粵語嘅「Rap」

游人

呢首粵曲係叫「山東響馬之倒捲珠簾」,由文覺非先生所唱,而嚮裡頭更有板眼,龍舟,粵劇南音三種說唱過諸君去聽

歌詞大概係噉:

(板眼)顛顛倒倒．倒倒顛顛．
鯨鯊上岸行行遠．獅虎去深潭海底去眠．
黃鱔有鱗．蝦公有翼．老鼠佢拉貓在灶邊．
蛤乸銜蛇隨田轉．曱甴飛天鬥鳳鸞．
烏鴉佢弄歌喉艷．隻出谷嘅黃鶯佢走直辮．
旗杆頂上有人開酒店．白雲山頂賽龍船．

(龍舟)曹操要賣雲呑麵．秦檜佢乞食踎街邊．
賣馬秦瓊真係時運蹇．董卓落魄賣湯圓．
劉備上前食幾碗．薛仁貴定要收錢先．
張飛聞言就反臉．尉遲恭同佢打作一團．

(南音)冬瓜將來做大炮．胡椒當炮彈打穿天．
皇帝調轉同太監打扇．太子遊埠要自己撑船．
有位盲公佢親眼見．聾婆聽到覺新鮮．
啞佬佢開聲話搞唔掂．世間豈有倒捲珠簾．

游人

呢一段係由梁漢威先生所唱嘅粵劇南音大鬧廣昌隆


歌詞大概係噉:


我呢個絨線仔，行到我腳都跛，今天生意確唔曳，
想話收工點知碰啱班大姐仔，佢哋埋嚟幫襯唔理日斜西，
個個都鬼咁奄尖夾濕滯，以為果個係買朵紅花伴髻圍，
點知揀去揀來佢都嫌細，如來佢想遮住個笪大抆雞，
又有個姑娘佢要買絲圍，幾十隻嘅色水都要配齊，
點知等到佢揀齊佢又嫌貴，攪到烏燈黑火我至得返歸，
想起返上黎真正係唔抵(生白：弊喇)，又覺腹中飢餓好似發軟蹄。

(唱者白：話說絨絲仔祭過五臟廟之後，又到聚龍坊瓊芳客棧投宿，個店家話：「喂對唔住人兄，今晚客滿，淨返間柴房，不過好猛鬼架。」個絨絲仔話：「無所謂啦，好過訓街呀，好喇，唔該帶路，唔該帶路。」 )

柴門閉，望下左右東西，房中擺設幾鬼齊，
骨子夾無污糟唔似係有鬼，睇真都更似係女子香閨，
個啲檯椅係酸枝與共雲石砌，花樽與字畫都有齊，
等我行近去床邊來一睇(生白：嘩)，高床軟枕幾咁威，
重有套古老既揀妝還未廢，不過的胭脂水粉都已變污泥(生白：咦咦，乜咁架)，
喂喂點解有枝柳枝插喺床尾第，重有硃砂符紙畫滿哂靈龜，
有個香爐擺上梳妝櫃，大床對正有一幅水墨鍾馗(生白：喂喂，乜頭乜路呀喂。喂，唔係呀嘛)，
唔通呢一度真係有鬼，所以擺滿哂驅邪各樣東西，
點解忽然又覺得好似陰風細細，我的毛管眼都戙起嚇得我魂魄都唔齊(生白：喂喂，唔好嚇我呀喂。喂，唔好嚇我呀喂。唔使驚既，唔使驚喎，怕乜野呮)，
想我膽正命平又使乜怕鬼，男兒頭上有七尺光輝，
一於拍扁個枕頭搵個周公傾下偈，我話知你凶神猛鬼一齊嚟。

(生白：嗟，世間上邊有咁多鬼喎。咦咦，喂喂，做乜野喂，無野呀嘛，乜咁既餵。)
忽見飛沙走石嘈嘈閉，房門忽然間打開咗好似有人歸，
臘燭又會著返光搖曳(生白：哎呀)，照住個淡妝少婦係處笑口噬噬，
當堂嚇壞個絨線仔，口震震震到嚇到又跪低，
喂喂可憐我有個八十高堂重有個三歲嘅仔，小姐呀你唔好將我難為。

(唱者白：果個女子扶起咗個絨線仔，佢話『騷擾相公真係唔好意思，不過我見到相公你係個好人，我想你幫下我』，『幫你，點幫法呀，得得得得，你講啦，你講啦』。)

