|
問粵語區四鄉各處（除已被廣州話同化嘅部分地區外）嘅民眾：你講緊嘅係咩話？佢首選回答係「××話」（××係當地所在市縣甚至細到鄉村）。若果籠統噉畀佢哋揀講嘅係「廣州話」定「廣東話」，佢十之八九答：梗係廣東話啦。而對外佢哋亦多數自稱講嘅係「××話」、「白話」或「廣東話」，尤其是對住撈嘅講，除非喺某啲情況，譬如用廣州音嚟同外鄉人溝通或者教外省人講粵語，噉先會話自己講嘅係廣州話（就算唔係十分標準都好）。呢點對於以廣州話為母語嘅人可能冇咁深體會，所以盧總曾經問過，所有粵語區嘅方音係咪都應該以廣州話統稱，我就覺得非常荒唐。
香港係個移民城市，尤其係嚟自廣東各地，開埠之初移民口音各異，正如上述所講，縱使廣州音成為日後嘅主流音，佢哋自稱講嘅係「廣東話」重係有好深厚嘅根基。所以完全冇必要話佢哋數典忘祖唔認自己講嘅係廣州話。而新香港人係冇記憶嘅一代，更加唔prefer以另一個城市嘅話嚟稱呼自己母語，儘管年紀老啲嘅有意識應該係叫「廣府話」先啱（譬如李我）。見到好多廣州人攻擊香港嘅「廣東話」講法，我每次睇到都得啖笑。請嘗試唔好以廣州音正統思想自居嚟代入香港人嘅諗法（譬如假設自己母語係佛山話、南海話、順德話……），就會坦然好多，更深有同感應該與之融洽。
而喺學術層面上，「廣東話」一詞係就係好唔嚴謹（同理，以廣州話統括粵語更加唔妥當），但對於普羅大眾嚟講，既然粵語係廣東嘅絕對強勢語言，你話要喺粵語、客家話、潮汕話揀其中一種嚟代表成個廣東，粵語點可以走得甩鷄？對住啲外省人提到自己講嘅係廣東話，有邊個會先入為主聯想到粵語以外嘅其他語言呢？所以喺民間「廣東話」唔存在歧義。兼且連正音正字都可以非常漠視嘅現代社會，叫「廣東話」呢啲小兒科又有乜大礙呢？
我鍾意講「廣東話」，一萬個鍾意！
| 
發表於 2007-12-26 14:16:44
發表於 2007-12-26 15:25:00
發表於 2007-12-26 16:33:19
