設為首頁收藏本站

粵語協會

 找回密碼
 註冊

QQ登錄

只需一步,快速開始

掃一掃,訪問微社區

搜索
熱搜: 活動 交友 discuz
查看: 4314|回復: 6

[粵韻風華] 同粤剧有关嘅

[複製鏈接]
發表於 2008-6-13 22:33:55 | 顯示全部樓層 |閱讀模式

先讲同剧名有关:

罗通扫北——《罗通扫北》系剧名,但系如果用喺形容某个场面,就至少有以下意思:

一、餸菜唔够,遇啱班大食喫,搞到美人照镜,可喻为罗通扫北

二、一班细路喺屋企玩打仗,舞刀弄枪,互相追逐,分分钟有可能整坏啲家私杂物,都可以话佢哋有罗通扫北嘅阵势。

 

昭君出塞——《昭君出塞》同样系剧名,但系如果出去酒家食饭,按惯例实会留返个「昭君位」畀企堂摆啲餸上嚟,呢个时候,个企堂畀人喻为昭君,成日走埋嚟菜()...

 樓主| 發表於 2008-11-22 00:41:12 | 顯示全部樓層

上回讲到罗通扫北嗰阵,场面有少少乱龙,但重未够混乱,请睇下面讲乜:

 

六国大封相——《六国大封相》呢出戏,就算未睇过,点都会听过呢个名。出戏好唔好睇经已冇乜人去理,反而讲多过睇。

若果有人嗌,嘈到隔篱邻舍都听到,搞到家嘈屋闭,冇办法收科,就真系好似六国大封相噉嘞!

 

音颯。聲喉破曰喉。『集韵』悉盍切。讀若三入聲。破聲也。

 樓主| 發表於 2008-11-22 01:06:12 | 顯示全部樓層

抵冷贪潇湘——呢种情形后生仔女最常见。唔系冇钱买衫,唔系为咗悭钱,而系有衫都唔着,夹硬抵冷,正所谓要靓唔要命,搞到人有人冻,衫有衫冻,呢个时候,一个唔觉意,咳嚏一声,领嘢嘞!

好多人未必睇过《红楼梦》,但系有出粤剧叫做《情僧偷到潇湘馆》,戏入边嘅林黛玉,有潇湘妃子之称,虽然病坏噉,依然有好多人觉得姖够潇洒、够苗条。

 

音痴。鼻噴氣也。『說文』悟解气也。『禮』民多九(鼻旁)。『燕北錄』王太后噴。近臣齊呼治夔離。猶漢呼萬歲。即今人呼大吉利市之意。

廣東俗語考》同上

 樓主| 發表於 2009-5-24 12:57:36 | 顯示全部樓層

粵劇《十五貫》入邊有個昏官,名叫「過於執」,聽個名就知,呢條友梗係斷估冇辛苦啦!弊在佢係大老爺,有權判案,唔單止斷估,重成日判錯案,主觀武斷兼且下下冤戾好人,更加之唔畀人駁嘴(官吖嘛,點到你話佢唔啱啫?!),噉就死得人多囉!

 

家陣,有啲人好興同人拗頸,話就話拗,但係佢又死牛一便頸,有佢講冇你講,點都要贏,似晒「過於執」噉款。

 樓主| 發表於 2010-6-25 13:27:13 | 顯示全部樓層
聽講,七國咁亂嗰陣,齊國國君齊宣王有個王后叫鐘無艷,坐正東宮娘娘個正印位,又有個西宮娘娘叫夏迎春

鐘無艷又叫鐘離春鐘無鹽,唔怕生壞命,至怕改壞名,無艷無艷,個樣就真係無艷,醜到齊宣王都怕咗見佢,冇乜事咪等佢食自己囉!東宮娘娘對內係統領後宮嘅主帥,對外稱國母,鐘無艷咁醜樣都入主得東宮?係咪有乜「潛規則」咖?冇嘅,當年未有「潛規則」呢家嘢,無艷雖然樣醜啲,份人幾好咖!忠君愛國,重文武雙全添!夏迎春作為西宮娘娘,冇返咁上下點得呢?梗係靚到沊一聲啦!呢位西宮娘娘,生得又白又滑,成隻剝殼雞膥噉,有前有後,姣厮扽,嘩,齊宣王對少陣都唔捨得!冇乜事咪對實呢件「瀕臨絕種」嘅尤物囉!

齊國係大國,地盤大不特已,又有咁靚嘅女人,咁大嚿肥豬肉噃,實多人睺啦!於是乎,邊境告急,搵邊個去劈友呢?啊,橫掂阿東宮娘娘唔使陪瞓,兼且又打得又嚇得,咪派鐘無艷去囉!阿無艷確係有返兩度散手嘅,次次都斬到嗰班冚家富貴嘅隔籬鄰舍屎滾尿酹,呢個時候,係鐘無艷至得敕嘅,齊宣王冇佢唔得啫!好嘞!冇事嘞!齊宣王又攬返實夏迎春,又試去做愛做嘅嘢囉!故此,就有咗有事鐘無艷,無事夏迎春呢個講法嘞!

粵劇有唔少講鐘無艷嘅戲,譬如《鐘無艷三戲齊宣王》、《齊宣王哭妻》諸如此類...

時下,有啲人好現實嘅,冇事唔會搵你,有事就好似火燭噉,好似call火燭車噉call你,等你没水摏牆噉走去救駕,你抵得諗啫,之佢當你係鐘無艷咋!身就伴返住佢嘅夏迎春啦!噉嘅豬朋狗友,唔識都好閒。
您需要登錄後才可以回帖 登錄 | 註冊

本版積分規則

粵語協會官方網站
網友發帖之言論,純屬個人意見,與本會立場無關

手機版|Archiver|粵語協會    

GMT+8, 2019-9-19 07:51 , Processed in 0.494276 second(s), 25 queries .

Copyright © 2003 - 2016 Cantonese Association. All Rights Reserved. 粵語協會 版權所有

快速回復 返回頂部 返回列表