[轉帖]妖音開始受反擊
妖音開始受反擊 看電視新聞的朋友，最近不知有沒有留意，在新聞中同一個字，無線電視記者的讀音，不同圖麟都新聞報告員的發音。例如報告煤礦大火，無線記者已講返人話，將礦字讀回「抗」音，可是我們本地，卻依然堅持要kwong，妖音依舊。
何以如此？只因為香港人對何文匯博士大教授的妖音已開始反擊，此事由學校而起，何博士大教授糾集港台的朱台長，連同十幾個中學校長，組織起來強銷妖音，企圖謀殺廣府話，要學校老師逼學生改姓，姓韋要改姓「圍」、姓任要改姓「淫」、姓樊要改姓「煩」……，於是招來學生家長的抗議，由此引起傳媒的注意，雖然低調反應，但一些明顯的妖音已然改邪歸正，例如姓「鄺」的人，已經恢復其「抗」音，「礦」字因此亦蒙特赦。
一家報紙，轉載了王亭之一組反妖音的舊文；一家出版社，搜集了王亭之百餘篇談廣府音的文章，準備出書；另一家出版社，建議王亭之編一本粵音字典，報紙專欄亦開始有支持王亭之的聲音，不再像從前那樣，怪王亭之「理埋晒的閒事」，因為知道這已經不是閒事了。
圖麟都眼看就有兩三家中文電視開台，王亭之希望他們不可跟用妖音，用人話來報新聞，便不致害人子弟，好過食長齋。
加拿大多倫多星島日報
2005年12月19日
轉自《王亭之閒談》http://www.kankanwoo.com/masterjournal/journals.asp
Re:[轉帖]妖音開始受反擊
個人覺得「礦」「鄺」重係應該讀kwong3我本亦對何文滙嘅正音有所保留，但係睇到呢篇反妖音嘅介紹又高興唔起來，因為我覺得裏面提到嘅例子又反錯咗喇，而該反嘅又冇提到。因為長期以來，我哋嘅教學體系中都冇將粵語作為教學嘅內容，近幾十年更加係逐步受到排斥，所以坊間嘅讀音存
在唔少錯音係肯定嘅，所以唔可以完全以民間讀音至上。另一方面，到目前為止，對粵語嘅研究重係好唔足夠，甚至可以講只係處於初級階段，所以雖然我對嗰啲醉心於粵語研究並且投入咗大量心力嘅專家學者係好尊敬同感激嘅，我亦相信佢哋嘅研究成果應該係相當可取嘅，但係有啲欠妥嘅地方亦係必然嘅，所以好多時候亦都唔能夠唯專家獨尊。
我個人嘅做法係多啲聽其他人嘅意見，多方面噉考慮諸如民間嘅流傳現實情況、古音嘅傳承和演變嘅規律、與其它漢語方言嘅橫向比較、字型構造等因素，再作出自己嘅判斷，調整自己嘅讀音。
「礦」「鄺」「擴」呢啲字我以前統統都係讀成「抗」音；「國」「郭」就讀成「角」；「廣」讀「講」；「光」讀「剛」。……
後嚟睇咗網上關於粵語正音方方面面嘅意見之後，再自己考慮過下，就調整成以下嘅讀法：
「礦」「鄺」改讀 kwong3
「擴」改讀 kwok3
「國」「郭」改讀 gwok3
「廣」改讀 gwong2；「光」改讀 gwong1
但係亦有啲我決定唔跟隨何氏正音，保留我原來嘅讀法，比如
「構」「購」「媾」就照我原來嘅讀法 kau3 而冇改讀 gau3。
我唔敢話自己噉讀就一定啱，但係我的確係有諗過先至決定噉樣讀，唔知大家嘅意見係點，有興趣嘅話我哋不妨交流下。
Re:[轉帖]妖音開始受反擊
jumpsey你上面提到改讀後嘅發音基本都啱，但係「擴」改讀 kwok3，我認爲讀kwong3 先啱。入聲急速短收藏，表達唔出「擴」嘅張揚之意。
「擴」同「廣」字同源，取「廣」字韻。所以我認爲讀kwong3 先啱。
Re:[轉帖]妖音開始受反擊
（一）關於「擴」字，我以前亦都係有邊讀邊取「廣」字韻。呢種做法對於佔漢字大多數嘅形聲字嚟講，絕大多數時候係可取嘅，但係如果對於非形聲字就唔靈喇。「擴」字亦都可以理解成以「扌」使空間變得更「廣」闊，可見佢唔見得一定係形聲字，亦就未必取「廣」韻喇。（二）古今語音嘅演變存在某啲規律，使得現今各漢語方言之間亦喺某程度上存在一啲對應關係。依家將粵語同大家較為熟悉嘅普通話比較一下睇睇：
(1)陽聲韻對應陽聲韻（陽聲韻係指帶鼻音韻尾嘅韻母。雖然具體嘅韻母可能唔同，但係基本上仍然維持住韻類嘅對應關係）：
例如：正、整(zing — zheng)；敢、感(gam — gan)；但、單(daan — dan)……
(2)普通話中，入聲韻變成陰聲韻（即係失去入聲韻尾變成以元音結尾嘅開音節）：
例如：國、郭(gwok — guo)；潔、傑(git — jie)；濕、拾(sap — shi)……
由礦、鄺(kwong — kuang)，擴(？— kuo)可見，與「礦」「鄺」兩字屬陽聲韻唔同，「擴」好可能係入聲字，所以我傾向於「擴」字讀 kwok3 音。
Re:[轉帖]妖音開始受反擊
比较同意jumpsey嘅意见。我有啲怀疑“擴”字嘅右边本身唔系“廣”而系“廓”。
Re:[轉帖]妖音開始受反擊
「擴」嘅一個異體字係「㨯」（扌郭）http://140.111.1.40/yitia/fra/fra01697.htm。《異體字字典》研訂說明﹕
「㨯」為「擴」之異體。「擴」字見《康熙字典．手部》，曰：「張小使大也。」「㨯」字見《字彙．手部》，曰：「苦郭切，音廓，與『擴』同，張大也。」《正字通．手部》並同。（……註）又按：「擴」從「廣」聲，「㨯」從「郭」聲，「廣」者古晃切、「郭」者古博切，二字同屬「見」紐，則「擴」之作「㨯」，乃以雙聲字改易聲符者也，其為異體信然，故可收。
《正字通》﹕「㨯同擴。《集韻》﹕『擴或作㨯』。通作廓。」
我對聲韻冇研究﹐唔識聲紐﹐畀大家參考。
註﹕呢度話《康熙字典》以前嘅書﹐都將「擴」字「由」部上便嗰畫﹐移去右便少少﹐唔喺正正上便。
Re:[轉帖]妖音開始受反擊
《廣州話正音字典》擴：kwong3[礦]<又>kong3[抗]《廣州音字典》擴：抗<又>廓
《中華新詞典》擴：kwok8(廓)<又>kwong3(礦)
我意見：“抗”音明顯係“擴”音嘅懶音。加上，我平時講“擴音機”都係“礦音機”，冇“廓音機”嘅講法。“擴”或者同古書字典等不一致，但如按形聲結構會比較吻合，我會接受“礦”音。 語言會縯變的，無需要太拘泥
頁:
[1]