廣州人嘅習慣
廣州人嘅習慣小學雞
以往過口癮嘅帖，我系發咗就算，唔理人哋捧場定系柴台，我絕對唔會再去傷神。點解？皆因大眾對事幹嘅觀點角度唔同，咁樣自自然然表達出嚟嘅諗法亦唔會齊輯輯。響呢個話事人唔分莊閑、當你冇到、大條道理嘅橫班辦作風環境底下，我發帖多數無非為左翳嚇氣，講出自己心底入邊嘅說話之餘，加之對無奈嘅社會事幹彈返兩下。歡喜嘅唔需要跟帖，唔啱心水嘅可以走人。當然，用自身經歷嚟對我觀點指正嘅網友，以心為心我要講聲「好耐都唔該」，事關你哋講出嘅系實實在在響社會存在嘅問題同現象，同時令我獲益良多、明白更多嘅道理。
廢話少講，返入正題，講一講「習慣」。
我認為習慣系偉大，但又系好得人驚，只要你養成一種習慣，或者習慣咗做某事，響潛意識底下你就會唔知唔覺咁去做。打個比方，就好似你響酒樓食飯落單嘅時候，明明同個樓面講話碟生炒菜心唔要落蒜頭，但系好多時候，出菜擺到上臺後，你會發現仲系有蒜頭。唔理你要唔要求換過碟都好，大家暫且先唔聽樓面嘅解釋，響自己心底第一時間認為原因系咩？我自己就一定覺得「廚房大佬一定將落蒜頭當成一種習慣啦」，由於執碼習慣唔認真睇單，加上打荷又按習慣去出品，所以就出左唔啱客人要求嘅菜囉。大家可能會駁我，呢個又關習慣乜事呢？最主要系做事唔認真嘅結果。哈哈，呢個就系我想講嘅嘢啦，做事唔認真其實歸根於人本身嘅習慣，而習慣是一個關鍵因素。就上邊嘅比方，諸君真系認為「廚房嘅習慣只系令酒樓損失一碟生炒菜心」嗎？「廚房按習慣去做事，只系會影響今次有特別要求嘅點生炒菜心呢個客人」嗎？
再者我又覺得，無論好習慣抑或壞習慣，其實習慣系會相互傳染同埋影響。當所有人形成一種特定習慣嘅時候，大家會好自然咁對異於呢種特定習慣嘅人或事睇得唔順眼。又舉個例子，另一論壇部分網友話睇我發嘅帖好嘥時間，事關冚唪呤用廣州話去寫，令佢哋唔能夠一目十行，表示用廣州話寫嘅帖唔系幾啱依家都市人快轉數嘅生活節奏。對於呢種跟帖，我真系除咗鼓埋泡腮之外，都唔知點樣做反應。我諗部分網友對用廣州話寫嘅帖睇得慢，主要因由亦都系出於習慣問題。其實大家有冇諗過響呢廿年嚟，剔除正式場合，大家已經習慣咗唔用廣州話去書寫啦。呢個廿年嚟嘅習慣令到大多數嘅我哋，可以一邊睇住國標式嘅文章，而一邊又用廣州話去閱讀同思考，咁樣呢種習慣系禍定系福呢？其實我用廣州話發帖並唔系要系度認屎認屁，只不過系想用自己嘅母語去表達情感。響浩瀚嘅萬維網世界入邊，又夠竟有幾多可以用自己嘅母語去分享人生百味嘅論壇呢？老實咁講句，打開始用廣州話響度發帖，我已經明確咗所對應嘅閱讀對象啦；非廣州話為母語嘅外江人睇唔睇得明，我根根本本就唔在乎。
廣州話事人醒目，廣州話事人嘅大佬仲更加醒目。佢哋識得借力打力、暗渡陳倉；佢哋懂得層層遞進、逐個擊破；佢哋更加曉得籠絡人心、軟硬兼施；但最最最得人驚嘅系，佢哋深諳慢慢俾力、攤凍嚟食既上乘功法。就區區廿年，廣州話已經淨返半條人命，廣州人開始習慣為名為利而迷失良知，廣州人開始習慣為堅守廣州話而自己人打自己人，廣州人開始習慣響廢墟入邊尋找自己失去嘅本土文化，廣州人開始習慣遺忘自己嘅根、自己嘅宗、自己嘅興趣、自己嘅價值，廣州人開始習慣認為自己嘅仔女講唔講廣州話已經無乜所謂……等等等等。我相信響未嚟嘅日子，再過多廿年，廣州人已經習慣電視、電臺、報紙入邊冇廣州話嘅日子，廣州人已經習慣唔再響公共場合講廣州話，廣州人已經習慣響揾工簡歷嘅語言一欄入邊只填煲冬瓜；廣州人已經習慣去香港旅遊嘅時候講煲冬瓜而俾人背後叫做撈松……等等等等。若然又再過多廿年，身為廣州人又有乜個人魅力之處呢？因為全國人人都響度煲冬瓜，南腔北調嘅時光一去不返，廣州人嘅卷脷發音繞樑三日，必定成為香港人學習嘅對象。奇哉怪也，當日照當空之時，廣州人發現何物？自己下低個影已經變左做一個大大嘅冬瓜。
哦，唔好意思，真系大頭蝦，上邊一段請大家響冚唪唥「習慣」前面加個「被」字啦！ 佢哋識得借力打力、暗渡陳倉；佢哋懂得層層遞進、逐個擊破；佢哋更加曉得籠絡人心、軟硬兼施；但最最最得人驚嘅系，佢哋深諳慢慢俾力、攤凍嚟食既上乘功法。
E樣嘢 特卻最恐怖暖水煮田雞死咗都未知 分析得好透徹，而且正中要害，我覺得系時候反抗了，忍咗咁多年，我唔想見到粵語嘅衰亡。。。起碼系我死之後仲可以傳承落去 孖test講得好啱，家陣好多廣州人真係慣咗暖水煮田雞。人大致分三種：先知先覺，後知後覺，不知不覺。知覺，係佛家用語，人天生有佛性，而後天畀環境污染（胡普、laau思維），變咗冇知冇覺...。忽然間頓悟，噉都算後知後覺；冇悟性嘅，成世人就得個不知不覺，做莊嘅，至鍾意呢亭人。
頁:
[1]