PENKYAMP兄，对于Penkyampji我有尐改进建议

xiss

我建议，将原方案中嘅oy、ont、ot改为eoy、eont、eot，以准确反映出呢三个音同eo其实系长短元音嘅对应关系，毕竟目前学术界亦都系噉样认为嘅。而且，我从个人听感上亦都系觉得粤拼喺呢个韵母嘅标注上的确比Penkyampji嘅oy、ont、ot要好，所以我建议Penkyampji亦都改为eoy、eont、eot，以充分体现出PENKYAMPJI喺设计上以及长短元音划分上嘅科学性。
唔知PENKYAMPJI可唔可以作出更改（对维基以及其它百科上以及所有网络上嘅PENKYAMPJI嘅介绍都进行呢个更改）呢？需唔需要同当年指定PENKYAMPJI嘅其他学者交流下意见先呢？

penkyamp

其实呢个改进，我三月前已经想过，系听到 HKCantonese ？ 嘅建议后，想想有可能将  eo 作为一个长短分化嘅组。

但系，我嘅想法系，同时保留原 ot, ont, oy 版，作为「原版」，以与 sydney lau 同阵营。
同时发展出 eot, eont, eoy 版，作为一种选择。  亦可以叫 penkyamp 2008 ban .

呢个版本，可以在原版 ot, ont, oy 旁边作说明。  英文都有  honor-honour, favor-favour 嘅唔同选择嘛。 台湾大陆亦都有简繁之对应嘛。讲德语各国，拼写亦有唔同。 但系总嘅来讲，对应转换系好机械简单嘅事，完全唔系两个唔同系统鸡同鸭讲。penkyamp 有1993版同2008版嘅区别，应该唔会增加巨大嘅混淆。请你放开手去添加说明。但唔好完全删除原来嘅  ot, ont, oy 。  因为 ot-eot, ont-eont, oy-eoy 嘅对应关系，亦都对将来新旧两版之间嘅机械转换提供准确嘅说明，而唔系制造无必要嘅混淆。



http://bbs.cantonese.asia/viewthread.php?tid=20465

Penkyamp 输入汉字软件可以下载了

[ 本帖最後由 penkyamp 於 2010-1-13 02:49 編輯 ]

xiss

實際上，我喺好幾個網站上都有上載Penkyampji嘅介紹咖，但係正如軟件都會有更新版一樣，我嘅呢個介紹亦都會定期進行更新，大概嚟講，從我年頭使用Penkyampji到宜家，我嘅Penkyampji教案都已經更新到第四版囖。最近遇到個對廣州話有業餘研究嘅老師，向佢sell咗以下Penkyampji，佢對於Penkyampji嘅嗰種表現形式（nk、nt、mp韻尾）好唔習慣，但係就對Penkyampji根據長短元音劃分粵語韻母嘅形式好欣賞，話佢係「出發點唔錯嘅半成品」喔。但係佢就向我指出，Penkyampji喺oy、ont、ot嘅劃分上係一個硬傷，重向我細細解釋咗一番，然後我自己私底下細細品味咗一下，越嚟越認同佢嘅觀點，之後一發出呢個音，自己重已經根據「第一感覺」拼出seoi等嘅Jyutping拼法，並且反過嚟對於soy嘅呢尐拼法覺得有尐奇離。於是乎，我就萌生咗喺呢幾個音上對Penkyampji作出修改嘅想法嘞！實際上，我對於seoy等嘅拼法嘅認同感一直以嚟都係「不斷上升」嘅，越嚟越有拼寫佢嘅「衝動」，最終喺呢種感覺上升到無法壓抑嘅時候，我惟有向PENKYAMP你提出我嘅想法嘞。終于，解放嚕~~~~~~

