[原創]G肉佬之日常：Illegal Hawkers
<P> 其實每個人揾食都有佢嘅難度咖！——G肉佬（2007年2月12日）<BR></P><P><BR> 「走鬼啊！～～～」</P>
<P><BR> 如果有人喺市場周圍噉樣大嗌，一定會見到好多人攞住一搊二搊、大袋細袋嘅嘢作鳥獸狀散去嘞，噉嘅風景，何其壯觀啊！</P>
<P><BR> 講起走鬼，其實好多人都以為佢哋好淒涼，冇自己嘅檔口，周圍漂泊，重間唔鍾畀啲城管趕，肯定冇啖好食啦！如果你係噉諗，你就最多係啱咗一半啫。</P>
<P><BR> 有頭髮邊個想做瘌痢，有檔口邊個想做走鬼！其實大家都係為兩餐，本嚟應該互相體諒。但我哋要畀鋪租、要交稅，佢哋就唔使，每日中意去邊就去邊，邊度好生意就去邊，幾時旺就幾時出嚟，幾時有人趕幾時就松人。你諗下，我哋邊有咁爽！</P>
<P><BR> 至於啲爛鬼城管，講起就把幾火！佢哋都唔使做嘢，就係每日喺度行行企企，跟住就係等出糧嘞，再跟住？就係等屎囉！</P>
<P><BR> 市場嘅生意有好多時都係畀啲走鬼拖累嘅，因為佢哋有招嘢好毒，叫「做爛市」。我哋要交鋪租，重要交稅養肥啲爛鬼公務員（包括城管班冚家富貴），梗係唔可以同佢哋搏爛啦！呢個市場以前有好多人都係因為唔夠啲走鬼做，最屘搞到執包袱嘅。但又冇人行出嚟幫我哋講下嘢，真係啞仔食黃連，有苦自己知吖！</P>
<P><BR> 不過佢哋真係幾難搞嘅，趕完又走返嚟，真係遊擊隊後代！</P>
<P><BR> 「走鬼啊！～～～」嘻嘻，今次係我嗌嘅！係咪好衰呢？</P>
<P><BR>By the way：走鬼係冇可能賣新鮮肉類（尤其係豬肉）同賣新鮮魚嘅，有你都唔敢買啦！所以我唔驚走鬼同我槍生意，不過我系貪玩之嘛！ <BR><BR></P>
[ 本帖最後由 gboss 於 2008-11-13 16:25 編輯 ]
頁:
[1]