|
樓主按：粵語協會新會員不斷喺論壇湧現，都有唔少網友反映過話想為粵語同粵文化添磚加瓦，助協會一臂之力，但比較迷茫、苦於無從施展，因而至今稱得上作出貢獻者廖廖可數。姑勿論匆匆入嚟祇為「單撈」之噍完鬆，縱使發帖者亦大多祇停留於談論吹水嘅階段（當然有質素嘅水帖亦係論壇keep住興旺嘅保證），甚或如某啲外界論壇同異己者對質謾罵、缺乏理性思考；或是徒感慨於當今粵文化如何衰落、如何受壓迫云云，除此之外無甚建樹。換句俗啲粵語說法嚟講，噉樣係「冇撚用嘅」，捫心自問，於粵語、粵文化出路有何益處？！為何唔做多啲實際性嘅嘢令人哋刮目相看呢？
協會查實為有志於喺粵文化上大施拳腳者提供咗一個非常好嘅舞臺。如今此舞臺尙算得體嘅背面，外人或後人難以想象當年創立之苦況，曾憶草創階段，三幾個窮學生憑住一股決心與傲氣，好多困難都「頂硬上」，為此舞臺之鋪墊付出難以名狀之艱辛。墊定咗咁好嘅基礎，如今唔好好喺呢個舞臺演繹係咪好嘥料呢？尤其是被寄予咗厚望、最有可能成為新一代接班人嘅一眾大學生（請想想，當初就係主要以大學生創立嘅基石）係咪為此而汗顏呢？
好嘞，言歸正傳。好多嘢有心唔怕遲。今日趁有少少得閒，總結咗啲平常會員容易做得嚟而且又有意義之舉，如有更多更好嘅建議請跟帖一一補充。查實最想講嘅係：諗頭唔一定要人哋幫你想埋出嚟，自己有所感悟亦可以主動提出，如有可能則加諸實踐。
1. 善於收集資料者：喺其他網站或各種渠道收集各種有價值嘅文章、歌影視作品等資料，一併補充到網站同論壇（可於論壇發帖，或集中發畀網站資料管理員）。
2. 熟悉網站資料管理維護者：可定期幫助協會將收集返嚟嘅資料更新到網站，做起嚟好簡單但需要啲耐性。目前協會祇靠highyun一手全力負責呢樣嘢，極為辛苦，需要多啲人有心人幫手。
3. 電腦軟件熟悉者：如設計精叻者可為協會創作各種宣傳畫像，Flash精通者可為我哋出嘅電子雜誌增色或創作同粵語有關之動畫。
4. 有意做版主者：申請成為論壇嘅版主，但應事先申明如何做好版主嘅承諾。
5. 外語佳者：可嘗試進行外劇影視作品對白粵語字幕創作，向鬼佬推介協會等等。
6. 經常「浮」論壇者：將協會嘅好嘢發表到其它網站，記得落埋協會嘅「朵」作宣傳推介用。
7. 創意佳者：為粵協創作口號、宣傳語等等，同埋諗啲好玩得嚟又喺能力範圍內嘅主題活動等。
8. 組織活動能力強者：定期組織一啲多會員參與嘅有意義活動，另外需要專人管好協會經費。
9. 文筆佳者：可以創作多啲同粵語、粵文化相關嘅文章，參考吓粵語文庫版幾位會員嘅原創作品。
10. 對有粵語字、詞有研究或使用嚴謹者：積極解答初、高級書院版各種粵語字詞問題；對網站錄入文章進行審稿，使網站成為粵語類網站甚至係中文網站數一數二用字嚴謹之網站係我哋目標；另外可以參與製作、補充協會嘅字表、粵拼輸入法嘅字庫等。
11. 愛好吹水者：多啲上論壇捧場，發多啲人令人有跟帖衝動嘅帖子就最好嘞。
12. 有音樂天賦者：踴躍參與粵語歌詞歌曲創作，話唔定將來粵語流行曲復興之時，記低你當年嘅一功。
13. 其實唔想提呢樣，但好現實點都要靠佢，所以擺到最後。網站運行需要一定資金，又差唔多到咗續費階段，服務器亦要更換，需要使一筆較大費用。協會係非營利性機構，又冇任何贊助，目前祇能靠自資，所以號召多啲有心人有錢出錢。至於出幾多，睇心唔睇金，到最後實在為皮唔住再發動募捐行動。
……
待續
每樣嘢其實都好想形成一個團隊，噉樣做起嘢就會有條不紊、有效率得多。但因為係冇酬勞嘅工作，故難以苛責好多「利益驅動之人」，之不過本住為粵文化奉獻一分光一分熱嘅心，都希望有更多人會做好「呢份工」，但願喺以後聚會見到多啲為協會作出貢獻人士嘅身影。
[此帖子已經被余OK於2007-5-31 19:21:44編輯過]
| 
發表於 2007-5-31 23:39:53
發表於 2007-6-1 01:01:07
發表於 2007-6-1 02:20:37
發表於 2007-6-1 07:35:45