[原創]G肉佬之日常：Star Face
<P> 有冇見過明星賣豬肉吖？——G肉佬（2007年2月22日）</P><P><BR> 「你個樣真係越睇越似元彪嘅啫！嚟，再黐粒癦就Fit曬！」</P>
<P><BR> 「你玩我咩，李大嬸！你嗰粒明明係鼻屎嚟嘅！嗱，唔好彈過嚟啊，我揸住刀咖！」</P>
<P><BR> 呢個李大嬸係我嘅熟客之一，開跌打館嘅，江湖上人稱「浮腫你莫愁」。嗜好係灑詠春、唱大戲、睇武打片同撩鼻屎，為人神神化化，佢個仔都有我咁大啦，但佢重係大唔透。「七小福」之中佢最中意睇元彪做戲，重成日話我似元彪（雖然我唔係噉認為），所以嚟親市場，無論買唔買豬肉，都必定嚟調戲我一番。正一搞搞震，冇幫襯！</P>
<P><BR> 唔好睇我只係個區區嘅豬肉佬，但都有幾分明星相咖，以前都有唔少師奶話我眼細細，有啲似周傑倫，不過舞雙截棍我就唔識，用刀就得。重有我淨係講粗口嗰陣先有佢說唱咁快，平時講野就有啲慢囉。</P>
<P><BR> 哎，一日都係自己衰，細個冇畀心機讀書。如果唔係，哼！學我老竇話齋，大個咗唔係醫生就係律師！講返轉頭，做明星就免了，畢竟我嘅性格都唔啱入呢行嘅，而且都過咗發明星夢嘅年紀囉！</P>
<P><BR> 諗深一層，其實賣豬肉都唔錯啊，與世無爭，自給自足。雖然有時受氣啲，但起碼好過打工，大大話話都係個老細吖嘛！ </P>
<P> </P>
[ 本帖最後由 gboss 於 2008-11-13 16:21 編輯 ]
頁:
[1]