設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
查看: 4172|回復: 3

轉自百度粵語吧:粵語版《隆中對》

[複製鏈接]
發表於 2010-6-17 08:50:46 | 顯示全部樓層 |閱讀模式
本帖最後由 dert112233 於 2010-6-17 08:53 編輯

粵語版《隆中對》

師爺舊陣成日落田喪耕,首飲歌《梁父吟》。佢米八咁高,成日話自己管仲咁型、樂毅咁威,四圍啲人都話佢喪嘅,喺得博陵嘅崔仔,潁川嘅薯仔同佢係老死,贊佢夠潮童。

當時阿公新野打躉。薯仔來投靠阿公,阿公好睇得起佢,薯仔就同阿公講:「明仔是醒目仔來,你想唔想見嚇佢咩?」阿公話:「哦,噉你拉埋佢一齊入會啦。」薯仔話:「條友好宅,又臭寸,你都係自己去搵佢啦。」

於是乎阿公就親自去刮明仔,前兩次明仔都潛咗水,第三次先畀阿公拉正。阿公驚嚇親明仔,叫曬啲靚出去守住門口,同明仔講:「自從阿爺瓜老襯之後,堂口就笠笠亂,董伯伯、曹爺都做過話事人,對阿爺嘅老婆仔女趕盡殺絕。我唔夠把炮,雖然好想上位,但係又冇錢又冇面,搞成而家噉,我都滴曬汗。不過我面皮夠厚,冇咁易認低威嘅,師爺,你話我點算好呢?」     

明仔話:「自從董伯伯做低阿爺上咗位之後,好多粉腸都趁機霸住各個分堂口,就連阿貓阿狗都敢牙斬斬,是威是勢,成個幫會七國咁亂。

曹爺未上位之前,同袁少比,地盤同靚都差人幾皮,不過佢最後都可以隊冧袁少,靠幾條茂哩打低個江山,唔單止因為佢時運高,最緊要因為佢夠薑,識食腦。家陣曹爺有過百萬條靚,又綁架咗大少,我地唔好立亂踩過界。

番鬼仔從佢伯爺到佢大佬再到佢,已經霸住江東三代,地盤夠穩陣,下便人又十撲佢,而且靚打得又睇得,番鬼仔呢期咁掂,我地都千祈唔好同佢翻面啊。

嗱,荊州四通八達,交通便利,又核心CBD,綠化率高,個個堂主都住曬,不過荊州個話事人劉表就冇乜牙力,遲早打柴,今勻認阿爺開眼,咪走寶啊。至於益州雖然係新開發區,但係勝在地盤夠大,規劃完善,想當年你阿爺個阿爺個阿爺個阿爺都係靠呢度先做得成渣fit人嘅啫。劉璋條懵柄,份人十下十下,張魯個契弟又成日睺住佢個地頭,照我睇益州個地段咁好,配套咁完善,劉璋都唔識得珍惜。益州嗰邊啲兄弟都想有條大水喉射住,阿公你係大少嘅叔父,又出嚟行咗咁多年,幫會啲兄弟有邊個敢唔畀面你,如果第時我啲可以收曬荊州、益州啲場,再同西番蓮啊、孟加拉啊傾掂數,對外聯合番鬼仔,對內執掂啲二五仔,等到曹爺嗰邊有咩咿喐,就派條靚帶荊州啲兄弟踩過宛、洛,你再親自帶班靚劈過去秦川,班契弟肯定自動自覺交曬啲陀地畀你啦。如果條竅行得通嘅話,到時稱王稱霸,個幫會就是我地玩曬啦。」

阿公話:「掂!」從嗰時開始,兩個麻甩佬就成日黐埋一齊,食又同煲,又同鋪。阿公兩個頭馬二爺同飛少都睇阿明仔勁唔順眼,阿公就同佢哋講:「自從明仔入咗會,就好似魚有咗水,正所謂有著我便有著你,你哋咪再寸嘴啦!」噉講之後兩條友就唔敢再出聲啦…

原文如下:

亮躬耕隴畝,好為《梁父吟》。身長八尺,每自比於管仲、樂毅,時人莫之許也。惟博陵崔州平、潁川徐庶元直與亮友善,謂為信然。     

時先主屯新野。徐庶見先主,先主器之,謂先主曰:「諸葛孔明者,臥龍也,將軍豈願見之乎?」先主曰:「君與俱來。」庶曰:「此人可就見,不可屈致也。將軍宜枉駕顧之。」     

由是先主遂詣亮,凡三往,乃見。因屏人曰:「漢室傾頹,奸臣竊命,主上蒙塵。孤不度德量力,欲信大義於天下;而智術淺短,遂用猖蹶,至於今日。然志猶未已,君謂計將安出?」     

亮答曰:「自董卓已來,豪傑並起,跨州連郡者不可勝數。曹操比袁紹,則名微而眾寡。然操遂能克紹,以弱為強者,非惟天時,抑亦人謀也。今操已擁百萬之眾,挾天子而令諸侯,此誠不可與爭鋒。孫權據有江東,已曆三世,國險而民附,賢能為之用,此可以為援而不可圖也。荊州北據漢、沔,利盡南海,東連吳會,西通巴蜀,此用武之國,而其主不能守,此殆天所以資將軍,將軍豈有意乎?益州險塞,沃野千里,天府之土,高祖因之以成帝業。劉璋暗弱,張魯在北,民殷國富而不知存恤,智能之士思得明君。將軍既帝室之胄,信義著于四海,總攬英雄,思賢如渴,若跨有
荊、益,保其岩阻,西和諸戎,南撫夷越,外結好孫權,內修政理;天下有變,則命一上將將荊州之軍以向宛、洛,將軍身率益州之眾出於秦川,百姓孰敢不簞食壺漿,以迎將軍者乎?誠如是,則霸業可成,漢室可興矣。」     

先主曰:「善!」於是與亮情好日密。

關羽、張飛等不悅,先主解之曰:「孤之有孔明,猶魚之有水也。願諸君勿複言。」羽、飛乃止。

 樓主| 發表於 2010-6-17 08:52:25 | 顯示全部樓層
請大家幫手正字正詞,我定改之。
發表於 2010-6-18 11:11:59 | 顯示全部樓層
好多字..抢个位先慢慢睇
發表於 2010-7-13 21:21:51 | 顯示全部樓層
哈哈,又改得几鬼得意
您需要登錄後才可以回帖 登錄 | 註冊

本版積分規則

粵語協會官方網站
網友發帖之言論,純屬個人意見,與本會立場無關

手機版|Archiver|粵語協會    

GMT+8, 2017-11-19 05:16 , Processed in 0.269937 second(s), 26 queries .

Copyright © 2003 - 2016 Cantonese Association. All Rights Reserved. 粵語協會 版權所有

快速回復 返回頂部 返回列表