《誅仙現代粵語版》

soengzi 發表於 2008-4-6 10:28:15

各位粵桂港澳以及海外講粵語嘅朋友，大家有福啦！
即日起《誅仙現代粵語版》即將推出
你可以同時喺以下地址睇到，更新迅速，保證完整！
<A href="http://soengzi.blog.163.com/">http://soengzi.blog.163.com/</A> 粵文軒 - 網易
<A href="http://hi.baidu.com/soengzi">http://hi.baidu.com/soengzi</A> 粵文軒 - 百度
 
陸續重會喺起點中文網校園網等網頁推出
希望大家多多支持！若有高手提點，無任歡迎！
 
本人聯繫地址 
QQ，電郵：<A href="mailto:soengzi@163.com">soengzi@163.com</A> 
雅虎通，MSN，電郵，：<A href="mailto:soengzi@yahoo.cn">soengzi@yahoo.cn</A>
QQ（838037462）ICQ：356821660
 
 
以下先貼出序章同第一章，等大家先睹為快
 
誅仙現代粵語版
 
誅仙原著蕭鼎
現代粵語版商之
 
　　正文序章
 
　　時間：唔知，鬼咁死耐以前。
 
　　地點：神州浩土。
 
　　天地不仁，以萬物為謅狗！
 
　　世界上本來就係冇乜所謂嘅神仙，不過追溯翻遠古時代，人類望見周遭世界，鬼五馬六，一時又狂風暴雨，天災人禍，V哇鬼叫，唔係話一般人做得到，都唔講得笑。於是就以為九天之上，有諸般神靈，九幽之下，亦係陰魂歸處，閻羅殿堂。
 
　　於是神仙之說，就流傳於世。無數子民，誠心叩拜，所以呢，寺廟道觀就香火鼎盛喇。
 
　　講開又講吖，凡人都無不有一死。之不過世人呢就都係貪生怕死個喎，更加有地府閻羅，牛頭馬面，勾魂使者之說，嚇到人心驚驚，喺噉嘅情況下，就有咗長生不死之說嘞。
 
　　相比起其他物種，人類或者喺體質上輸蝕啲咁多，不過萬物靈長，就冇有花假嗰噃。喺追求長生嘅原動力之下，一代代聰明絕頂之士，瞓身落去，冚副精力，苦苦鉆研。時至今日，雖然，真正意義上嘅長生不死之法依然未搵到，但係就有一啲修真煉道嘅高人，參透天地造化，以凡人之軀，掌握強橫力量，借助各種法寶，竟然都可以震撼天地，有雷霆之威。而一啲得道高深嘅前輩，更加係傳說生存咗千年而不死。世上之人就以為得道成仙，於是就有更多人投入修真煉道之路喇。
 
　　神州浩土，廣瀚無邊。唯有中原大地，最係豐美肥沃，天下人口十之八九聚居於此。而東南西北邊荒之地，山窮水盡，又多兇獸猛禽，又多惡瘴毒物，又有蠻族夷民，虜毛飲血，人跡罕至。自古相傳有洪荒遺種，殘存人世，藏於深山密谷，壽逾萬年，但係就冇人見過。
 
　　時至今日，人間修真煉道之人，多如過江之鯽，數不勝數。又以神州浩土之廣闊，人間奇人異士又多，所以修煉之法林林總總，俱不相同。長生之法重未搵到，反而逐漸有咗門派之分，正邪之別。由之引起嘅門戶之見，勾心鬥角乃至爭伐殺戮，在所多有。
 
　　當長生不死睇起嚟噉遙不可及嘅時候，修煉中所帶來嘅力量，就逐漸成咗好多人嘅目標。
 
　　方今之世，正道大昌，邪魔退避。中原大地山靈水秀，人氣鼎盛，物產豐富，畀正派諸家牢牢霸住。其中就以「青雲門」、「天音寺」、和「焚香谷」係三大檔，是為馬首。
 
　　呢個故事，就係從「青雲門」開始嘅喇。
 
　　正文第一章青雲
　　
 
　　青雲山脈巍峨高聳，虎踞中原，山陰有大河「洪川」，山陽有重鎮「河陽城」，扼天下之咽喉，地理位置相當緊要。
 
　　青雲山連綿百裏，峰巒起伏，最高有七峰，高聳入雲，平時就白雲攬山腰，不識廬山真面目。青雲山山林密布，飛瀑奇巖，珍禽異獸，景色幽險奇峻，天下出名。
 
　　之不過更有名嘅，係喺呢座山上嘅修真門派----青雲門。
 
　　青雲一脈，歷史悠久，創派至今都經已有兩千幾年，係家陣正邪兩道之首。聽講開派祖師本來係一條江湖睇相佬，冇人冇物就窮到噥，都走頭無路咁滯架喇。喺佢四十九歲嗰年，雲遊四方，行埋嚟青雲山，一眼就及到呢座山鐘靈奇秀，聚天地靈氣，係一噠風水寶地。跟住就即刻上山，飲風吔露，修真煉道，冇幾耐，竟然喺青雲山深處一度秘洞內，執到本無名古卷，上載各種法術，艱深枯澀，但係妙用無窮，勁到爆鏡。
 
