G肉佬之日常：Aging
<P> 敬老係應該，不過老人家，你檢點啲啦。——G肉佬（2007-6-24）</P><P><BR> 「伯爺公，行快啲啦！哎呀，司機唔該等埋吓。」</P>
<P><BR> 公車後面約百五米處，一個老坑公以每秒60cm嘅速度「跑」緊過嚟，可能對佢嚟講已經係最快速度喇，但車上面幾個趕住返工打卡嘅白領就急到蹬晒腳。司機大佬都唔多耐煩，但個伯爺婆一隻腳喺車上面，另一隻腳喺車下面，你又吹佢唔漲。</P>
<P><BR> 有時唔使看檔，我就會搭車四圍去。不過老荔灣呢邊多老人，搭親公車都會見到呢啲情景，呢啲掛住老人證嘅老人家們幾乎座滿成部車，就連企得比較舒服嘅位都畀佢哋佔領埋，有好多都系座一兩個站，不過佢哋上落車，平均都占咗半個鍾……</P>
<P><BR> 其實真係要讓位都冇咩好講，但有啲的確係以老賣老，見佢追車健步如飛嘅，上嚟直頭叫你讓位，讓咗重嫌你唔夠主動，部車一路行就一路單單打打。佢又唔諗吓自己唔使錢有位座，係幾幸福嘅樹。好多司機大佬都咒呢啲搭霸王車嘅老嘢做「神主牌」，有時免得過，都唔比佢哋上，費事刹車急啲都給人鬧到狗噉。</P>
<P><BR> 老西關就好似呢啲唔爭氣嘅老人家噉，到處都顯得好蕭條，以前周街都見細路哥玩捉衣因，都早已成為回憶，好多有錢啲嘅家長都寧願使多啲錢，搬去第度，等自己嘅細路可以去啲出名啲嘅學校。</P>
<P><BR> 騎樓、青磚大屋、摚籠門、滿洲窗……都已經拆嘅拆，修嘅修，留低嘅亦都冇咗過往嘅韻味。貧民窟都成為大地產商嘅地方，好彩嘅賣返萬零蚊一方，唔好彩就變成爛尾樓，拆遷戶？咪搬去啲冇雷公咁遠嘅地方去開荒囉！</P>
<P><BR> 以前我成日去睇戲嘅市三宮早就冇咗，聽講連金聲都眾望所歸，冇得留低；龍津路嘅騎樓已經得返零星幾座，恩甯路嘅跟著又話拆；上下九變咗鄉下佬消費同賣流嘢嘅地方，連十鋪商店都冇埋……</P>
<P><BR> 回過神，已經到咗目的地，啱落到車就聽到：</P>
<P><BR> 「嗯，哼！咳……吐！」</P>
<P><BR> 「喂，阿伯！請問篤痰係咪你吐嘅呢？」</P>
<P><BR> ……<BR></P>
<P>By the way：長堤係廣州嘅一個景點同晨運嘅勝地，但呢度好難揾廁所嘅，阿伯們急起上嚟就一轉過身：「望江一分鐘，下面好輕鬆」！留低新鮮滾熱辣嘅一泡黃尿，然後揚長而去。<BR><BR></P>
[ 本帖最後由 gboss 於 2008-11-13 17:02 編輯 ]
頁:
[1]