超悶舊書——左丁山
沙田大學站旁邊嘅凱悅酒店，開業已有一年， o架啡廳之自助餐，晚晚滿座，周末尤其爆棚，而價錢一啲都唔平，與市區五星酒店相若，好似係四百二十元一位，可見沙田、大埔、馬鞍山之居民消費力甚高。香港嘅酒店餐飲收入佔酒店總收入，往往超過五成，昔日之富麗華酒店，達到六成 ?，可算係亞洲之冠。香港人住慣亞洲各地酒店，試問邊度有酒店嘅食肆晚晚旺場 o架，鄰埠澳門都唔會啦，曼谷（暴動前）啲酒店餐廳，直情係水盡鵝飛 ?。香港人口密集，消費力強，住宅面積比較細，故此香港人喜歡出外吃晚飯招待親朋，此乃本地一個文化現象。呢晚到沙田凱悅吃自助餐，肥仔Ｋ帶埋本《唐詩三百首》而來，問佢做乜事，佢話最近與人講普通話，講咗幾次「今日」，俾人「糾正」：「用普通話，要講『今天』，不是『今日』，『今日』係廣東話。」肥仔Ｋ唔順氣，記得唐詩有一句甚麼昨日今日嘅噃，於是帶埋本唐詩到餐廳翻閱，佢一講今日昨日，左丁山就背：「棄我去者昨日之日不可留，亂我心者今日之日多煩憂。」肥仔Ｋ話：「點解你會識 o架？咁好記性？」懶得睬佢，只係講聲：「搵李白啦！」肥仔Ｋ搵到之後，立即講：「咪係囉，唐朝已經講昨日今日咯，點解?家唔講得，要講『昨天今天』」。唔，或者今日之人已經唔記得古文呢？高逸然個名幾有意境呢，有現成名字不用，係要叫人哋做「蓋特納」，已可知一二。
肥仔Ｋ讀到「人生在世不稱意，明朝散髮弄扁舟」一句，連聲叫好。話讀多幾次，就會識得「偷師」，合咗一句老說話：「熟讀唐詩三百首，不會吟詩也會偷。」
因此想起才子Ｔ兒子就讀高級名校，非一般可比，但才子Ｔ投訴中文教學不得其法，校長索性問才子Ｔ：「你有乜好建議，想學生讀乜嘢書？」才子Ｔ話書不須多讀，簡簡單單叫學生熟讀梁實秋之《雅舍小品》就掂晒。嘩，唔係呀，梁實秋散文每多北平掌故，城中舊事，今日之老師點識欣賞呀？才子Ｔ話：「學埋中華文化品味 ?呀，讀完就唔會乜都超超聲！」才子Ｔ不如在家為兒子補習啦，現在好多人講說話，每好「超薄」，「超勁」，「超好味」，或者「勁好睇」，「勁辣」等等，要學生讀梁實秋，一定話「超悶」！
原载于20100528 <蘋果日报>
頁:
[1]