短序
有人反映粵協缺少啲自己嘅教程,我早就打算寫啲連載式嘅教程,不過一路都懶寫。有感於粵人受其它語言影響日益嚴重,慢慢唔記得咗自己嘅詞彙,所以我從詞彙方面着手,致力於提醒各位有心講地道粵語嘅人,唔好學壞嘴型。第一堂先由“返工”講起。
返工 VS 上班
唔知係咪從“大躍進”開始,我哋嘅生産就開始分班:早班、午班、夜班……,於是,每次從住處去到做嘢嘅地點呢種類行爲,就開始叫做“上班”,同時,喺做嘢地點工作,亦叫做“上班”或者“上緊班”。 其實,“上”並非地道粵語動詞,“班”亦唔係粵語用詞,且“班”字似被冠上一種“集體大生産”嘅色彩。廣東人本來習慣講“返工”,可惜,今日年輕一代都已變成“上班一族”。 另外,既然有“上班”,就必有“下班”。“下班”固然唔算係粵語,但“落班”同樣唔地道,對應“返工”,必然係“放工”、“收工”方爲正宗粵語。 祝各位每日精精神神去返工,開開心心噉放工! |