　　睇相佬執到寶，就梗係潛心修習。眨下眼廿年，小有所成，咪出翻嚟囉，幾番江湖風雨，雖然話吞唔落成個江湖，到成咗一方梟雄。於是喺青雲山上，開宗立派，名曰：青雲。因此古卷所記，近於道家，佢乾脆做迷道士，自號「青雲子」，後世子弟都尊稱做「青雲真人」。
 
　　青雲子壽三百六十七歲，身前收咗十個弟子，臨終前講低：「我半生睇相，盡精相術，尤精風水。呢青雲山乃係人間罕有靈地，我青雲一門霸住呢座山，以後必定興盛，你哋千祈咪放棄啊。切記，切記！」
 
　　當時十個弟子個個噏頭，信到十足，青雲子啱啱歸西。鬼知佢呱咗之後百年間，唔知係天意弄人，定根本係青雲子睇錯眼啊，青雲門不單止冇發達，反而慢慢收皮添。
 
　　十個弟子中，兩件早夭，四件喺江湖劈友時釘咗，淨低一件殘廢，一件失蹤，得翻兩脈。就噉過咗五十年，青雲山方圓百裏發生咗從未有過嘅天災地震，山洪爆發，地動山搖，死傷無數，竟然又呱埋一脈。而得翻嘅死剩種，又因為資質問題，冇乜料到，反而因為本古卷，引埋啲狂蜂浪蝶，日夜踩場，若果唔係青雲子留低嘅幾件勁嘢，可怕青雲門都經已被人掃咗。
 
　　呢種情況一直持續咗整整四百年，青雲門冇嚟神氣，直程可以用「茍延殘喘」嚟形容。到咗最後，甚至俾人蝦到上心口，青雲七峰，除咗主峰通天峰，其余六座都俾外敵霸埋，其中重有強盜悍匪，以做據點，四處搶掠。唔知情嘅人以為青雲門墮落成噉，真係無眼睇囉，青雲子弟有心殺敵，但可惜係有心無力，可憐可嘆。諗翻起身，的確喺係青雲一脈最悲苦嘅一段日子啊。
 
　　直到距今一千三百年前，情況先有咗改變。
 
　　大概係青雲子嘅相術終於顯靈咗，或者係個天攰啦，唔想再玩青雲門，喺呢個時候，從青雲門第十一代傳人裡面，竟出咗一個驚才絕艷、領袖群倫嘅頂級大哥----青葉道士。青葉俗家姓葉，原本係一個窮酸秀才，天資聰穎過人，但係任考唔中，傻人傻福，做咗青雲門第十代掌門無方子嘅關門弟子，先二十有二。
 
　　青葉入門之後，一年就將無方子所傳嘅所有劍術法道領悟貫通，喺所有弟子中獨占鰲頭。又過一年，就連無方子都只能同佢勉強打個平手。無方子又驚又喜，即刻將祖師傳落嘅嗰本古卷拎出，傳畀青葉。於是青葉就喺通天峰後山「幻月洞」閉關，呢一關就係十三年，啱啱先至破關而出。
 
　　據說佢破關嗰陣，正係月圓之夜。冷月高懸，成座青雲山通天峰就好似日頭噉。突然狂風大作，後山竟有龍吟長嘯，聲震百裏，聽到都驚。淡紫祥光，沖天而起，一聲巨響，幻月洞府炸開，青葉鶴髮童顏，身有清光，慢慢行出，眾人駭然，以為成仙。
 
　　之後，青葉正式出家，以本家姓葉，取青雲之「青」字，所以叫青葉。佢當日笑別恩師無方子，講：「師尊稍待，弟子出去辦事，一日即回。」
 
　　大家都唔知佢搞邊科，一日夜之後青葉禦劍而回，青雲山六峰外敵，竟然全部冚家富貴。青葉道士道法之強，手段之毒，一時間風吹火起，青雲門聲勢大振。
 
　　又過一年，無方子將掌門之位傳畀青葉，自己清修去咗，唔再理門中閒事。青葉掌權之後，勵精圖治，大力扶助同門，嚴格挑選傳人，再講佢從嗰無名古卷上領會所得，有神鬼之威。青雲門從此蒸蒸日上，五十年間，變成正道大檔，而到咗二百年後，就已經領袖正道各派。
 
　　青葉真人高壽七百五十歲先死，佢一生收徒嚴謹，只傳七人，於是將青雲七峰年晚煎堆，共傳香火。其中長門住喺主峰通天峰青雲觀中，係重心所在。
 
　　時至今日，青雲門下弟子都成千人，高手如雲，聲威顯赫，同「天音寺」、「焚香谷」並列為當世三大檔。而掌門道玄真人，超凡入聖，更係當世一等一嘅絕世高手。
 
　　※※※
 
　　青雲山腳底，離大城「河陽」重有五十裏地嘅西北方，有條村叫「草廟村」。呢度住咗四十幾戶人，民風淳樸，村中百姓大多上山斬柴畀青雲門換銀兩使。平時裏村民常見青雲弟子飛嚟飛去，又識變法術，以為得道成仙。而青雲門不嘍好睇四圍百姓，對呢度嘅村民都算唔話得。
 
