古金铺之遗意，北方谓之屈戌，其称甚古。」 　　另外「闩(saan1)门」、「（taap3）门」其实都有锁门嘅意思。 Q：消夜、宵夜，边个先啱？ A：两个词都没有错，只是词义用法有不同。 　　「宵夜」系指夜间食用的点心、食物，作名词用，而「消夜」乃「食宵夜」之意，作为动作。《广东俗语考》解释曰：「中夜作食为消遣曰消夜。……消夜二字甚雅。」
粤语协会

highyun 發表於 2007-12-8 23:48:52

2007年12月7號《有問必答》

「酷」的发音
Q：「酷」，有人读「号」，亦有广告读「箍」，究竟应该读咩音呢？ A：很多人都会读错「酷」这个字，读成「号」是因为受「浩」、「皓」等字影响；而读成「箍」乃系受普通话影响，媒体经常将英文单词cool译成「酷」，皆因英文与普通话发音相近。实际上用粤语唸「酷」与cool是完全不同的，这个字正确读法是huk6，「哭」字的阳去声。不少流行曲都有这个「酷」字，下次唱K记得发准音，切莫出洋相了。
粤语协会

卢总發表於 2007-12-10 23:21:38

１１月２９号Ｂ１２版　·　「亢龙有悔」降不到龙

<A href="http://www.nddaily.com/C/html/2007-11/29/content_323032.htm"><IMG src="http://www.nddaily.com/C/res/1/20071129/34011196276553203.jpg" border=0></A>
<A href="http://www.nddaily.com/C/html/2007-11/29/content_323032.htm">http://www.nddaily.com/C/html/2007-11/29/content_323032.htm</A>
 
　　论尽母语　　 　　 　　□卢总　　 　　 　　近来喜欢睇本港台嘅《斑马在线》——因为呢个节目真系几启发到人，而且可以教识人喺多角度多层次睇事物、思考问题。重要系由陶杰同刘天赐嚟做主持，近牌嘅嘉宾系倪匡——全世界写汉字最多嘅人，噉又岂能错过呢？ 　　倪匡上嚟嘅话题系《剑赏金庸》。寻晚就讲到《射雕英雄传》里面郭靖嘅「降龙十八掌」有一招叫做「亢龙有悔」，阿陶生成晚都将「亢龙有悔」讲成系「杭龙有悔」，噉样系唔啱嘅！ 　　「亢」应该系读「抗」，例如我哋平时接触到嘅「甲亢」、「高亢」、「不卑不亢」、「亢奋」……呢啲「亢」都系读「抗」，而唔系读「杭」。 　　唔好以为「亢龙有悔」系「降龙十八掌」嘅招式，就当咗系「降龙有悔」。「亢龙有悔」系出自《易经》，金庸先生只不过系借用咗其中嘅「卦辞」，去命名佢嗰啲犀飞利嘅武功招式而已。 　　《易·乾》：「上九，亢龙有悔。」唐初孔颖达疏：「上九，亢阳之至，大而极盛，故曰亢龙，此自然之象。以人事言之，似圣人有龙德，上居天位，久而亢极，物极则反，故有悔也。」即系话，居高位而不知谦退，就会因盛极而衰，不免败亡之悔。大而极盛嘅「亢龙」已经显现盛极而衰之象，噉又点可以降服到其它龙呢？
 
报纸电子版：
<A href="http://www.nanfangdaily.com.cn/southnews/dd/dsb/B12/200711290641.asp">http://www.nanfangdaily.com.cn/southnews/dd/dsb/B12/200711290641.asp</A> 
原文最初喺<A class=new_diary target=_blank href="http://general-lo.blogcn.com/diary,11797539.shtml">「亢龙有悔」降唔到龙</A>
<A href="http://general-lo.blogcn.com/diary,11797539.shtml">http://general-lo.blogcn.com/diary,11797539.shtml</A>
 
报纸登漏咗一个好重要嘅知识点，想学嘢嘅就请移玉步！

外外星人 發表於 2007-12-11 02:24:51

大家畀啲心机，做好呢个版，用粤语占领我哋嘅阵地！打响粤协嘅招牌！！！

pippo 發表於 2007-12-11 16:56:21

噉使唔使將我以前寫喺報紙嗰啲都放埋上嚟啊？

gboss 發表於 2007-12-12 09:27:35

我篇《牛皮藓》见报，支持下自己先！我想知边个咁绝帮我改到啲水果名同原先嗰句潮州话粗口咁神似嘎，哈哈！

[ 本帖最後由 gboss 於 2007-12-12 09:44 編輯 ]

highyun 發表於 2007-12-12 11:00:49

原帖由 gboss 於 2007-12-12 09:27 發表 <A href="http://bbs.cantonese.asia/redirect.php?goto=findpost&pid=67218&ptid=8516" target=_blank><IMG onclick=zoom(this) alt="" src="http://bbs.cantonese.asia/images/common/back.gif" onload="attachimg(this, 'load')" border=0></A> 我篇《牛皮藓》见报，支持下自己先！我想知边个咁绝帮我改到啲水果名同原先嗰句潮州话粗口咁神似嘎，哈哈！ 
 
睇過精裝追女仔未？入面馮粹凡就係將啲粗口用晒水果代替。你啲粗口唔出得街架，唔改唔得。
G肉佬，繼續寫多啲好嘢啦。

頁: 1 [2] 3

粵語協會's Archiver