G肉佬之日常：Hawk
<P> 男仔講嘢要有中氣，嗌大聲啲！——G肉佬（2007年5月3日）</P><P><BR> 魚檔嘅泵水聲、雞檔嘅雞叫聲、肉檔嘅刴肉聲、街坊同檔主嘅講價聲……市場裏面重有一樣系必不可少嘅，就係我哋啲檔主嘅叫賣聲。因為市場裏面其實好多時都好嘈，所以我哋啲街市佬講嘢都係大大聲。有時啲人講嘢細聲，聽唔到佢講咩，扯起火上嚟爆粗係例牌菜。</P>
<P><BR> 細路哥嗰陣，阿爺就同我講：男仔講嘢要有中氣，嗌大聲啲！唔係就會畀人蝦。到自己真係做咗街市佬，就深有體會，人善被人欺，馬善被人騎。一個小小嘅市場，如果稍微少啲霸氣，就好容易畀人蝦到傻。喺呢度，嗌交就幾乎日日都有，打交都一個星期有幾鑊。但為咗顧及街坊鄰里嘅情面，一般嗌交解決到就唔打交。以我嘅經驗嚟睇，無論有冇道理，嗌交都係大聲嗰邊贏！</P>
<P><BR> 市場嘅嘈雜聲一般都係到咗夜晚收市前先開始有啲特色，呢個時候會聽到各種各樣嘅叫賣聲，我哋嘅術語叫「喊欄」。因為好多嘢都係要新鮮先好賣，好似切好咗嘅肉類、魚類留到第日嘅就會臭，就算放入雪庫都係冇咁好（唔新鮮都冇人買喇），所以就要平啲賣埋佢，呢個時候就要大聲Sell嘢喇。「千里傳音」喺呢度係必修課，煉得好嘅，手機費都慳唔少！</P>
<P><BR> 當然，我「喊欄」嘅腔調係與別不同，唔係叫出嚟，係唱出嚟！而且我重吸收咗黑人藍調嘅唱法（呢啲嘢係平時唱K領略出嚟嘅），再加上我渾厚嘅聲線，哀怨得嚟重有啲抵死！</P>
<P><BR> 好喇，差唔多到收市時間，我「K廳爆咪王」喺呢個Moment，要爆了……<BR></P>
[ 本帖最後由 gboss 於 2008-11-13 15:52 編輯 ]
頁:
[1]