另外，相信Penkyamp你都會發現一個問題，就係好多人對於Penkyampji嘅感覺都係「唔習慣佢嘅韻尾形式，欣賞佢嘅韻母劃分形式」，覺得Penkyampji有尐美中不足，最後有唔少人都係由於接受唔到佢嘅韻尾形式，唯有「依依不捨」噉樣放棄埋佢嘅其它優點，轉而投向Jyutping嘅懷抱。所以我覺得，解決好人們對Penkyampji呢種極具個性嘅韻尾形式嘅接受問題，將會大大降低佢推廣嘅難度。實際上，Penkyampji嘅韻尾自有其内在嘅規律性，讀懂佢之後，相信好多人唔單止會接受佢，甚至可能會「愛上」呢種韻尾形式添！所以，我希望藉住今次Penkyampji改版嘅機會，加入一段通俗易懂嘅介紹Penkyampji採取呢種韻尾形式嘅原因以及内在規律嘅文字，以喺第一時候破除大家認爲「Penkyampji韻尾形式不倫不類毫無規律」錯誤嘅先入爲主嘅印象。
取消咗呢種抵觸心理，以等大家唔好用「異類」嘅眼光嚟到睇Penkyampji，噉樣喺介紹Penkyampji嘅其它規律時大家就會更容易靜低心落嚟去聼，去發現、欣賞「PENKYAMPJI」嘅「内在美」。
所以，呢篇咁關鍵嘅文章，既要通俗易懂同簡潔，又要全面準確噉樣介紹到Penkyampji韻尾嘅特點，既要用到語言學功底又要用到語文功底，要求唔算低。
我認爲Penkyamp你嘅文采係時候派上用場嘞，唔知Penkyamp你方唔方便呢？
[ 本帖最後由 xiss 於 2008-11-20 19:17 編輯 ]

penkyamp

呢篇文章就叫做：

广东话拼音：用韵尾拼写形式的变化来表达粤语中韵腹「长阔短窄」语音规律的实践

penkyamp

我好支持对于 eoy, eot, eont 形式嘅推广，但系有一点：原先 oy, ot, ont 唔能够作为「被淘汰形式」。

亦就系讲：「广东话拼音 1993 式」同 「广东话拼音 2008 式」应该保持呢一种名称上嘅「区别统一」。 亦即系讲，唔另采用「粤语拉丁字」之类唔统一嘅名称，但系要采用 93 同 08 呢两个唔同嘅标记。

我嘅理由系：
1。  eoy, eot, eont 系理论上合理嘅，亦即系讲，将 eo 呢个「拼位」分为「长音位 eo」同「短音位 eoh」
 
2。但系，根据广东话拼音嘅根本语音理论，oy, ot, ont 亦系理论上合理嘅，亦即系讲，ot 同 ok 韵腹之所以为唔同音素，根据 93 式，可以解释为，佢地韵尾唔同，t 系前辅音，k 系后辅音，造成 ot 韵腹为前元音，ok 韵腹为后辅音。


因为 93 式有一套自我解释理论，但 08 亦有相应不相容理论，而且能够自我解释，所以 08 式应该建立与 93 式嘅区别对应关系。但系两者系出自同一根本系统，所以应该保持名称统一。

我鼓励你多推广 08 式，而且尽量将呢个赢得嘅功劳同你自己嘅名字联系起身，比如讲，"某 08 式方案介绍为 xiss 编写"等字样，作为一种可以引以为荣嘅创新。多推广 08 式嘅同时，要在适当嘅地方说明 08 式唔系唯一嘅 penkyamp, 而系有 93 式，08 式两种，等学习者知道呢种方案系有一个演变嘅历史嘅。

xiss

原帖由 penkyamp 於 2008-11-21 14:06 發表 呢篇文章就叫做：广东话拼音：用韵尾拼写形式的变化来表达粤语中韵腹「长阔短窄」语音规律的实践

嗯，Penkyamp兄，呢篇文章就交畀你嘞～～～～
我建議，呢篇文章最好貼喺《粵語拼音字》呢張帖道，之後亦都應該時不時喺後面跟跟帖，以免《粵語拼音字》沉底。
[ 本帖最後由 xiss 於 2008-11-21 22:55 編輯 ]