2010年广州市民生活日记--------------------------------------------------------------------------------
作者：nc7272 羊城网友论坛 本文已经被阅读了 5156 次
6点半起身，开始擦牙，个水龙头滴咗半桶水，都够洗埋面了，仲有净少少，估计滴到今晚都有成桶了。滴下滴下，呢个月悭咗成200几文水费，又几好啵。
用微波炉中火叮咗两个馒头当早餐。以前下下想快手，用高火档好鬼食电，而家电费升到11文，当然要悭啲使啦，迟啲电费再升，要用解冻果档先得。
天气预报话，今日天气好好，所以早啲起身，悭返一程巴士钱，又多咗15文落袋，路上几顺下，从东风西行到中信广场，10公里嘅路走咗1小时40分就到了。
路上撞到A君，佢踩个本田LOGO嘅单车，好鬼威水下，睇来条友升咗人工，交得起200文个月嘅城市单车管理费了。
返到公司，除低对拖鞋，换返对A货老人头，发现公司啲灯全部换咗9W嘅节能管，先知道呢个月电费又升咗几文，唉，死了，以后煮野食真係要用解冻档了，迟早要还原到猿人时代，生食都似。
不过谂真啲，都好嘅，公司悭返啲电费，好过减人工啊。
返工第一件事当然就收邮件啦，个网好鬼快，睇嚟电信封咗BT之类嘅软件之后，网络真係快咗。不过IT部俾咗份邮件我哋，话呢个月开始，电信要按流量收费，公司要求大家尽量压缩同减少电邮嘅文件大小，按职位同等级不同，都有相应嘅流量配给，超过流量要向总经办申请。真係烦啰。
9点几，老细好鬼劳气，噪生哂，原来司机李仔未返到，老细又急住出去，电话又冇开机。
10点，李仔返到，原来今日油价又升咗，仲要周街都加唔到油，逼住条友晨7咁早去到花都先加到，落车交钱行返部车时，又俾新疆仔打劫，乜都冇哂，连张加油发票都冇埋。老细听李仔讲完，即时冇哂火气。梗係啦，冇抢到部车啵，算好彩啦，而家啲贼连警车Fit仔都抢啦。寻日报纸先讲市局响门口站岗啲阿Sir俾人抢咗部手机，连人都追唔到。
中午食盒仔饭，哗！冇啲油水，我叼啲送外卖嘅捞仔，你老板黑了良心了，条捞仔即时用标准广州话叼返我，老细，而家啲食用油贵过97号汽油，你先20文个饭盒，点俾你啊？我声都冇得声，好鬼冇面。谂下谂下，横掂都冇面了，不如以后自己带饭好9过了。
晏昼啲空调好似停咗咁，听讲係环卫局查空调温度，写字楼即时调到28度，热到我连条呔都除埋。
冇惊冇险到6点，啱想走人，不过一谂，今晚天河体育中心同中华广场都有大型文艺表演，有大粒头嚟咗广州睇show，肯定封咗东风路同中山路，不如迟啲走啦。
扫咗一阵牌，都未到7点，冇乜搞，打卡换返对拖鞋走人，落下场走下继续捱时间。商场间间都大特价，不过啲价钱都係贵到呕，买对尼龙袜都要50几文，有乜计，啲石油升到阿妈都唔认得。
7点半去车站等车啦，好鬼少人，而家啲人坐唔起车，而且又怕塞车，一般都好似我咁行路上落班。上咗部62路，嘟一声，个羊城通又少咗15文，不过部车空逛逛，好有坐专车嘅感觉。
天河塞到晕，出到东风路，又係塞到呕。听交通台，原来封咗环市路同中山路，内环又封咗，啲车仔全部涌到东风路，好在有位坐，话知你塞到天安门啊。
8点半先行到纪念堂，成班人围住个省府，唔知做乜。
9点半到德泥立交，又係塞到冇得郁，望出去，全部都係私家车。我唔明点解有咁多人买得起私家车，又点解有咁多人坐唔起巴士，呢个世界真係怪。
计下条数，仲慢过行路，不过日日行路，又真係顶唔住。
成10点先返到屋企，门口保安话今日有贼入屋爆野，要我哋夜晚关好门窗。我谂我都冇乜俾人偷，关我鬼事。
求其食咗啲野，熄哂啲灯悭返啲电，坐响个阳台度唔知睇乜，个月光呢几年都係
黄禽禽嘅，星星就更加见唔到啦。
又坐返响个厅度，其实真係冇乜野搞，前年有线电视升到50文个月时，就已经卖咗部电视，部HIFI又坏鬼咗，真係冇乜娱乐。又唔想对住部电脑。
冲咗个悭水凉，想瞓了，突然醒起未交垃圾费，于是响个PDA度记低，费事俾人联合执法，连水电都停埋。
11点半，听下老军医电台同天气预报，纯当係听笑话。
12点，都係上床瞓啦，听日仲要行路返工啊。
發表於 2008-12-14 16:40:10