|
你知我知，２００７年１２月１号晚，校长谭咏麟喺广州天河体育场举行咗一场金曲演唱会。
嗰晚未够八点钟我就去到天河体育中心嘞，只见现场有好多「捕风的汉子」－－炒票嘅黄牛党、专捉黄牛党嘅差佬、有钱冇菲想揾靓位嘅水鱼、聪明绝顶伺机等执死鸡嘅醒目仔……对于佢哋嚟讲，爱是唯一要求！
无论系场外，抑或系场内，嗰啲荧光棒同发光嘅头饰都化作夜晚的彩虹点缀住美妙嘅夜空，带我走入一个有你嘅梦幻世界……
凭《假如我是真的》荣膺影帝嘅「金马伦」用幻影之术一直把你藏在歌里面，只系问我情凭谁来定错对？
其实，所有嘅雨丝、情愁同埋水中花都会喺我半梦半醒之间出现，令到半梦半醒嘅我心如雷，将千年埋藏喺我心里面对你嘅思念都重现喺眼前。你唔信？今夜情为证！我对你绝对系爱，极爱咖！你又何苦系都要掀起小风波嚟考验我呢？
穿过一波又一波嘅人浪，我揾到爱的根源，感觉当我哋好似重系孩儿嘅时候，天边一颗小星星、海边一颗闪星星或睡或现噉默默静卧住嘅时候，开始咗我哋嘅雾之恋……
嗰种感觉真系妙不可言，就好似世界停顿噉样——我哋都沉浸喺无尽嘅欢乐之中。但系可惜好景不长，突然有个叫「孤寂」、又名「回忆」嘅刺客狂笑杀到。为咗躲避佢把刺刀，你唔小心跌咗入去爱情陷阱，做咗人哋嘅俘虏，望住你变成猎物，我个心都不知几痛几伤！
为咗救你，我不得已变成咗一只披着羊皮的狼，经受咗２００２年的第一场雪嘅摧残之后，纵有讲不出的告别，我仍然义无反顾，穿越喜马拉雅、撒哈拉、布达拉……决心一路到天涯，发誓要揾到解救你嘅方法！
喺痴心的废墟，我碰到一个爱的逃兵。佢用键琴同小提琴变奏出一段段忧怨琴声。我马上打电话畀一索，等佢都可以从《偏爱》开始分享。个痴心汉话佢都曾经遇到过将知心当玩偶嘅人，所以佢话不管笑与悲，即使伤心到半死，只要相信「卡拉永远ＯＫ」，只要你系拥有一副傲骨嘅勇士，噉你就实可以一柱擎天嘞！
我知道我哋「不见不散」嘅约定一定可以实现！因为即使远隔重洋，我哋嘅梦仍是一样！你永远都系我一生中最爱！因为我哋嘅爱在深秋——呢个正正系大丰收嘅季节，你系可爱到永远，我系真心舍不得你走！为咗你，我愿意梦想都不要——就喺你背向我转面嘅时候，要走嗰一刻，我真系伤心到讲不出再见！
为咗令你接受我的爱，倾出你心底爱，抛开冷傲的化妆，我四出周围宣传环保，等大家一齐合力去还原我哋呢个地球嘅星球本色。突然间，我身边刮起一阵夏日寒风，吹到我空虚莫名，不知所措。
喺呢个时候，林子祥拨开大雾行出嚟，教我点样冲破爱情陷阱同抵抗夏日寒风。佢好坚定噉同我讲：男儿当自强！
跟住我听到「繁星流动，和你同路，从不相识开始心接近，默默以真挚待人……」嘅歌声自远而近，原来我嘅朋友一索、大乜七、屎蹄熏一齐唱住歌出嚟撑我，使我决心去做「最爱笑的人」。
于是，喺呢班老友嘅支持下，我哋排除万难，冲破万重浪，终于将你救返出嚟。
正当我哋载歌载舞一齐庆祝紧胜利嘅时候，只见谭校长身披七彩华衣，踏住一道金光向我哋款款而来——我哋唔系发紧梦！嗰个真系和蔼可亲、年年廿五岁嘅谭校长！
谭校长话，只要我哋继续撑落去，佢唱到八十岁后都唱畀我哋听！我哋当然系一齐欢呼喝彩啦：总相信，八十岁后，仍然能分享好戏！
最后，谭校长重同我哋约定：「不见不散」！
当然，我都同你约实：你要等我，不见不散！
Ｐ．Ｓ：红色部分就系嗰晚校长所唱嘅劲歌，全部都系按照先后次序排列嘅，蓝色部分就系歌词！
http://general-lo.blogcn.com/diary,12481645.shtml | 
發表於 2007-12-12 20:12:37
發表於 2007-12-12 21:55:57
發表於 2007-12-12 23:28:50
