議員何必學成龍(左丁山)

外外星人

議員何必學成龍2010年08月31日

立法會保安委員會討論八二三馬尼拉劫持旅遊巴士殺人事件，一眾議員講到慷慨激昂，異常憤怒。香港人因此事而好嬲，表達憤怒，十分自然。但尊貴的議員們並非成龍，應該對政治識得更多，唔係成龍嗰種層次。成龍喺佢嘅 Twitter度寫：「 HK is a nation built by a lot of different people」。香港只是一個特別行政區，不是 a nation，成龍犯下一個咁嚴重嘅政治不正確錯誤，因為佢係成龍，由得佢啦，但一啲議員強烈要求特區政府向菲律賓要求，本港要派人參加對八二三事件嘅調查，仲引 1994年菲律賓派人到新加坡參與調查菲傭死亡事件為先例，未免自視過高，好似成龍一樣，當香港 SAR為一個 nation。
《基本法》規定外交事務由中央政府包辦，香港頂多只能向北京表達要求，由楊潔篪向羅慕洛施壓，要求調查事件，有中國代表在，而代表可有一名中國駐菲大使館人員加上一名中國委派嘅香港官員，否則的話，香港自己提出喎，當外交部係乜呀？黎棟國副局長講到明，係中國大使館全力協助，反應迅速，香港包機先至可以順利接人與遺體回港。
嬲還嬲，辦事要講程序，譬如曾特首打電話俾菲律賓總統府，總統唔聽電話，總統府直情將訊息傳達俾外交部，請外交部安排電話，但外交部一於懶理，結果香港特首辦打兩次電話過去，總統府概不理會。一位馬尼拉記者直情對《南華早報》講：「總統府助手根本唔知 Donald Tsang係邊位！」但佢地就知道誰是劉建超噃，中國駐馬尼拉大使一出聲，三世祖總統立即與內閣部長接見劉建超，大家一齊開會商討，可見在菲律賓眼中，外交對手係北京，唔係香港。換過係一九九七之前，如有類似事情發生，菲律賓都係同英國傾嘅啫，港督咪係要透過倫敦與菲律賓政府高層對話。
香港係金融商業城市，前菲律賓總統 Estrada就鍾意來港 shopping，以前馬可斯夫人好喜歡嚟香港開戶口 㖭，但講到外交政治，佢地就會跟足外交 protocol咯喎，眼中無香港 o架！以前拉莫斯總統咪試過向李鵬提出要求照顧菲傭啦。之不過咁，曾特首無可能不知道外交安排嘅，佢仍然照打電話畀三世祖，並主動公開食檸檬一事，高招也。

（左丁山）