　　一日，天空陰沈沈，烏卒卒，畀人有股透唔過氣嚟嘅感覺。
 
　　從草廟村度望去，巍峨嘅青雲山直插天際，奇峰怪巖，隱隱帶咗一絲妖邪。
 
　　之不過，村民們住咗咁耐，見慣不怪，懶理，更加唔好講無知細路啦。
 
　　「死靚仔，你走去邊？」大嗌又帶幾分笑意，出自一個大細路之口，佢望落十歲左右，眉清目秀，帶住四、五個細路仔，追著前面另一個細路。前頭嗰細路細佢兩歲，矮啲，笑吟吟，搏命衝，間中重檸頭畫個大花貓。
 
　　「張凡，有種你企喺度！」後面個細路大叫。
 
　　前頭嗰個叫張凡嘅細路「呸」咗一聲，邊走邊唱：「邊個話我傻，傻，傻，我請佢食燒鵝……」越叫越走。
 
　　一路追，呢啲細路慢慢走近村東嘅嗰間破舊草廟。從外望去，呢座草廟殘到廢曬，都唔知經歷咗幾多人世風雨。
 
　　張凡沖咗入去，鬼知一唔留心，居然俾門板掯咗一下，拍一聲，仆街。後邊幾個細路大喜，一擁而上，將佢壓喺底下，條友好鬼得戚：「俾我捉住咗，呢下你冇嘢講啦？」
 
　　點知張凡怪眼一翻：「唔算唔算，你出貓，唔算」
 
　　條友一呆：「我幾時有出貓喎？」
 
　　張凡：「你條友好嘢，你敢夠膽講呢度門唔係你放喺呢度咖？」
 
　　嗰個叫林驚羽嘅細路大聲講：「你都戇居嘅！」
 
　　張凡一咩嘴，頭一擰，一副打死唔怕嗰樣。林驚羽扯火，一手扼住佢嘅頸，：「講好咗捉到就認輸嘅，你服唔服？」
 
　　張凡踩你都傻哇。
 
　　林驚羽塊面暴紅，手上出力，大聲講：「服唔服？」
 
　　張凡氣管俾佢扼住，呼吸困難，慢慢塊面都開始漲紅，不過佢人仔細細，牛過碌蔗，硬係一聲唔出。
 
　　林驚羽就越嚟越頂，力越嚟越大：「服唔服，服唔服，服唔服？」
 
　　其他細路一睇唔對路，冚嘭唥縮沙走雞，淨低呢兩個無知細路，為咗意氣之爭，死雞撐飯蓋。
 
　　眼睇住一場大禍便無端生出，突然聽草廟深處一聲佛號，有人講：「阿彌佗佛，速速收手。」
 
　　一只幹瘦手掌，橫空而出，伸出二指，喺林驚羽雙手上彈咗一彈。林驚羽好似俾電擊噉，全身大震，雙手松開。
 
　　張凡索曬大氣，明顯係谷得太耐。佢兩條友，醒翻神嚟，對望一眼，彼此都越諗越驚。
 
　　林驚羽傻傻哋講：「細凡，對唔住呀。我都唔知點解……」
 
　　張凡擰咗擰頭，順翻條氣，講：「沒事。咦，你係邊個？」
 
　　啲細路順住佢眼光望去，只見喺廟中，企緊一個老和尚，塊面皺紋橫生，一身爛衫，全身上下汙糟邋遢。手攞住一串碧玉念珠，晶瑩剔透，耀人眼目，淡淡青光。奇怪嘅係，喺十幾粒大細一致，光潔剔透嘅青玉念珠中間，偏偏還夾住一粒非玉非石、顏色深紫、暗淡無光嘅圓珠。

卢总發表於 2008-4-6 13:39:57

时间嘅习惯性讲法应该系「鬼死咁耐以前」，而唔系「鬼咁死耐以前」。

余OK 發表於 2008-4-7 23:24:45

　　鼓勵原創，設置精華。考慮可以推薦到南方都市報「經典粵讀」欄目。

卢总發表於 2008-4-8 00:16:35

<IMG alt="" src="http://bbs.cantonese.asia/images/smilies/default/shocked.gif" border=0 smilieid="6"> 似乎重未得住噃！<IMG alt="" src="http://bbs.cantonese.asia/images/smilies/default/sweat.gif" border=0 smilieid="10">

cingsan 發表於 2008-4-30 19:06:48

精彩吖……

外外星人 發表於 2008-4-30 23:16:39

原帖由 余OK 於 2008-4-7 23:24 發表 <A href="http://bbs.cantonese.asia/redirect.php?goto=findpost&pid=73483&ptid=9657" target=_blank><IMG onclick=zoom(this) alt="" src="http://bbs.cantonese.asia/images/common/back.gif" onload="attachimg(this, 'load')" border=0></A> 　　鼓勵原創，設置精華。考慮可以推薦到南方都市報「經典粵讀」欄目。 
 
登咗未啊？

頁: [1]

粵語協會's Archiver

《誅仙現代粵語版》