我名叫小喬生姓廖，青樓三載好比柳絮把花飄，
識到一個叫做趙槐安與佢心相照，估道從良有望羨煞嬌嬈。

(生白：姑娘你身世可憐，真係令人嘆息咯，不過咁也，猶幸得一個如意郎君，都屬不幸中之大幸也。)
(女鬼白：呀，你唔知架喇。)

飄萍有寄情偏重，傾盡了私囊一旦空，
助那鄙夫成商夫，貨棧新張名喚廣昌隆。

(生白：個郎事業有成，姑娘亦終身有托，可以埋街食井水，真係可喜可賀。)

唉不料好夢難圓成惡夢，好比竹籃打水一場空，
佢棄我如遺還將我毒打，飄萍依舊又飄蓬。
(生白：哈哈，咁都有既，真係人心不估，真係可悲，可悲可嘆。)
我噬臍莫及徒追悔，愁斷肝腸怨滿胸，
三尺紅羅求一死，任從遺恨恨無窮。

(生白：哦哦，聽你咁講，姑娘你真係.....你真係。)
(女鬼白：無錯，我係鬼黎架。)

可憐我有冤無路訴，懇求君子相助拔刀，
你帶我小喬來上路，我要廣昌隆裡殺奸徒。

(女鬼白：只因陰界之中，難容無主孤魂，更不能受陽氣所衝，我求你暫以妻房相稱，藏我冤魂於傘內，前往趙家，我就感恩不淺)
(生白：咁呀，好，小喬姑娘，你唔使驚，我幫你，做得到，做得到既，喂係就趁快，家陣天光喇，早的上路喇。)
(十板南音板面) 喂喂我行先，低聲叫喚句小喬，妻房，喂跟住我黎，雨遮裡頭暫藏身，係權且之計，你今天為報仇，要暫時受下委屈，你要死抵，雖不怕萬苦千辛，要搵到個負心既衰仔，他罪千條，要佢從頭計，深冤定能雪，難再讓他，留於這俗世，我口翕翕來自言自語似足鬼食泥。

(生白：喂，小喬妻呀，你睇下廣州大城，日日都好似趁墟咁架。)

第一津人頭湧湧，二牌樓車馬匆匆，三元宮外啲善信排哂長龍，
四牌樓下有好多店鋪，五仙門外路路皆通，
六榕寺個啲和尚將經誦，我聽到有七弦琴喺度唱緊探監嘅碧容，
個處做緊套八仙賀壽開場做大戲，九層寶塔立城中，
十里嘅長街邊個知到有鬼，所以鬼咁滋遊淡定走過人叢。

(生白：喂喂，睇碰，喂老友，睇碰呀，喂喂喂喂，碰親我唔緊要，千祈唔好碰到我把遮，睇碰。)

走入城隍廟，去把香油奉，等我買的溪錢路票呢的一定要手松，
所謂有錢能使得神心動，等佢哋隻眼開時隻眼閉事事通融。
(生白：我而家買通咗啲城隍小鬼，你放膽去做都唔怕架喇，小喬定的黎呀。)

忙舉步，面向東，最擔心有的熟客系半路相逢，
佢地攔住我黎幫襯買的野用，個陣阻頭阻勢就無陰功，
往日但求生意旺，但係今日千祈咪發市免致會亂龍，
小喬在傘內低聲叫喚，千恩萬謝我哋好恩公，
你一天生意都唔做，為我小喬奔走真是義厚情隆。

(生白：唔好客氣，乜說話，應承得你嘅，一定會得做嘅，你知嘛。)

知否人生在世義為重，伸張正氣要警頑凶，
行行不覺抬頭見，個一個招牌寫住叫做廣昌隆。

(生白：小喬姑娘，我只能夠幫到呢一步架咋，以後嘅野，唔關我事架喇，靠哂你自已架喇，知道嘛，餵我走喇。)
(女鬼白：好呀，多謝哂，真係多謝恩公。)
張開紙傘，捲起啲狂風，小喬魂魄過簾籠，
只見個趙槐安左抱右擁，嬌妻艷妾在懷中，
佢一見陰魂來索命，求饒跪地變作可憐蟲。

(槐安白：喂喂，你咪小喬，你點解會喺度架，小喬，你放過我啦。)
(女鬼白：哈哈，你認得我咩，你都害得我慘喇。)
(槐安白：喂喂，我知錯喇，你放過我啦。)
(女鬼白：放過你？你個負心人呀。)

小喬移恨如山重，忿火登時噴出胸，
怒罵槐安卑賤種，過橋抽板害阿儂，
三尺紅羅奴命殞，紅羅三尺要勒死元兇，
負義之徒無好報，難輕縱，世人應要記取呢一段大鬧廣昌隆。