喺喧鬧嘅街頭，有個男仔，日日喺街上流離浪蕩，留意著身邊嘅一切，特別係街口擺檔賣火柴嘅嗰個女仔。
喺喧鬧嘅街頭，有個女仔，日日喺街道擺檔叫賣，留意著街上嘅途人，特別係對面踎住食緊煙嘅嗰個男仔。
一日，男仔終於鼓起勇氣，瀟灑噉走到女仔面前，「HI，小姐，受溝嗎？」
女孩見男孩如此唐突嘅舉動，面帶羞澀話：「麽……麽你咁直接咖。」
「哎，我哋日日你眼望我眼，就憑你發姣噉嘅眼神，我就知道你春心蕩漾啦！開場白呢尐形式嘢就可免則免啦！直接尐，無謂浪費大家時間啊！你答咗我你受唔受溝先啦！」
「ER~受就受，不過，老豆話，日日坐喺街邊唔讀書嗰尐人，肯定唔系好人喔。」
「唉，呢尐上一代嘅思想。成龍都冇讀書啦，最後咪可以打到去美國，重可以周圍搞女人添！我話你知，我一係唔威，一威好似龍咁威。」
「咦？你都鍾意睇《龍甘威》啊？……啊，係呢，講咁耐，你點稱呼啊！」
「哦！我叫愛迪生。」
「EDISON？姓陳咖？」
「姓愛咖。你又點稱呼啊！」
「我叫小芝……」
…………
……就系噉，呢對狗男女……啊，唔好意思！呢對小情人就日日趁擺檔時間喺道搞搞陣，風流快活啦！直到有一日，兩個人打算結婚，於是，小芝就帶個男人翻去見家長啦！
點知，芝老豆見到個男仔之後，神情凝重，極力反對！
「爹，點解你要拆散我哋啊，爹~~」
「因為……因為……因為我哋姓芝既，同姓愛嘅聯婚會好難聽架！你叫老豆以後點出去見人啊！」
「爹，最多我哋改名啊，改鄭少秋同沈殿霞啊！」
「唔得啊！女！我……其實……呢個男仔，係當年我喺出面同第個女人生咖！不過你唔好話畀你阿媽知啊！」
聽到如此噩耗，小芝悲痛得不管三七二十一，就講曬畀佢阿媽知啦。出乎意料，佢阿媽冷笑幾聲，話：「傻女，我一早就知道啦！不過你放心，你都唔係你老豆親生嘅，你係我同第個男人搞出來嘅。」
…………搞清楚曬血緣關係之後，兩個人終於可以踏上紅地毯了。幾句「我願意」之後，佢哋急不及待走去洞房。當然，故事通常唔會咁順利就結束嘅，就喺洞房洞到一半嘅時候，窗外傳來急速嘅警車聲。原來，芝老豆發現咗小芝原來唔係佢親生，兩公婆大打出手，最後，兩個一齊瓜咗。
一夜之間，小芝變得冇曬經濟來源，惟有繼續喺街邊做翻個賣火柴的小女孩。而愛迪生，唔忍心見老婆日做夜做咁辛苦，於是走翻去搵自己老豆，希望搵返尐著數。點知，佢屋企早就因為佢唔讀書，一腳伸佢出門口！「我冇你呢個仔啊！」……「好，第日我發達你哋唔好嚟搵我！」
天灰灰，愛迪生返到屋企，行到街口，見到一個奄奄一息嘅女人，係小芝！
「老婆，你點啊？」
「老公，我哋……來生再見嘞，」佢臨死前，劃咗一根火柴：「火柴嘅光,啱啱劃亮嘅一刻,好明亮,好溫暖,但火柴嘅光,只係短短嘅幾秒,完咗就永遠完咗。」
愛迪生痛哭，發誓，要創造出永恆嘅光，唔好熄滅！小芝笑咗笑，走咗。
終於，幾十年嘅苦幹,佢發明咗電燈.長久不熄嘅光,天長地久嘅光。大名鼎鼎嘅愛迪生，佢名成利就，可惜，小芝永遠睇唔到嘞。
……………………
……………………
或者青春年少係戀愛嘅時節，懷春嘅心情總係令到我哋希望忘我噉轟烈戀愛一場。然而，唔好一味迷戀火柴，而忘記咗為以後嘅電燈而奮鬥。
——致所有挂住拍拖么都唔理嘅學生仔
|
發表於 2008-8-16 12:48:05
