G肉佬之日常：Geomancy
<P> 所謂一命二運三風水，你又信唔信？——G肉佬（2007年6月18日）</P><P><BR> 有時人黑起上來真係連行路都打倒褪。琴日經過大姐明個水果檔，佢啲榴櫣擺到周地都係，咁啱我又著住拖鞋，一個唔留神踢埋啲榴櫣度，搞到只腳猛咁飆血。我又好衰唔衰問佢借姨媽巾止血，平時好講得笑嘅大姐明嗰日又咁啱心情唔靚，卒之姨媽巾冇借到之餘重畀佢剪咗一巴，幾乎扭親條頸。</P>
<P><BR> 收擋返到屋企，見到老竇又煲緊佢嗰套《中華風水》DVD，睇睇吓重成個彈起，一副恍然大悟嘅樣話：「哦，原來唔好種有刺植物啊！咦？衰仔，返嚟嗱，只腳做咩啊？」</P>
<P><BR> 「畀啲有刺植物拮親囉！」</P>
<P><BR> 「嗱，我都算到嘎啦！」</P>
<P><BR> 「頂，馬後炮，你不如出年先講！」</P>
<P><BR> 我老竇雖然唔係風水佬，但佢同好多老一輩嘅人一樣好信呢家嘢。不過屋企嘅龍骨同仙人掌都係佢種嘅，唔知點解佢會種熱帶植物，可能我成日唔肯幫佢淋花啩！種呢啲嘢就成個星期唔淋水都得。我就唔鍾意種花嘅，一嚟冇心機，二嚟又冇時間打理。咁耐以嚟，我就得芽菜係種得生嘅啫。</P>
<P><BR> 雖然話風水呢家嘢有時真係寧可信其有，但我就好憎呢啲「江湖術士」嘅，佢哋有句名言——風水佬呃你十年八年。哎，傻嘅！十年後你想揾佢對質都難啦！就算揾得返，算得准唔准都呃咗你十年囉，都係證明你低B，抵呃啫！</P>
<P><BR> 以前有個算命佬夠話我個相係非富則貴啦，不過我問佢我幾時先發達，佢就話「天機不可洩漏」喔！屌，你講晒啦，大師！</P>
<P><BR>By the way：其實家陣好多呢啲風水佬、算命佬、問米婆之類嘅人，但大多數都係冇料到兼夾擺明昆，特別街邊擺地攤嗰啲，你哋諗吓，真係有料都唔使擺地攤啦！ <BR></P>
[ 本帖最後由 gboss 於 2008-11-13 15:39 編輯 ] <P>我雖然唔係老一輩，但我都好信呢家嘢~</P>
<P>不過我唔係好似啲婦孺噉，人講乜都信，通常街邊擺攤嗰啲，就真係信我好過信佢~我經常話真人不露相，有料嗰啲就唔使Mau1街邊啦~</P>
<P>不過講真嗰句，真係想搵返個高人拜吓師</P>
<P>最後講多句，閣下同令尊翁嗰段對話好搞嘢~</P>
頁:
[1]