[原創]G肉佬之日常：Beggar
<P> 呢個年頭，做乞兒都要講包裝。——G肉佬（2007年4月9日）</P><P><BR> 「去、去、去（國語）……」</P>
<P><BR> 今日經已係第二次拿住個篼過嚟了，我係話個乞兒吖。趕走佢一嚟係因為怕佢惹啲烏蠅埋嚟整烏糟我啲「放心肉」，二嚟怕佢嚇走我啲客。至於點解唔畀錢佢？你知啦，啲人畀開就成日過嚟攞咖嘛，到時想趕佢走重難添！</P>
<P><BR> 唔知幾時開始，廣州嘅大街小巷都咗好多乞兒。有手有腳嘅、有手冇腳嘅、有腳冇手嘅、扮冇手冇腳嘅……乜都有。有人話係貧富懸殊犀利咗喔，多咗人有錢喇，自然都多人仆街啦！我就覺得依家啲乞兒都過得幾滋潤喇，重有錢買啲好靚嘅道具吖、樂器吖噉（有時都分唔清邊啲係乞食，邊啲係賣藝），好似買啲彩色粉筆嚟寫大字啦、買套迷你音響嚟大展歌喉啦、殘廢嘅可以添置部手推車啦……再放大啲生活相擺出嚟加強感染力添！哇，問你死未！</P>
<P><BR> 嗰時聽故仔講乞兒幫乃天下第一大幫，重有分「烏衣派」同「淨衣派」，開頭理解唔到點解乞兒都可以著得身光頸靚，依家就深有體會啦，呢嗱，唔係周不時見好多著校服嘅僆仔僆女喺度求學費、求車費嘅咩，呢招就叫「制服誘惑」啦！個個睇上去白白淨、冇暗病，至於寫嗰啲嘢就大同小異，冇咩特別。不過最近見到一個學生裝乞兒係某個地鐵口寫雞腸，重實行中英雙語添！睇嚟除咗識包裝，重要開拓埋國外市場，有遠見吖吓！</P>
<P><BR> 睇嚟我都要與時俱進，惡補嚇啲英文，同鬼佬講返兩句：「Very fresh, very cheap!」先得喇！<BR><BR></P>
[ 本帖最後由 gboss 於 2008-11-13 17:04 編輯 ] <P>我好似記得 揸篼 應該係噉嘅 篼 哈哈 同兜應該有啲區別...........</P>
<P>如果話自己啲豬肉好cheap唔似幾掂喎......</P>
頁:
[1]