|
寻晚，突然之间觉得阴风阵阵，越坐越冻。咪啰，都系早啲唞好过！
一直冚开冷气被，睇怕今晚唔够被，开返张棉被先。果然，成个人舒服晒，瞓到个被窦暖凹凹，成晚都唔觉尿急， 重发梦搭船过海添。
唔知唔觉，成身滚晒，越瞓越臖，戽开张被，又觉得凉浸浸......点解我张被焗得咁交关呢？事关我呢张唔系普通嘅棉被，而系丝绵被，虽然张被好轻，但系，比起嗰啲迮死人嘅“九斤被”，唔单止轻，重暖好多。
而家时兴嘅乜嘢水鸟被、羽绒被，不过系用鸡毛、鸭毛嚟做嘅啫！边度似得丝绵被咁实在、咁软熟、咁凹凹暖呀？正所谓臊臊都系羊肉吖嘛！丝绵被系就系贵咗啲，始终都系嗰句，一分钱一分货，贵买平用，贵啲都系抵嘅！ | 
發表於 2008-11-20 05:30:08